મુંબઈ,તા.૩૦:  અમદાવાદથી મુંબઈ જઈ રહેલી ઇન્‍ડિગો ફલાઇટમાં આજે એક મોટી મેડિકલ ઇમરજન્‍સી સર્જાઈ હતી. ફલાઇટ હવામાં હતી ત્‍યારે એક ૩ વર્ષના માસ્‍ટર સૌરભ નામના બાળકની તબિયત અચાનક અત્‍યંત ખરાબ થઈ ગઈ હતી અને તે બેભાન થઈ ગયો હતો. બાળકની નાજુક સ્‍થિતિને જોતા પાયલટે (Pilot) માનવતા દાખવીને તાત્‍કાલિક મોટો નિર્ણય લીધો હતો અને એર ટ્રાફિક કંટ્રોલ નો સંપર્ક સાધીને ફલાઇટને નજીકના સુરત એરપોર્ટ તરફ ડાયવર્ટ કરી દીધી હતી.

હવામાં ૨ ડોક્‍ટર્સે કરી સારવાર, છતાં સ્‍થિતિ નાજુક જણાતાં લેન્‍ડિંગ મળતી માહિતી મુજબ, જ્‍યારે ફલાઇટમાં બાળકની સ્‍થિતિ બગડી ત્‍યારે ક્રૂ મેમ્‍બર્સ દ્વારા વિમાનમાં મુસાફરી કરી રહેલા મુસાફરોમાંથી મદદ માંગવામાં આવી હતી. સદનસીબે ફલાઇટમાં ૨ ડોક્‍ટર્સ હાજર હતા, જેમણે તાત્‍કાલિક બાળકને મેડિકલ સહાય આપવાનો પ્રયાસ કર્યો હતો. જો કે, ડોક્‍ટર્સની પ્રાથમિક સારવાર છતાં બાળકની સ્‍થિતિ સતત નાજુક જણાતી હતી. મુસાફરી દરમિયાન જોખમ વધે તેમ હોવાથી પાયલટે જરાય સમય ગુમાવ્‍યા વિના સુરત ઇન્‍ટરનેશનલ એરપોર્ટ પર ઇમરજન્‍સી લેન્‍ડિંગ માટે પરવાનગી માંગી હતી.

એર ટ્રાફિક કંટ્રોલ (ATC) ને સંદેશ મળતા જ સુરત એરપોર્ટ પ્રશાસન તાત્‍કાલિક સક્રિય થઈ ગયું હતું. એરપોર્ટ પર સેન્‍ટ્રલ ઇન્‍ડસ્‍ટ્રિયલ સિક્‍યુરિટી ફોર્સ ના જવાનો અને ઇમરજન્‍સી મેડિકલ ટીમ ને રનવે પર તૈનાત કરી દેવામાં આવી હતી. પ્‍લેન લેન્‍ડ થતાંની સાથે જ મેડિકલ ટીમે વિમાનની અંદર જઈને ૩ વર્ષના માસ્‍ટર સૌરભ ને ઓક્‍સિજન સપોર્ટ અને પ્રાથમિક સારવાર (First Aid) આપી હતી. ત્‍યારબાદ તેને વધુ સઘન સારવાર માટે એરપોર્ટની બહાર તૈયાર ઊભેલી એમ્‍બ્‍યુલન્‍સ મારફતે સુરતની ખાનગી હોસ્‍પિટલ માં ખસેડવામાં આવ્‍યો હતો.

હોસ્‍પિટલના સુત્રોના જણાવ્‍યા અનુસાર, સમયસર મેડિકલ ઇમરજન્‍સી લેન્‍ડિંગઅને ડોક્‍ટરોની ત્‍વરિત સારવાર મળવાને કારણે માસ્‍ટર સૌરભ નો જીવ બચી ગયો છે અને તેની સ્‍થિતિ હવે સંપૂર્ણપણે સ્‍થિર (Stable) છે. બાળકના પરિવારે પાયલટ, એરલાઇન્‍સ સ્‍ટાફ અને એરપોર્ટ ઓથોરિટી નો આભાર વ્‍યક્‍ત કર્યો હતો. આ તરફ સુરત એરપોર્ટ પર જરૂરી તમામ કાયદાકીય પ્રક્રિયા પૂર્ણ કર્યા બાદ, ઇન્‍ડિગો ફલાઇટે ફરી એકવાર મુંબઈ તરફ ઉડાન ભરી હતી. પાયલટની સૂઝબૂઝ અને ત્‍વરિત નિર્ણયની સોશિયલ મીડિયા પર પ્રશંસા થઈ રહી છે.