શ્રીભૂમિ, આસામ તા.૩૦ : આસામના શ્રીભૂમિ જિલ્લામાં એક મંદિરના દાનપાત્ર પર ગાયનું કપાયેલું માથું મળી આવવાની ઘટના બાદ સમગ્ર વિસ્તારમાં સાંપ્રદાયિક તણાવ ફેલાઈ ગયો છે. શુક્રવારે સવારે જ્યારે મંદિરના પૂજારી પૂજા માટે પહોંચ્યા ત્યારે દાનપાત્ર પર ગાયનું માથું જોઈને સ્તબ્ધ થઈ ગયા. સમાચાર ફેલાતા જ મોટી સંખ્યામાં સ્થાનિક લોકો અને હિન્દુ સંગઠનોના કાર્યકરો મંદિર પરિસરમાં એકઠા થઈ ગયા અને ઉગ્ર પ્રદર્શન શરૂ કરી દીધું.

શ્રીભૂમિ સદર પોલીસ સ્ટેશન વિસ્તારના એક પ્રાચીન મંદિરમાં શુક્રવારે સવારે લગભગ 5:30 વાગ્યે પૂજારીએ જોયું કે મંદિરના દાનપાત્ર પર ગાયનું કપાયેલું માથું મૂકવામાં આવ્યું છે. ત્યારબાદ તેમણે તરત જ મંદિર સમિતિ અને સ્થાનિક લોકોને જાણ કરી. થોડી જ વારમાં આ સમાચાર સમગ્ર વિસ્તારમાં આગની જેમ ફેલાઈ ગયા. ગુસ્સે ભરાયેલા લોકોએ બજાર બંધ કરાવીને મુખ્ય માર્ગ પર ચક્કાજામ કરી દીધો અને આરોપીઓની તાત્કાલિક ધરપકડની માંગ કરવા લાગ્યા

ઘટનાની જાણ થતા જ શ્રીભૂમિના SP, ADM અને મોટી સંખ્યામાં પોલીસ કાફલો ઘટનાસ્થળે પહોંચ્યો. પોલીસે લોકોને સમજાવીને શાંત પાડ્યા અને મંદિર પરિસરને સીલ કરી દીધું. FSLની ટીમને બોલાવીને પુરાવા એકઠા કરવામાં આવ્યા છે. પોલીસે અજાણ્યા આરોપીઓ વિરુદ્ધ IPCની કલમ 153A, 295A અને પશુ ક્રૂરતા નિવારણ અધિનિયમ હેઠળ ગુનો નોંધી લીધો છે

શ્રીભૂમિના પોલીસ અધિક્ષકે મીડિયા સાથે વાત કરતા જણાવ્યું કે, "આ એક સુનિયોજિત કાવતરું લાગી રહ્યું છે જેનો હેતુ વિસ્તારમાં સાંપ્રદાયિક સૌહાર્દ બગાડવાનો છે. અમે તમામ CCTV ફૂટેજ તપાસી રહ્યા છીએ અને ટૂંક સમયમાં આરોપીઓની ધરપકડ કરી લેવામાં આવશે. લોકોને અપીલ છે કે તેઓ શાંતિ જાળવી રાખે અને કોઈપણ પ્રકારની અફવા પર ધ્યાન ન આપે.

ઘટના બાદ શ્રીભૂમિ જિલ્લામાં તણાવનો માહોલ છે. સાવચેતીના ભાગરૂપે સમગ્ર વિસ્તારમાં વધારાનો પોલીસ કાફલો તૈનાત કરી દેવામાં આવ્યો છે. મંદિર અને આસપાસના સંવેદનશીલ વિસ્તારોમાં પોલીસની પેટ્રોલિંગ વધારી દેવામાં આવી છે. વહીવટી તંત્રે સોશિયલ મીડિયા પર નજર રાખવા માટે પણ એક ખાસ ટીમની રચના કરી છે જેથી કોઈ ભડકાઉ પોસ્ટ વાયરલ ન થાય.

હિન્દુ સંગઠનોએ ચીમકી ઉચ્ચારી છે કે જો 48 કલાકની અંદર આરોપીઓની ધરપકડ નહીં થાય તો તેઓ જિલ્લા વ્યાપી બંધનું એલાન આપશે.