કોલકાતા : પશ્ચિમ બંગાળ વિધાનસભા ચૂંટણી ૨૦૨૬ના પ્રથમ તબક્કાના મતદાન બાદ રાજકીય પારો સાતમા આસમાને પહોંચ્યો છે. આસામના મુખ્યમંત્રી અને ભાજપના ફાયરબ્રાન્ડ નેતા હિમંતા બિસ્વા શર્માએ બંગાળમાં ચૂંટણી પ્રચાર દરમિયાન મમતા બેનર્જીની સરકાર પર આકરા પ્રહારો કર્યા છે. કોલકાતામાં પત્રકારો સાથે વાતચીત કરતા હિમંતાએ એક મોટો પડકાર ફેંકતા કહ્યું કે, જો આસામના કોઈ પણ ડિટેન્શન કેમ્પમાં એક પણ બંગાળી હિન્દુ હોવાનું સાબિત થાય, તો તેઓ મુખ્યમંત્રી પદેથી તાત્કાલિક રાજીનામું આપી દેશે.

તૃણમૂલ કોંગ્રેસ (TMC) દ્વારા વારંવાર કરવામાં આવતા આક્ષેપોનો જવાબ આપતા હિમંતાએ સ્પષ્ટ કર્યું કે, આસામમાં બંગાળી હિન્દુઓને કોઈ પણ પ્રકારની પરેશાની નથી. તેમણે કહ્યું, "TMC ના નેતાઓ જુઠ્ઠાણું ફેલાવી રહ્યા છે. હું જવાબદારી સાથે કહું છું કે આસામના ડિટેન્શન કેમ્પમાં એક પણ બંગાળી હિન્દુ નથી. વિરોધ પક્ષો માત્ર ડરનો માહોલ ઉભો કરીને મત મેળવવા માંગે છે." હિમંતાએ પ્રથમ તબક્કાના ૯૩% જેટલા ઐતિહાસિક મતદાન બદલ ચૂંટણી પંચની પ્રશંસા પણ કરી હતી.

ઘૂસણખોરી અને ડેમોગ્રાફી પર ગંભીર ચિંતા:

હિમંતા બિસ્વા શર્માએ બાંગ્લાદેશી ઘૂસણખોરીના મુદ્દે પશ્ચિમ બંગાળ અને આખા દેશને ચેતવ્યા હતા. તેમણે કહ્યું કે, ઘૂસણખોરી માત્ર બંગાળની નહીં પણ સમગ્ર ભારતની વસ્તીનું માળખું બદલી નાખશે. તેમણે ગંભીર આરોપ લગાવ્યો કે, "જ્યારે કોઈ વિસ્તારમાં ઘૂસણખોરોની સંખ્યા ૫૦% થી વધી જાય છે, ત્યારે ત્યાં શરિયા કાયદાની માંગણીઓ શરૂ થઈ જાય છે. દેશની ધર્મનિરપેક્ષતા ત્યાં સુધી જ સુરક્ષિત છે જ્યાં સુધી વસ્તીનું સંતુલન જળવાયેલું છે."

૧૯૪૮ના કાયદાનો અમલ કરવાની હિમાયત:

આસામના મુખ્યમંત્રીએ સૂચન આપ્યું કે, આસામની જેમ પશ્ચિમ બંગાળ સહિતના અન્ય રાજ્યોમાં પણ 'ગેરકાયદેસર સ્થળાંતર કરનારાઓને દૂર કરવાનો કાયદો (૧૯૪૮)' લાગુ થવો જોઈએ. આ કાયદો ડેપ્યુટી કમિશનરને ૪૮ કલાકમાં ઘૂસણખોરોને હાંકી કાઢવાની સત્તા આપે છે. હિમંતાએ ઉમેર્યું કે ભાજપ કોઈ સાંપ્રદાયિકતા ફેલાવી રહ્યું નથી, પરંતુ ગીતા અને ભાગવતની ધરતી પર લોકશાહી અને વસ્તીનું માળખું સુરક્ષિત રહે તે માટે લડી રહ્યું છે. પશ્ચિમ બંગાળની આ ચૂંટણી માત્ર સત્તા મેળવવા માટે નહીં, પણ દેશની સુરક્ષા અને અસ્મિતા માટે નિર્ણાયક સાબિત થશે તેવું તેમણે ભારપૂર્વક જણાવ્યું હતું.