મુંબઈ : મુંબઈની અત્યંત પ્રતિષ્ઠિત અને અમીર સભ્યોથી ઉભરાતી 'એલીટ ક્લબો'ના રસોડામાં ચાલી રહેલી ગંભીર અસ્વચ્છતાનો મહારાષ્ટ્ર ફૂડ એન્ડ ડ્રગ એડમિનિસ્ટ્રેશન (FDA) એ પર્દાફાશ કર્યો છે. FDA કમિશનર તુકારામ મુંધેના કડક નિર્દેશો હેઠળ ૨૭ જુલાઈના રોજ હાથ ધરાયેલા સરપ્રાઈઝ ચેકિંગમાં ખાદ્ય સુરક્ષાના ધજાગરા ઉડતા જોવા મળ્યા હતા. આ ગંભીર બેદરકારી બદલ મુંબઈની ૫ નામાંકિત ક્લબોના FSSAI ફૂડ લાઈસન્સ તાત્કાલિક અસરથી સસ્પેન્ડ કરી દેવામાં આવ્યા છે.

આ પાંચ ધનાઢ્ય ક્લબો પર પડી તાળા મારી સીલિંગની ગાજ

જે ક્લબો સામે એફડીએ દ્વારા સખત કાર્યવાહી કરવામાં આવી છે તેમાં સમાવેશ થાય છે:

· ધ ક્રિકેટ ક્લબ ઓફ ઈન્ડિયા (CCI)

· આર.કે. જુહુ જીમખાના

· ધ અપર્ણા જુહુ જીમખાના

· MIG ક્રિકેટ ક્લબ (બાંદ્રા ઈસ્ટ)

· ધ વિલિંગડન સ્પોર્ટ્સ ક્લબ

આ સિવાય મલાડની જાણીતી ગોરેગાંવ સ્પોર્ટ્સ ક્લબ પાસે માન્ય ફૂડ લાઈસન્સ ન હોવાથી તેને તાત્કાલિક કામકાજ બંધ કરવા ('Stop Business') ની નોટિસ આપવામાં આવી છે.

ચમકતા ફ્રન્ટ-એન્ડ પાછળ સડતું રસોડું!

એક વરિષ્ઠ FDA અધિકારીએ ધ ફ્રી પ્રેસ જર્નલ સાથે વાત કરતા જણાવ્યું હતું કે, "આમાંથી ઘણી ક્લબો ૮૦ થી ૯૦ વર્ષ જૂની છે. બહારથી જોતા તેઓ ખૂબ જ આલીશાન અને ચમકદાર દેખાય છે, પરંતુ તેમના રસોડા અને ડ્રેનેજ સિસ્ટમની હાલત અત્યંત દયનીય અને ગંદી છે."

દરોડા દરમિયાન નિરીક્ષકોને રસોડામાં વંદાઓ અને માખીઓનો ભારે ઉપદ્રવ, વાસી તથા ફૂગવાળો ખોરાક, સમયસીમા (Expiry Date) સમાપ્ત થઈ ગયેલી સામગ્રી અને જમીન પર ગંદા વાસણો પડેલા મળ્યા હતા. એટલું જ નહીં, શાકાહારી અને માંસાહારી ખોરાક એકસાથે રાખવામાં આવતો હતો અને ગટર બ્લોક હોવાને કારણે અસહ્ય દુર્ગંધ મારતી હતી.

CCI ના કોલ્ડ રૂમમાં શાકભાજી પર પાણી ટપકતું હતું!

સૌથી ભયાનક સ્થિતિ ક્રિકેટ ક્લબ ઓફ ઈન્ડિયા (CCI) માં જોવા મળી હતી. અહીં કોલ્ડ સ્ટોરેજ રૂમમાં છત પરથી પાણી સીધું સંગ્રહિત ખોરાક અને ફૂગવાળા શાકભાજી પર ટપકી રહ્યું હતું. ક્રોસ-કન્ટામિનેશન રોકવા માટે જરૂરી કલર-કોડેડ ચોપિંગ બોર્ડ પણ ગેરહાજર હતા. કાર્યવાહી બાદ CCI એ પોતાની સ્પોર્ટ્સ સુવિધાઓ ચાલુ રાખીને કિચન અને બેકરી સેક્શન અસ્થાયી રૂપે બંધ કરી દીધા છે.

ગેરકાયદે કેટરિંગ અને બિના-લાઈસન્સ વેચાણ

બાંદ્રા સ્થિત MIG ક્રિકેટ ક્લબ માં તપાસ દરમિયાન સામે આવ્યું કે 'નેબ્યુલા કેટરિંગ સર્વિસીસ' નામની એજન્સી કોઈ પણ માન્ય FSSAI લાઈસન્સ વગર જ ક્લબમાં કેટરિંગ ચલાવી રહી હતી. કર્મચારીઓ પાસે ફરજિયાત મેડિકલ ફિટનેસ સર્ટિફિકેટ પણ નહોતા.

આગામી દિવસોમાં સમગ્ર રાજ્યમાં દરોડા પડશે

FDA ના આકરા વલણથી મુંબઈના ઉચ્ચ ભદ્ર વર્ગમાં અને હોટેલ ઇન્ડસ્ટ્રીમાં ભારે ફફડાટ વ્યાપી ગયો છે. અધિકારીઓએ સ્પષ્ટ કર્યું છે કે સભ્યોની આરોગ્ય સુરક્ષા સાથે કોઈ સમજૂતી કરવામાં આવશે નહીં અને સમગ્ર મહારાષ્ટ્રમાં આ પ્રકારની ખાસ નિરીક્ષણ ઝુંબેશ આગામી દિવસોમાં વધુ તીવ્ર બનાવવામાં આવશે.