નાઈગાંવ : મહારાષ્ટ્રના પાલઘર જિલ્લાના નાઈગાંવ રેલવે સ્ટેશન પર મહિલાઓની સુરક્ષાને ગંભીર પડકાર આપતી એક અત્યંત ચોંકાવનારી ઘટના સામે આવી છે. ટ્રેનમાં છેડતીનો વિરોધ કરવા પર એક યુવતીને ચાલુ પ્લેટફોર્મ પરથી ટ્રેક પર ધક્કો મારીને ગંભીર ઈજાઓ પહોંચાડવાના મામલામાં સરકારી રેલવે પોલીસ (GRP) દ્વારા ૫૩ વર્ષીય શખ્સની ધરપકડ કરવામાં આવી છે. આ ક્રૂર હુમલામાં યુવતીનો ડાબો હાથ કપાઈ ગયો હતો, જેના કારણે સમગ્ર વિસ્તારમાં ભારે રોષ અને સનસનાટી ફેલાઈ ગઈ છે.
ઘટનાની વિગતો મુજબ, ગત ૪ નવેમ્બરની સાંજે ૨૦ વર્ષીય સોફિયા અસલમ ખાન બોરીવલીથી નાઈગાંવ તરફ લોકલ ટ્રેનમાં મુસાફરી કરી રહી હતી. આ દરમિયાન આરોપી જિતેન્દ્ર ગિરજપ્પા હિરમુખે નામના શખ્સે તેની સાથે અડપલાં કરી છેડતી કરવાનો પ્રયાસ કર્યો હતો. જ્યારે યુવતીએ ટ્રેનમાંથી નીચે ઉતરીને તેની આ હરકતનો ઉગ્ર વિરોધ કર્યો, ત્યારે ઉશ્કેરાયેલા આરોપીએ તેને પ્લેટફોર્મ અને ટ્રેનની વચ્ચેના ગેપમાં ધક્કો મારી દીધો હતો, જેના કારણે યુવતી સીધી રેલવે ટ્રેક પર પટકાઈ હતી અને ચાલુ ટ્રેનની અડફેટે આવવાથી ગંભીર રીતે ઘાયલ થઈ ગઈ હતી.
શરૂઆતમાં આ ઘટનાને સામાન્ય અકસ્માત માની લેવામાં આવી હતી, પરંતુ પીડિતાએ મુંબઈની કૂપર હોસ્પિટલમાં સારવાર દરમિયાન પોલીસ સમક્ષ આપેલા નિવેદનમાં સમગ્ર આપવીતી જણાવી હતી. પીડિતાના સ્પષ્ટ નિવેદનના આધારે ભાયંદર જીઆરપી પોલીસ સ્ટેશન દ્વારા ભારતીય ન્યાય સંહિતા (BNS)ની સંબંધિત કલમો હેઠળ ગુનો નોંધવામાં આવ્યો હતો. ઘટનાની ગંભીરતાને ધ્યાનમાં રાખીને જીઆરપી અને આરપીએફની સંયુક્ત ટીમે સીસીટીવી ફૂટેજ અને ટેકનિકલ સર્વેલન્સની મદદથી તાત્કાલિક તપાસ હાથ ધરી હતી અને આરોપીની ભાળ મેળવી લીધી હતી.
પોલીસ તપાસ દરમિયાન ગત ૯ નવેમ્બરે આરોપી જિતેન્દ્ર હિરમુખેની ધરપકડ કરવામાં આવી છે અને હાલ તેને ન્યાયિક કસ્ટડીમાં મોકલવામાં આવ્યો છે. આ કેસમાં પોલીસ દ્વારા કલમ ૧૦૯ (હત્યાનો પ્રયાસ) નો પણ ઉમેરો કરવામાં આવ્યો છે, અને સુરક્ષા એજન્સીઓ દ્વારા આ કેસની ઝીણવટભરી તપાસ ચાલુ રાખીને આરોપી સામે કડક કાનૂની કાર્યવાહી કરવાની પ્રક્રિયા હાથ ધરવામાં આવી છે.