જેરુસલેમ: ગાઝા પટ્ટીમાં અમેરિકાની મધ્યસ્થતાથી લાગુ કરાયેલા દેખીતા યુદ્ધવિરામ વચ્ચે પણ ઇઝરાયલે આતંકવાદ વિરુદ્ધ અત્યાર સુધીનો સૌથી મોટો અને ઘાતક પ્રહાર કર્યો છે. ગાઝા શહેરમાં ઇઝરાયલી વાયુસેના દ્વારા કરવામાં આવેલા એક અત્યંત ગુપ્ત અને પ્રચંડ ઓપરેશનમાં હમાસના સૌથી વરિષ્ઠ સૈન્ય નેતા અને ઇઝ અલ-દીન અલ-કાસમ બ્રિગેડના વડા ઇઝ અલ-દિન અલ-હદ્દાદને મોતને ઘાટ ઉતારી દેવામાં આવ્યો છે. ઇઝરાયલ સંરક્ષણ દળો (IDF) અને ઇઝરાયલી સુરક્ષા એજન્સીએ એક સંયુક્ત સત્તાવાર નિવેદન જારી કરીને આ મસમોટી સફળતાની જાહેરાત કરી છે.
ઇઝરાયલી સૈન્યના જણાવ્યા અનુસાર, ઇન્ટેલિજન્સ ઇનપુટ્સના આધારે અલ-હદ્દાદને એક "ચોક્કસ હુમલા" (Precision Strike) માં નિશાન બનાવવામાં આવ્યો હતો. ગાઝાની કટોકટી સેવાઓના અહેવાલ મુજબ, શુક્રવારે બપોરે ઇઝરાયલી ફાઇટર જેટ્સે ગાઝા શહેર નજીકના અલ-રિમલ વિસ્તારમાં એક રહેણાંક મકાન પર બોમ્બમારો કર્યો હતો અને ત્યારબાદ તુરંત જ નજીકની શેરીમાંથી પસાર થઈ રહેલી એક શંકાસ્પદ કારને મિસાઇલ વડે ફૂંકી મારી હતી. આ બેવડા હુમલામાં અલ-હદ્દાદ સહિત ઓછામાં ઓછા સાત લોકો માર્યા ગયા છે અને 50 થી વધુ લોકો ઘાયલ થયા છે, જેમને સારવાર અર્થે અલ-શિફા હોસ્પિટલમાં ખસેડાયા છે.
હમાસમાં 'અલ-કાસમનો ભૂત' તરીકે ઓળખાતો હતો અલ-હદ્દાદ
આતંકવાદી સંગઠન હમાસમાં અત્યંત લો-પ્રોફાઇલ રહેવા અને ક્યારેય કેમેરા સામે ન આવવાની ટેવને કારણે અલ-હદ્દાદને સંગઠનમાં "અલ-કાસમનો ભૂત" (Ghost of Al-Qassam) તરીકે ઓળખવામાં આવતો હતો. ઇઝરાયલે અગાઉ હમાસના ટોચના ક્રૂર નેતાઓ યાહ્યા સિનવાર, તેના ભાઈ મોહમ્મદ સિનવાર અને લશ્કરી વડા મોહમ્મદ દેઇફનો સફાયો કર્યો હતો. આ તમામ કમાન્ડરોના મોત બાદ અલ-હદ્દાદ જ હમાસની સૈન્ય પાંખનો મુખ્ય વડો અને આતંકવાદી જૂથનો સૌથી મોટો નિર્ણય લેનારો આકા બચ્યો હતો, જેને હવે ઇઝરાયલે શોધીને ખતમ કરી દીધો છે.
