લંડન : બ્રિટનના વડાપ્રધાન કીર સ્ટારમરની સરકાર અત્યારે તેના અત્યાર સુધીના સૌથી મોટા રાજકીય સંકટનો સામનો કરી રહી છે. યુકેના આરોગ્ય સચિવ વેસ સ્ટ્રીટિંગે ગુરુવારે પોતાના પદ પરથી રાજીનામું આપીને સમગ્ર દેશમાં ખળભળાટ મચાવી દીધો છે. સ્ટ્રીટિંગે વડાપ્રધાનને લખેલા લાંબા અને આકરા રાજીનામા પત્રમાં સ્પષ્ટપણે જણાવ્યું છે કે તેમણે સ્ટારમરના નેતૃત્વમાં સંપૂર્ણપણે "વિશ્વાસ ગુમાવ્યો" છે અને પદ પર ચાલુ રહેવું હવે તેમના માટે સિદ્ધાંતવિહીન ગણાશે.
 
‘જ્યાં દ્રષ્ટિ જોઈએ ત્યાં શૂન્યાવકાશ છે’
વેસ સ્ટ્રીટિંગે રાજીનામા પત્રમાં વડાપ્રધાન પર આકરા પ્રહારો કરતા લખ્યું છે કે, "જ્યાં આપણને દ્રષ્ટિની જરૂર છે, ત્યાં આજે શૂન્યાવકાશ છે. જ્યાં દિશાની જરૂર છે, ત્યાં માત્ર વલણો (Attitudes) છે." તેમણે ઇંગ્લેન્ડ, સ્કોટલેન્ડ અને વેલ્સમાં લેબર પાર્ટીની તાજેતરની કારમી હાર માટે વડાપ્રધાનની દિશાહીન નીતિઓને જવાબદાર ઠેરવી છે. સ્ટ્રીટિંગના મતે, નાઇજલ ફેરાજ અને ‘રિફોર્મ યુકે’ દ્વારા જે ‘ખતરનાક અંગ્રેજી રાષ્ટ્રવાદ’ ફેલાવવામાં આવી રહ્યો છે, તેની સામે સરકાર પાસે કોઈ મજબૂત ઉકેલ નથી.
 
એકસાથે અનેક મંત્રીઓના રાજીનામાથી સરકાર હચમચી
માત્ર વેસ સ્ટ્રીટિંગ જ નહીં, પરંતુ તેમની સાથે જુનિયર મંત્રીઓ મિયાટ્ટા ફહનબુલેહ, જેસ ફિલિપ્સ, એલેક્સ ડેવિસ-જોન્સ અને ઝુબીર અહેમદે પણ રાજીનામા ધરી દીધા છે. લેબર પાર્ટીએ તાજેતરની પ્રાદેશિક ચૂંટણીઓમાં ૪૫૦થી વધુ કાઉન્સિલ બેઠકો અને ૧૨ સ્થાનિક સત્તાવાળાઓ પરથી પોતાનું નિયંત્રણ ગુમાવ્યું છે. આ વિનાશક પ્રદર્શન બાદ લગભગ ૯૦ લેબર સાંસદો હવે એકઠા થયા છે અને વડાપ્રધાન પાસે તેમના પ્રસ્થાનનું સમયપત્રક માંગી રહ્યા છે.
 
નીતિ વિષયક ભૂલો અને ‘અજાણ્યા ટાપુ’ વાળું ભાષણ
સ્ટ્રીટિંગે રાજીનામા પત્રમાં સરકારની કેટલીક વિવાદાસ્પદ નીતિઓની પણ ટીકા કરી છે. શિયાળુ બળતણ ભથ્થામાં (Winter Fuel Allowance) કરવામાં આવેલો કાપ અને વડાપ્રધાનનું તાજેતરનું "અજાણ્યો ટાપુ" (Unknown Island) વાળું ભાષણ પક્ષના પતનમાં કારણભૂત હોવાનું તેમણે જણાવ્યું છે. તેમણે દાવો કર્યો કે પ્રગતિશીલ મતદારો હવે લેબર પાર્ટીથી છેડો ફાડી રહ્યા છે અને હવે એ સ્પષ્ટ થઈ ગયું છે કે કીર સ્ટારમર આગામી સામાન્ય ચૂંટણીમાં પાર્ટીનું નેતૃત્વ નહીં કરી શકે.
 
બ્રિટન સામે ભયાનક પડકારો
વિદાય લેતા આરોગ્ય સચિવે ચેતવણી આપી છે કે બ્રિટન હાલમાં યુરોપ અને મધ્ય પૂર્વમાં યુદ્ધો, ટેકનોલોજીકલ વિક્ષેપ અને લોકશાહીમાં ઘટતા વિશ્વાસ જેવા પ્રચંડ પડકારોનો સામનો કરી રહ્યું છે. આવા સમયે દેશને ‘બોલ્ડ વિઝન’ (મક્કમ દ્રષ્ટિ) ની જરૂર છે, જે હાલની સરકાર પાસે નથી. હવે જોવાનું એ રહેશે કે કીર સ્ટારમર પોતાની સરકાર બચાવવા કયા પગલાં ભરે છે કે પછી બ્રિટન ફરી એકવાર નેતૃત્વ પરિવર્તન તરફ આગળ વધશે.