​નવી દિલ્હી: ​આજના ડિજિટલ યુગમાં સોશિયલ મીડિયા પર અવનવા કિસ્સાઓ વાયરલ થતા હોય છે, પરંતુ તાજેતરમાં ‘રેડિટ’ (Reddit) નામના સોશિયલ પ્લેટફોર્મ પર એક ભારતીય યુવકે શેર કરેલી આપવીતીએ ઇન્ટરનેટ પર ભારે ચર્ચા જગાવી છે. આદર્શ અને સજ્જન પ્રેમી એટલે કે ‘ગ્રીન ફ્લેગ’ (Green Flag) સાબિત થવાની લ્હાયમાં એક યુવકે પોતાની બે-બે ગર્લફ્રેન્ડ્સ પાછળ અંદાજે રૂ. ૬ લાખનો ધૂમાડો કરી નાખ્યો. જોકે, અંતે આ સંબંધનો એવો ભયાનક અંત આવ્યો કે યુવકને માત્ર બ્રેકઅપ જ ન મળ્યું, પરંતુ તેની કિંમતી કારમાં પણ તોડફોડ થઈ ગઈ.

​સોશિયલ મીડિયા પર પોતાના દુઃખની કથા સંભળાવતા યુવકે લખ્યું હતું કે, તે એકસાથે બે યુવતીઓ – આયેશા અને શ્રેયા સાથે પ્રેમસંબંધ ધરાવતો હતો. તે બંનેને ખૂબ જ શાહી અંદાજમાં રાખતો હતો, મોંઘી રેસ્ટોરન્ટ્સમાં ડેટ્સ પર લઈ જતો, મોંઘા મેકઅપ સાધનો આપતો અને મોંઘી ભેટ-સોગાદો આપતો હતો. આખા કોલેજ કેમ્પસને તેની આ ‘ડબલ ડેટિંગ’ વિશે ખબર હતી, તેથી તેને એવું જ લાગતું હતું કે બંને ગર્લફ્રેન્ડ્સ પણ આ બાબતથી વાકેફ છે અને તેમને આ ગોઠવણ સામે કોઈ વાંધો નથી.

​વિવાદની શરૂઆત ત્યારે થઈ જ્યારે આયેશાના જન્મદિવસ પર યુવકે તેને ‘કોચ’ (Coach) બ્રાન્ડની અત્યંત મોંઘી હેન્ડબેગ અને ‘રોડ’ (Rhode) લિપ બામ ભેટમાં આપ્યા. બીજા દિવસે જ્યારે આયેશા કોલેજમાં આ ગિફ્ટ બતાવીને પોતાના પ્રેમીને ‘ગ્રીન ફ્લેગ’ કહીને વખાણ કરી રહી હતી, ત્યારે બીજી ગર્લફ્રેન્ડ શ્રેયા ગુસ્સાથી લાલચોળ થઈ ગઈ. ગુસ્સાના આવેશમાં શ્રેયાએ કોલેજના કેફેટેરિયામાં બધાની સામે જ એ મોંઘી બેગ ફાડી નાખી અને લિપ બામ એક અજાણ્યા વ્યક્તિની થાળીમાં ઢોળી દીધું.

​હંગામો અહીં જ ન અટક્યો, ત્યારબાદ બંને યુવતીઓએ ભેગા મળીને યુવકની કારમાં તોડફોડ કરી અને કારના બોનેટ પર અપશબ્દો પણ લખી નાખ્યા. આ ઘટનાથી ભાંગી પડેલા યુવકે પોતાની પોસ્ટમાં લખ્યું છે કે, "કૃપા કરીને બોલિવૂડની ફિલ્મો કે રોમાન્સ પર વિશ્વાસ ન કરો, તે તમારી જિંદગી અને કાર બંને બરબાદ કરી શકે છે." તેણે એવો પણ ઉલ્લેખ કર્યો કે ભૂતકાળમાં તેની ગર્લફ્રેન્ડે તેને એક એવી ફિલ્મ બતાવી હતી જેમાં બે યુવતીઓ એક જ છોકરાને પસંદ કરતી હોવા છતાં મિત્ર બનીને રહે છે, પરંતુ વાસ્તવિક જીવનમાં આવી કોઈ પરિપક્વતા જોવા મળી નથી.

​આ પોસ્ટ વાયરલ થતાં જ નેટીઝન્સે યુવકને જ આડેહાથ લીધો હતો. લોકોએ કોમેન્ટ્સ કરીને જણાવ્યું હતું કે, એકસાથે બે યુવતીઓને ડેટ કરવી એ કોઈ સીરિયસ રિલેશનશિપ કે ‘ગ્રીન ફ્લેગ’ ન કહેવાય, પરંતુ એ સંપૂર્ણપણે ‘રેડ ફ્લેગ’ જ છે. કેટલાકે એવું પણ લખ્યું કે પત્ની ન હોય તેવી યુવતીઓ પાછળ ૬ લાખ રૂપિયા ઉડાવવા એ મૂર્ખામી છે. આ વાયરલ કિસ્સાએ હાલમાં સોશિયલ મીડિયા પર આજના યુવાનોના રિલેશનશિપ ટ્રેન્ડ અને ભ્રમણાઓ અંગે એક નવી ચર્ચા જગાવી દીધી છે.