નવી મુંબઈ : નવી મુંબઈની મેડિકોવર હોસ્પિટલના તબીબોએ તબીબી વિજ્ઞાનનું એક અદ્ભુત ઉદાહરણ પૂરું પાડતા વીસ અઠવાડિયાની ગર્ભવતી મહિલાના પિત્ત નળી (Bile Duct) માંથી અત્યંત જટિલ પ્રક્રિયા દ્વારા ૧૫ પત્થરો સફળતાપૂર્વક બહાર કાઢ્યા છે. ગર્ભાવસ્થા દરમિયાન એક્સ-રે રેડિયેશનનું જોખમ રહેલું હોવાથી ડોક્ટરોએ વિશેષ સાવચેતી રાખીને માત્ર ૧૫ મિનિટમાં જ આ જટિલ ERCP પ્રક્રિયા પાર પાડી હતી, જેના કારણે માતા અને બાળક બંનેનો જીવ બચી ગયો છે.

મૂળ ૨૭ વર્ષીય અને પહેલીવાર માતા બનનારી આ મહિલાને પેટમાં તીવ્ર દુખાવો, ઉલટી, તાવ અને કમળાની ગંભીર ફરિયાદ સાથે હોસ્પિટલમાં દાખલ કરવામાં આવ્યા હતા. મેડિકલ ગેસ્ટ્રોએન્ટેરોલોજિસ્ટ ડૉ. રાવસાહેબ રાઠોડના જણાવ્યા મુજબ, તપાસ દરમિયાન દર્દીના બ્લડ કાઉન્ટ અને લિવર ફંક્શનના રિપોર્ટ્સ અત્યંત ખરાબ આવ્યા હતા. MRCP સ્કેનમાં પિત્ત નળીમાં બહુવિધ પથરી હોવાની પુષ્ટિ થઈ હતી, જે જીવલેણ સેપ્સિસ અથવા લિવર ફેલ્યોરનું જોખમ ઊભું કરી રહી હતી. ગર્ભાવસ્થા દરમિયાન આ પ્રકારના કિસ્સાઓ દર ૧૨૦૦ માંથી ૧ માં જોવા મળે છે અને તેમાંથી ૫ થી ૧૦ ટકા દર્દીઓમાં જ ગંભીર ચેપ ફેલાય છે.

ગર્ભસ્થ બાળક પર રેડિયેશનની કોઈ જ દુષ્પ્રભાવ ન પડે તે માટે ડોક્ટરોએ અદ્યતન તકનીક અપનાવી હતી. પ્રક્રિયા દરમિયાન રક્ષણાત્મક લીડ કવચનો ઉપયોગ કરવામાં આવ્યો અને ઇમેજિંગને માત્ર એક જ નિયંત્રિત એક્સ-રે શોટ સુધી મર્યાદિત રાખવામાં આવ્યું. ૭ થી ૮ એમએમ કદના ૧૫ પથ્થરો દૂર કરીને નળીમાં સ્ટેન્ટ મૂકવામાં આવ્યા બાદ દર્દીને સંપૂર્ણ રાહત મળી હતી અને બે દિવસમાં જ રજા આપવામાં આવી હતી. ફોલો-અપ રિપોર્ટ્સમાં હવે માતા અને બાળક બંને સંપૂર્ણપણે સ્વસ્થ હોવાનું સામે આવ્યું છે.

આધુનિક તબીબી ટેક્નોલોજી અને કુશળ તબીબોના સમન્વયથી ગર્ભાવસ્થા દરમિયાન આવતી આવી જોખમી જટિલતાઓ સામે જીવ બચાવવાની શક્યતાઓ અનેકગણી વધી ગઈ છે.