ચંદીગઢ : પંજાબમાં આમ આદમી પાર્ટી (AAP) ના પ્રદેશ સંયુક્ત સચિવ અને જિલ્લા પરિષદ સભ્ય અમરિંદર સિંહ મંડોફલ સાથે એક મહિલાએ પોતાને પંજાબ સિવિલ સર્વિસ (PCS) અધિકારી તરીકે ઓળખાવી, છેતરપિંડી આચરી લગ્ન કર્યા બાદ ઘરના કિંમતી ઘરેણાં અને રોકડ રકમ લઈને ફરાર થઈ જવાનો સનસનાટીભર્યો કિસ્સો પ્રકાશમાં આવ્યો છે. આપ નેતા અમરિંદર સિંહે પોલીસમાં નોંધાવેલી ફરિયાદ મુજબ, મનવિંદર કૌર નામની મહિલા અને તેના પરિવારે ફેબ્રુઆરી ૨૦૨૬ માં તેને પોતાની ખોટી ઓળખ આપીને લગ્નની જાળમાં ફસાવ્યો હતો. લગ્નના થોડા જ મહિનાઓમાં મહિલા સોના-ચાંદીના દાગીના અને કિંમતી સામાન લઈને ગાયબ થઈ ગઈ હતી.

પીડિત નેતા અમરિંદર સિંહ મંડોફલે પોલીસ સમક્ષ દાવો કર્યો છે કે આરોપી મહિલા મનવિંદર કૌર અને તેના સગા-સંબંધીઓએ તેને કુંવારી અને ઉચ્ચ સરકારી અધિકારી તરીકે રજૂ કરી હતી. જોકે, લગ્ન પછી જ્યારે તેમણે મહિલાની પૃષ્ઠભૂમિ અંગે ખાનગી તપાસ કરી ત્યારે જાણવા મળ્યું કે તે અગાઉથી પરિણીત હતી અને તેના પ્રથમ પતિથી છૂટાછેડા થઈ ચૂક્યા હતા. આટલું જ નહીં, આરોપી મહિલાને ૧૮ વર્ષનો પુત્ર હોવાની વાત પણ લગ્ન સમયે છુપાવવામાં આવી હતી અને તેની સાચી ઉંમર અંગે પણ ગેરમાર્ગે દોરવામાં આવ્યા હતા.

આ હાઇ-પ્રોફાઇલ લગ્ન સમારોહ ફેબ્રુઆરી ૨૦૨૬માં યોજાયો હતો, જેમાં રાજ્યના અનેક દિગ્ગજ રાજકીય નેતાઓ ઉપસ્થિત રહ્યા હતા. પંજાબ વિધાનસભાના સ્પીકર કુલતાર સિંહ સંધવાન અને કેબિનેટ મંત્રી તરુણપ્રીત સિંહ સૌંધ સહિત આમ આદમી પાર્ટીના અનેક ચૂંટાયેલા જનપ્રતિનિધિઓ અને વરિષ્ઠ હોદ્દેદારોએ આ વિવાહ સમારોહમાં હાજરી આપીને નવદંપતીને આશીર્વાદ આપ્યા હતા. લગ્ન દરમિયાન રાજકીય અગ્રણીઓ ભાંગડા કરતા અને ઉજવણીમાં ભાગ લેતા હોવાના વીડિયો અને ફોટોગ્રાફ્સ પણ સામે આવ્યા હતા, જેના કારણે આ મામલો સમગ્ર રાજ્યમાં ભારે ચર્ચાસ્પદ બન્યો છે.

પીડિત આપ નેતાની લેખિત ફરિયાદના આધારે પોલીસે તાત્કાલિક કાર્યવાહી કરીને મુખ્ય આરોપી મનવિંદર કૌર સહિત છ લોકો સામે છેતરપિંડી, બનાવટી દસ્તાવેજો ઊભા કરવા અને ગેરમાર્ગે દોરવા બદલ ભારતીય ન્યાય સંહિતાની વિવિધ કલમો હેઠળ એફઆઈઆર (FIR) નોંધાઈ છે. કેસમાં નામ જોગ દર્શાવવામાં આવેલા અન્ય આરોપીઓમાં મહિલાનો ભાઈ તરલોચન સિંહ, માતા વરિન્દરજીત કૌર, પિતરાઈ ભાઈ નરિન્દર સિંહ ગોલ્ડી, ભાભી રૂપિન્દર કૌર અને ગામના પૂર્વ સરપંચ સુરિન્દર સિંહ રાણાનો સમાવેશ થાય છે.

પોલીસના જણાવ્યા અનુસાર, આ કેસમાં નામજદ થયેલા તમામ આરોપીઓ તરનતારન જિલ્લાના ભીખીવિંડ પોલીસ સ્ટેશન હેઠળ આવતા સુર સિંહ ગામના રહેવાસી છે. પંજાબ પોલીસની ટીમ હાલમાં આ તમામ આરોપીઓની ધરપકડ કરવા માટે તેમના વિવિધ ઠેકાણાઓ પર દરોડા પાડી રહી છે. આ ઉપરાંત, મહિલાએ અન્ય કોઈ વ્યક્તિઓ સાથે આ પ્રકારે ઠગાઈ આચરી છે કે કેમ તે દિશામાં પણ ઊંડાણપૂર્વક તપાસ હાથ ધરવામાં આવી રહી છે.

ઉલ્લેખનીય છે કે, સરહિંદ માર્કેટ કમિટીના વડા તરીકે સેવા આપતા આપ નેતા અમરિંદર સિંહ મંડોફલ સાથે બનેલી આ ઘટનાએ રાજકીય વર્તુળોમાં ભારે ખળભળાટ મચાવી દીધો છે. એક વરિષ્ઠ રાજકીય આગેવાન સાથે આટલા મોટા પાયે આચરવામાં આવેલી છેતરપિંડીને પગલે ઉચ્ચ પોલીસ અધિકારીઓ જાતે જ આ મામલાની દેખરેખ રાખી રહ્યા છે. હાલમાં તમામ ફરાર આરોપીઓને ઝડપી પાડવા અને ચોરાયેલા સોના-ચાંદીના દાગીના તેમજ રોકડ રકમ પુનઃ પ્રાપ્ત કરવા માટેની આગળની કાનૂની કાર્યવાહી વેગવંતી બનાવવામાં આવી છે.