વોશિંગ્ટન, તા.૩૦: અમેરિકાના પ્રખ્યાત ભારતીય-અમેરિકન કોંગ્રેસમેન (સાંસદ) રો ખન્નાએ રાષ્ટ્રપતિ ડોનાલ્ડ ટ્રમ્પ અને તેમની વિદેશ નીતિઓ પર અત્યાર સુધીનો સૌથી મોટો રાજકીય હુમલો કર્યો છે. ‘યુએસ-ઇન્ડિયા સ્ટ્રેટેજિક પાર્ટનરશિપ ફોરમ લીડરશીપ સમિટ’ માં બોલતા આ ડેમોક્રેટિક નેતાએ દાવો કર્યો છે કે ટ્રમ્પની અત્યંત વિનાશક નીતિઓએ ભારત અને અમેરિકા વચ્ચેના ઐતિહાસિક અને મજબૂત સંબંધોને છેલ્લા ૩૦ વર્ષમાં સૌથી નીચા સ્તરે ધકેલી દીધા છે. તેમણે પડકાર ફેંકતા કહ્યું કે, જે કોઈને પણ તેમના આ નિવેદન પર શંકા હોય તે સીધા ભારતના વિદેશ પ્રધાન એસ. જયશંકરને પૂછી શકે છે.

ચીનમાં ભારતીય રાજદૂતે પણ ચિંતા વ્યક્ત કરી હતી!

પોતાના સંબોધનમાં રો ખન્નાએ એક મોટો ખુલાસો કરતા જણાવ્યું કે, "હું વાતોને ગોળ-ગોળ ફેરવવામાં માનતો નથી, જે વાસ્તવિકતા છે તે જ કહી રહ્યો છું. મારી તાજેતરની ચીન મુલાકાત દરમિયાન ત્યાં હાજર ભારતીય રાજદૂતે પણ મારી સાથે વાતચીતમાં સ્વીકાર્યું હતું કે રાષ્ટ્રપતિ ટ્રમ્પની અણધારી નીતિઓના કારણે બંને લોકશાહી દેશો વચ્ચેનો પરસ્પર વિશ્વાસ ખૂબ જ ઓછો થયો છે." તેમણે ઉમેર્યું કે જો આપણે વર્તમાન રાષ્ટ્રપતિ દ્વારા સંબંધોને થયેલા નુકસાન વિશે ખુલીને સત્ય નહીં કહીએ, તો તે વાસ્તવિકતા પ્રત્યે આંખ આડા કાન કરવા બરાબર ગણાશે.

ઈરાન સાથેનો વિવાદ અને ભારતમાં મોંઘવારીનો માર

ટ્રમ્પની નીતિઓને આર્થિક રીતે વિનાશક ગણાવતા અમેરિકી સાંસદે કહ્યું કે, ઈરાન સાથે યુદ્ધ અને તણાવની સ્થિતિ ઊભી કરવાની ટ્રમ્પની જીદને કારણે વૈશ્વિક સ્તરે ક્રૂડ ઓઈલની બજાર પ્રભાવિત થઈ છે.

આ નીતિઓની સીધી પ્રતિકૂળ અસર ભારતના સામાન્ય નાગરિકો પર પડી છે, જેના કારણે ત્યાં પેટ્રોલ, ડીઝલ અને ગેસના ભાવ આસમાને પહોંચી ગયા છે. જો આ વાત ખોટી લાગતી હોય, તો ભારતના વિદેશ મંત્રી એસ. જયશંકરને પૂછી જુઓ, તેઓ પણ આ હકીકત સારી રીતે જાણે છે.

"અમેરિકા પોતાનો નૈતિક માર્ગ ગુમાવી ચૂક્યું છે"

રો ખન્નાએ માત્ર ભારત જ નહીં, પરંતુ ક્યુબાને ધમકી આપવાની અને ગ્રીનલેન્ડને અમેરિકામાં ભેળવી દેવાની ટ્રમ્પની નીતિઓની પણ આકરી આલોચના કરી હતી. તેમણે કહ્યું કે અમેરિકા હવે વૈશ્વિક મંચ પર પોતાનો નૈતિક અધિકાર ગુમાવી ચૂક્યું છે અને તેની વિદેશ નીતિ માત્ર ‘જેની લાકડી તેની ભેંસ’ (શક્તિ જ સર્વોપરી છે) જેવી બની ગઈ છે.

AI અને પ્રતિભાઓને દૂર ધકેલવાનો ગંભીર આક્ષેપ

આર્ટિફિશિયલ ઇન્ટેલિજન્સ (AI) ના ક્ષેત્રે અમેરિકાના નેતૃત્વ પર સવાલ ઉઠાવતા ડેમોક્રેટિક નેતાએ જણાવ્યું કે, ટ્રમ્પ ભલે ગમે તેવા દાવા કરે પરંતુ વાસ્તવિકતા એ છે કે દુનિયાના ટોચના ૩૮ ટકા AI સંશોધકો ચીની મૂળના છે. રાષ્ટ્રપતિ એ સમજવામાં સંપૂર્ણ નિષ્ફળ રહ્યા છે કે અમેરિકાની તાકાત વિશ્વભરની પ્રતિભાઓને આકર્ષવામાં છે, તેમને પોતાના દેશમાંથી દૂર ધકેલવામાં નથી. ટ્રમ્પને એક "બિનઅસરકારક" રાષ્ટ્રપતિ ગણાવીને તેમણે દાવો કર્યો હતો કે આગામી મધ્યસત્ર ચૂંટણીઓ અને ૨૦૨૮ ની રાષ્ટ્રપતિ ચૂંટણીમાં ડેમોક્રેટિક પાર્ટી ભવ્ય વિજય મેળવીને સત્તા પર વાપસી કરશે.