પશ્ચિમ  બંગાળના હાવડા સ્ટેશન પર મંગળવારે 13021 હાવડા–રક્સૌલ મિથિલા એક્સપ્રેસમાં આગ લાગવાની ઘટના સામે આવી હતી. રેલવે વિભાગના જણાવ્યા અનુસાર ટ્રેન બપોરે 2:59 વાગ્યે પ્લેટફોર્મ નંબર 8 પર લાવવામાં આવી હતી. ત્યારબાદ લગભગ 3:45 વાગ્યે મુસાફરોએ સૂચના આપી કે ટ્રેનના છેલ્લા ભાગના ત્રીજા કોચ (LS કોચ નંબર ER 247929)ના બાથરૂમમાંથી ધુમાડો અને આગ નીકળતી જોવા મળી.

સૂચના મળતાં જ રેલવે સ્ટાફ તાત્કાલિક સ્થળ પર પહોંચી ગયો અને આગ બુઝાવવાની કામગીરી શરૂ કરી દીધી. સ્ટાફ દ્વારા બે ફાયર એક્સટિંગ્વિશરની મદદથી લગભગ 7 મિનિટની અંદર, એટલે કે 3:52 વાગ્યા સુધી આગ પર સંપૂર્ણ કાબૂ મેળવી લેવાયો હતો. રેલવે અધિકારીઓના ઝડપી પગલાંના કારણે મોટી દુર્ઘટના ટળી ગઈ હતી અને કોઈ મુસાફરને ઈજા થઈ નથી.

ઘટના બાદ ટેકનિકલ તપાસ શરૂ કરવામાં આવી હતી. સાંજે 4:18 વાગ્યે ટ્રેન એક્ઝામિનર (TXR) દ્વારા અસરગ્રસ્ત કોચને અલગ કરવાની મંજૂરી આપતો મેમો જારી કરવામાં આવ્યો. હાલમાં કોચને ટ્રેનમાંથી અલગ કરવા માટે શેન્ટિંગનું કામ ચાલુ છે. રેલવે તંત્ર દ્વારા સમગ્ર ઘટનાની વિગતવાર તપાસ હાથ ધરવામાં આવી છે જેથી આગ લાગવાનું ચોક્કસ કારણ જાણી શકાય.