જેરુસલેમ : ઇઝરાયલે સ્પષ્ટ કર્યું છે કે લેબેનોનના આતંકી સંગઠન હિઝબુલ્લાહ દ્વારા હથિયાર હેઠા ન મુકાય ત્યાં સુધી સૈન્ય પાછી પાની કરશે નહીં. ઇઝરાયલના વરિષ્ઠ મંત્રી બેઝલેલ સ્મોટ્રિચે એક ઈન્ટરવ્યુમાં દાવો કર્યો છે કે, સરહદની સુરક્ષા માટે કાયમી સૈન્ય માળખું અનિવાર્ય છે. વર્તમાન સરહદી વ્યવસ્થા અપૂરતી હોવાનું જણાવી તેમણે ઇઝરાયલના મક્કમ વલણને વડાપ્રધાન નેતન્યાહુ અને સંરક્ષણ મંત્રીનું પણ સમર્થન હોવાનો ઉલ્લેખ કર્યો છે.

બીજી તરફ, મધ્ય પૂર્વમાં છવાયેલા યુદ્ધના વાદળોને દૂર કરવા માટે સ્વિટ્ઝર્લૅન્ડના 'બર્ગનસ્ટોક રિસોર્ટ' ખાતે અમેરિકા અને ઈરાન વચ્ચે હાઈ-લેવલ વાટાઘાટો શરૂ થઈ રહી છે. અમેરિકાના ઉપરાષ્ટ્રપતિ જેડી વેન્સ અને ઈરાની પ્રતિનિધિમંડળ યુદ્ધવિરામ અને સમજૂતીના પાસાઓ પર ગહન ચર્ચા કરશે. આ ઐતિહાસિક બેઠકનું આયોજન વિશ્વના ધ્યાનનું કેન્દ્ર બન્યું છે, કારણ કે આ વાટાઘાટો જ ક્ષેત્રમાં સ્થિરતા લાવશે કે સંઘર્ષને વધુ વેગ આપશે તે નક્કી કરશે.

આ વાર્તા શરૂ થાય તે પહેલા જ ઇરાને હોર્મુઝ સ્ટ્રેટ બંધ કરવાની ધમકી આપી વૈશ્વિક તણાવ વધાર્યો છે. સાથે જ લેબેનોન સરહદે હિઝબુલ્લાહ અને ઇઝરાયલ વચ્ચે છૂટાછવાયા હુમલાઓ સતત ચાલુ છે, જે રાજદ્વારી વાતાવરણને અત્યંત ગંભીર બનાવે છે. આવી વિકટ સ્થિતિમાં અમેરિકા પણ ઈઝરાયલની સુરક્ષા સંબંધિત 'રેડ લાઈન્સ' ને સમજી રહ્યું હોવાના સંકેતો મળી રહ્યા છે, જે આગામી સમયમાં કોઈ મોટા નીતિગત ફેરફાર તરફ નિર્દેશ કરે છે.

આ ઘટનાક્રમ પશ્ચિમ એશિયાના ભૌગોલિક રાજકીય સમીકરણો માટે ગેમ-ચેન્જર સાબિત થઈ શકે છે. જો સ્વિટ્ઝર્લૅન્ડમાં યોજાનારી આ બેઠક સફળ રહેશે, તો યુદ્ધવિરામનો માર્ગ મોકળો થશે, પરંતુ જો બંને પક્ષો પોતાની જીદ પર અડગ રહેશે તો ભયંકર યુદ્ધ ફાટી નીકળવાની પૂરી શક્યતા છે. વિશ્વના તમામ દેશો આશા રાખી રહ્યા છે કે રાજદ્વારી સ્તરે લેવાયેલા આ નિર્ણયો ભવિષ્યમાં શાંતિના નવા દ્વાર ખોલશે.