વિશાખાપટ્ટનમ : કેન્દ્રીય વાણિજ્ય અને ઉદ્યોગ પ્રધાન પિયુષ ગોયલે ગુરુવારે વિશાખાપટ્ટનમ ખાતે યોજાયેલા ૩૧મા ભારતીય ઉદ્યોગ સંઘ (સીઆઈઆઈ) ભાગીદારી સમિટને સંબોધતા ભારતને વૈશ્વિક સ્તરે રોકાણ માટે સૌથી સુરક્ષિત અને વિશ્વાસપાત્ર સ્થળ તરીકે પ્રસ્તુત કર્યું છે.

પ્રાપ્ત વિગતો અનુસાર, મંત્રીએ આંતરરાષ્ટ્રીય વ્યાપાર ભાગીદારીમાં વિશ્વાસના મહત્વને સમજાવવા માટે લોકપ્રિય ફિલ્મ બાહુબલીના પાત્ર 'કટપ્પા'નો ઉલ્લેખ કરતા જણાવ્યું હતું કે આજની અસ્થિર દુનિયામાં ભારત એવો ભાગીદાર છે જે ક્યારેય પીઠમાં છરો નહીં ભોંકે.

વૈશ્વિક સ્તરે પ્રવર્તતા ભૌગોલિક રાજકીય તણાવ અને આર્થિક અનિશ્ચિતતા વચ્ચે ભારત તેની અનુમાનિત નીતિઓ, મજબૂત કાનૂની માળખા અને સ્પર્ધાત્મક સંચાલન ખર્ચને કારણે વિદેશી રોકાણકારોની ટેકનોલોજીનું સંપૂર્ણ રક્ષણ કરશે તેમ તેમણે ઉમેર્યું હતું.

આંતરરાષ્ટ્રીય બજારમાં વિશ્વાસને સૌથી મોટું અને દુર્લભ સંસાધન ગણાવતા પિયુષ ગોયલે જણાવ્યું કે હવે રોકાણકારો માત્ર ખર્ચના ફાયદા નહીં પરંતુ પોતાના ભાગીદારની વિશ્વસનીયતાનું પણ ઊંડાણપૂર્વક મૂલ્યાંકન કરે છે.

ભારતની આર્થિક ઉપલબ્ધિઓ વિશે વાત કરતા તેમણે જણાવ્યું કે દેશે છેલ્લા ચાર વર્ષમાં આશરે ૬૦ ટ્રિલિયન ડોલરના સંયુક્ત જીડીપી ધરાવતા અર્થતંત્રો સાથે કુલ નવ મુક્ત વેપાર કરારો કર્યા છે અને આગામી સમયમાં આ વ્યાપ વધુ વિસ્તરશે.

અંતમાં મંત્રીએ વૈશ્વિક કંપનીઓને ભારતમાં ઉત્પાદન એકમો, રિસર્ચ એન્ડ ડેવલપમેન્ટ સેન્ટર્સ તેમજ હોટેલ્સ અને ડેટા સેન્ટર્સ જેવા ક્ષેત્રોમાં મોટાપાયે રોકાણ કરવા માટે હાર્દિક નિમંત્રણ પાઠવ્યું હતું.