નવી દિલ્હી: ભારતીય હવામાન વિભાગ (IMD) દ્વારા આગામી ૯ કલાક માટે દેશના ૧૫ રાજ્યોમાં અતિ ભારે વરસાદની ગંભીર ચેતવણી જારી કરવામાં આવી છે. પશ્ચિમી વિક્ષેપ અને સક્રિય ચોમાસાને કારણે ઉત્તર-પશ્ચિમથી લઈને પૂર્વ ભારત સુધીના વિસ્તારોમાં વાદળ ફાટવા જેવી સ્થિતિ અને તોફાની પવનોની આગાહી કરવામાં આવી છે. આ કુદરતી આફતને પગલે પ્રશાસને તકેદારીના ભાગરૂપે તમામ પ્રકારની તૈયારીઓ શરૂ કરી દીધી છે.

હવામાન વિભાગના જણાવ્યા અનુસાર, દિલ્હી, પંજાબ, હરિયાણા, હિમાચલ પ્રદેશ, ઉત્તરાખંડ, જમ્મુ-કાશ્મીર અને બિહાર સહિતના ૧૫ રાજ્યોમાં સ્થિતિ ગંભીર બની શકે છે. ખાસ કરીને ઉત્તરાખંડ, સિક્કિમ અને પશ્ચિમ બંગાળ માટે 'રેડ એલર્ટ' જાહેર કરાયું છે, જ્યાં ૮૦ કિમીની ઝડપે પવન ફૂંકાવાની શક્યતા છે. પર્વતીય વિસ્તારોમાં ભૂસ્ખલનને કારણે માર્ગો બ્લોક થવા અને નદીઓના જળસ્તરમાં અચાનક વધારો થવાની પ્રબળ ભીતિ સેવાય રહી છે.

રાજૌરી જિલ્લામાં આવેલું અચાનક પૂર તંત્ર માટે પડકારરૂપ બન્યું છે, જ્યાં ધારહાલ નદીમાં પાણી ફરી વળતા સેંકડો વાહનો તણાઈ ગયા હોવાના અહેવાલ છે. આ ઉપરાંત, અરુણાચલ પ્રદેશમાં ભારે વરસાદે તબાહી મચાવી છે, જેમાં ૨૬ જિલ્લાઓના ૫૭૬ ગામો પ્રભાવિત થયા છે અને જાનહાનિના સમાચારો સામે આવ્યા છે. પરિસ્થિતિને ધ્યાનમાં રાખીને અમરનાથ અને વૈષ્ણોદેવી જેવી મહત્વપૂર્ણ યાત્રાઓ પણ તાત્કાલિક અસરથી રોકી દેવામાં આવી છે.

વહીવટીતંત્રે અસરગ્રસ્ત વિસ્તારોમાં બચાવ અને રાહત કામગીરી માટે NDRF ની ટીમોને તૈનાત કરી દીધી છે. નીચાણવાળા વિસ્તારોમાં રહેતા લોકોને સલામત સ્થળે ખસી જવા સૂચના આપવામાં આવી છે. વીજળીના થાંભલાઓ અને વૃક્ષો પડવાની સંભાવનાને પગલે સ્થાનિક વહીવટીતંત્ર દ્વારા સતત મોનિટરિંગ કરવામાં આવી રહ્યું છે, જેથી જાનમાલનું નુકસાન ઘટાડી શકાય.

૨૧ જુલાઈ સુધી ઉત્તર અને પૂર્વ ભારતના મોટાભાગના વિસ્તારોમાં વરસાદનું જોર યથાવત રહેવાની સંભાવના છે. કૃષિ ક્ષેત્રમાં પણ પાકને નુકસાન થવાની ભીતિ સેવાઈ રહી છે, જેના પર સરકારની નજર છે. સ્થિતિ સામાન્ય થયા બાદ નુકસાનના સર્વે અને જરૂરિયાતમંદ પરિવારોને વળતર આપવાની પ્રક્રિયા અંગે સરકાર દ્વારા નિર્ણય લેવામાં આવશે.

હવામાન વિભાગના અનુમાન મુજબ, ચોમાસાનું આ સક્રિય સ્વરૂપ આવનારા ૬ થી ૭ દિવસ સુધી જળવાઈ શકે છે. નાગરિકોને સ્થાનિક પ્રશાસન દ્વારા જારી કરવામાં આવતી સૂચનાઓનું ચુસ્તપણે પાલન કરવા અને સોશિયલ મીડિયા પર ફેલાતી અફવાઓથી દૂર રહી સત્તાવાર માહિતી પર જ વિશ્વાસ રાખવા અનુરોધ કરવામાં આવ્યો છે.