7 ઓક્ટોબરના હત્યાકાંડ અને બંધકોને છુપાવવાનો મુખ્ય ગુનેગાર
ઇઝરાયલી સેનાએ જણાવ્યું હતું કે 7 ઓક્ટોબર, 2023 ના રોજ ઇઝરાયલની ધરતી પર થયેલા ભયાનક આતંકી હુમલા અને સેંકડો નિર્દોષ નાગરિકોને ગાઝાની ટનલોમાં બંધક બનાવી રાખવા પાછળ અલ-હદ્દાદ મુખ્ય સૂત્રધાર અને સ્થળ-કમાન્ડર હતો. આ ઉપરાંત, અમેરિકી રાષ્ટ્રપતિ ડોનાલ્ડ ટ્રમ્પ દ્વારા ગાઝા પટ્ટીના બિનલશ્કરીકરણ (Disarmament) અને હમાસને સંપૂર્ણપણે નિઃશસ્ત્ર કરવાના શાંતિ કરારનો અમલ કરવાનો પણ તેણે સ્પષ્ટ ઇનકાર કર્યો હતો. આ સફળ ઓપરેશન બાદ IDF ના ચીફ ઓફ સ્ટાફ લેફ્ટનન્ટ જનરલ એયાલ ઝમીરે પ્રચંડ હુંકાર કરતા જણાવ્યું કે:
"આપણા દુશ્મનો દુનિયાના ગમે તે ખૂણે છુપાયા હશે, અમે તેમનો પીછો કરવાનું ચાલુ રાખીશું. તેમના પર હુમલાઓ કરીને 7 ઓક્ટોબરના નરસંહારમાં ભાગ લેનારા અને દેશની સુરક્ષા સામે ખતરો બનનારા દરેક આતંકીને સજા આપીને જ દમ લઈશું."
હમાસે કરી મૃત્યુની પુષ્ટિ, ગાઝાની શેરીઓમાં શોકનો માહોલ
બીજી તરફ, હમાસના સત્તાવાર પ્રવક્તા હાઝેમ કાસેમે શનિવારે અલ-હદ્દાદના મોતના અહેવાલોને સમર્થન આપતા તેને પેલેસ્ટિનિયન લોકોનો "મહાન લડવૈયા" ગણાવ્યો હતો. સોશિયલ મીડિયા પર વાયરલ થયેલા ફૂટેજમાં ગાઝાની શેરીઓમાં હજારોની ભીડ વચ્ચે અલ-હદ્દાદના શબપેટીને લઈ જવામાં આવતું જોઈ શકાય છે, જ્યાં ભીડમાં સામેલ લોકો 'અબુ સુહૈબ' (અલ-હદ્દાદનું સ્થાનિક નામ) ના નારા લગાવી ઇઝરાયલ સામે જંગ ચાલુ રાખવાની કસમ ખાઈ રહ્યા હતા.
યુદ્ધવિરામ છતાં ગાઝામાં લોહિયાળ સંઘર્ષ યથાવત
અમેરિકાની મધ્યસ્થતાથી ઓક્ટોબરના મધ્યમાં યુદ્ધવિરામ અમલમાં આવ્યો હોવા છતાં, ગાઝામાં હજુ પણ લોહિયાળ સ્થિતિ યથાવત છે. પેલેસ્ટિનિયન આરોગ્ય મંત્રાલયના જણાવ્યા અનુસાર, યુદ્ધવિરામ બાદ પણ ઇઝરાયલી હુમલાઓમાં ગાઝામાં 850 થી વધુ લોકોએ જીવ ગુમાવ્યા છે. સંયુક્ત રાષ્ટ્ર (UN) ના પૂર્વ વિશેષ સંયોજક નિકોલે મ્લાડેનોવે જણાવ્યું હતું કે જ્યાં સુધી હમાસ ગાઝાના શાસનમાંથી સંપૂર્ણપણે પાછું નહીં હટે અને પોતાના ઘાતક હથિયારો હેઠા નહીં મૂકે, ત્યાં સુધી આ વિસ્તારમાં કાયમી શાંતિ સ્થાપવી અશક્ય છે.