ન્યૂયોર્ક : વૈશ્વિક સ્તરે અત્યારે એક દુર્લભ પણ અત્યંત જીવલેણ ગણાતા 'હન્ટાવાયરસ' (Hantavirus) ના ફેલાવાને રોકવા માટે યુદ્ધના ધોરણે પ્રયાસો શરૂ કરવામાં આવ્યા છે. ખાસ કરીને એક લક્ઝરી ક્રૂઝ શિપ 'MV Hondius' પર આ વાયરસના કેસ નોંધાયા બાદ ફફડાટ વ્યાપી ગયો છે. આ વાયરસના કારણે અત્યાર સુધીમાં ૩ લોકોના મોત થયા છે અને અનેક લોકો પર સંકટ તોળાઈ રહ્યું છે. 
૩ મુસાફરોના મોત અને ૫ કન્ફર્મ કેસ: પ્રાપ્ત વિગતો અનુસાર, ૧૧ એપ્રિલથી અત્યાર સુધીમાં MV Hondius જહાજ પર સવાર મુસાફરોમાં હન્ટાવાયરસના ૫ કેસની પુષ્ટિ થઈ છે. જેમાં ૩ મુસાફરોએ જીવ ગુમાવ્યો છે, જ્યારે અન્ય ૩ શંકાસ્પદ કેસની તપાસ ચાલી રહી છે. હાલમાં ૧૦૦થી વધુ મુસાફરો હજુ પણ જહાજ પર છે, જેમને આગામી દિવસોમાં ઉતારવામાં આવશે. 
માણસથી માણસમાં ફેલાવાનો ખતરો: સામાન્ય રીતે હન્ટાવાયરસ ઉંદરોના મળ-મૂત્ર અથવા લાળના સંપર્કથી ફેલાય છે, પરંતુ આ કિસ્સામાં સામે આવેલો 'એન્ડીઝ સ્ટ્રેઈન' (Andes strain) માણસથી માણસમાં ફેલાઈ શકે છે. લાંબા સમય સુધી અને અત્યંત નજીકના સંપર્કમાં રહેવાથી આ વાયરસ એક વ્યક્તિથી બીજી વ્યક્તિને સંક્રમિત કરી શકે છે. સંસર્ગમાં આવ્યા બાદ તેના લક્ષણો દેખાતા ૧ થી ૬ અઠવાડિયા જેટલો સમય લાગે છે. 
લક્ષણો અને જીવનું જોખમ: નિષ્ણાતોના જણાવ્યા મુજબ, શરૂઆતમાં આ વાયરસના લક્ષણો સામાન્ય ફ્લૂ જેવા હોય છે, જેમાં તાવ, માથાનો દુખાવો, ઠંડી લાગવી અને સ્નાયુઓમાં દુખાવો સામેલ છે. જોકે, તે 'હન્ટાવાયરસ પલ્મોનરી સિન્ડ્રોમ' નામની ગંભીર સ્થિતિ પેદા કરી શકે છે, જેમાં ફેફસાંમાં પાણી ભરાઈ જાય છે અને શ્વાસ લેવામાં અત્યંત તકલીફ પડે છે. અમેરિકામાં આ વાયરસનો મૃત્યુદર ૩૫ ટકા જેટલો ઊંચો છે. 
દુનિયાભરમાં ટ્રેસિંગ ઓપરેશન: હાલમાં ન્યૂ જર્સી સહિત અમેરિકાના ૪ રાજ્યોમાં આ જહાજ પરથી ઉતરેલા મુસાફરોની દેખરેખ રાખવામાં આવી રહી છે. આરોગ્ય અધિકારીઓ એવા લોકો પર નજર રાખી રહ્યા છે જેઓ સંક્રમિત મુસાફરો સાથે ફ્લાઈટમાં અથવા અન્ય રીતે સંપર્કમાં આવ્યા હોય. ડૉક્ટરોનું કહેવું છે કે જો દર્દીને સમયસર હોસ્પિટલ પહોંચાડીને ઓક્સિજન સપોર્ટ આપવામાં આવે, તો બચવાની શક્યતા વધી જાય છે.