દુબઈ: સંયુક્ત આરબ અમીરાત (UAE) સરકારે દેશમાં કામ કરતા લાખો વિદેશી શ્રમિકોના હિતમાં એક ક્રાંતિકારી નિર્ણય લીધો છે. માનવ સંસાધન અને અમીરાત મંત્રાલયે કામદારોના રહેઠાણ (Worker Housing) માટે નવા અને સુધારેલા ધોરણો જાહેર કર્યા છે. આ નવા નિયમો મુજબ, હવે દરેક કામદારને આવાસમાં મફત ઇન્ટરનેટ સુવિધા પૂરી પાડવી માલિકો માટે ફરજિયાત રહેશે, જેથી તેઓ પોતાના પરિવાર સાથે સંપર્કમાં રહી શકે.

રહેવાની પદ્ધતિ અને સુવિધાઓમાં ધરખમ સુધારો

નવા માર્ગદર્શિકા મુજબ, દરેક રહેવાસીને યોગ્ય બેડ, વ્યક્તિગત સ્ટોરેજ સ્પેસ (કબાટ) અને સ્વચ્છ પથારી આપવી પડશે. રૂમમાં પર્યાપ્ત વેન્ટિલેશન, એર કન્ડીશનીંગ અને પૂરતી જગ્યા હોવી જોઈએ. સ્વચ્છતા અને સલામતી જાળવવા માટે રૂમની અંદર રસોઈ કરવા પર પ્રતિબંધ મૂકવામાં આવ્યો છે. વધુમાં, માલિકોએ રહેઠાણની જગ્યાને દરરોજ સાફ રાખવી પડશે અને પેસ્ટ કંટ્રોલ તથા કચરાના નિકાલની યોગ્ય વ્યવસ્થા કરવી પડશે.

આરોગ્ય અને સલામતી પર વિશેષ ભાર

UAE સરકારે કામદારોના સ્વાસ્થ્યને લઈને અત્યંત કડક વલણ અપનાવ્યું છે. જે આવાસ સમુદાયોમાં 1,000 કે તેથી વધુ કામદારો રહેતા હોય, ત્યાં ફર્સ્ટ-એડ રૂમ અને ઓન-સાઈટ મેડિકલ ક્લિનિક રાખવું અનિવાર્ય બનશે. માંદા રહેવાસીઓ માટે આઈસોલેશન એરિયા અને રોગોનો ફેલાવો રોકવા માટે વિશેષ પગલાં લેવાના રહેશે. પીવાના શુદ્ધ પાણીની સુવિધા સાથે રસોડા અને બાથરૂમ પણ આરોગ્યના ધોરણો મુજબના હોવા જોઈએ.

નિયમોનું ઉલ્લંઘન કરનારને સજા

નવા માળખામાં ફાયર સેફ્ટી સિસ્ટમ, ઈમરજન્સી એક્ઝિટ અને નિયમિત તપાસને ફરજિયાત બનાવવામાં આવી છે. જો કોઈ કંપની ભીડભાડવાળા રૂમ, ખરાબ વેન્ટિલેશન અથવા પીવાના પાણીનો અભાવ જેવી ક્ષતિઓ રાખશે, તો તેને ગંભીર જોખમ ગણીને તાત્કાલિક દંડ કરવામાં આવશે. કંપનીઓએ કાં તો આ ધોરણો મુજબનું આવાસ આપવું પડશે અથવા કર્મચારીઓને તે મુજબનું આવાસ ભથ્થું (Housing Allowance) ચૂકવવું પડશે. આ ફેરફારોનો મુખ્ય ઉદ્દેશ્ય UAE માં કામદારોના કલ્યાણમાં વધારો કરવાનો અને તેમને સુરક્ષિત વાતાવરણ પૂરું પાડવાનો છે.