મકવાનપુરઃ  પડોશી દેશ નેપાળમાંથી એક અત્યંત હૃદયદ્રાવક અને ગંભીર દુર્ઘટનાના સમાચાર સામે આવી રહ્યા છે, જ્યાં મકવાનપુર જિલ્લામાં મુસાફરોથી ભરેલી એક ઇલેક્ટ્રિક વેન અચાનક અનિયંત્રિત થઈને આશરે ૫૦૦ થી ૭૦૦ મીટર જેટલી ઊંડી ખીણમાં ખાબકી હતી. આ ભયાનક અકસ્માતમાં ૧૦ લોકોનાં ઘટનાસ્થળે જ કરુણ મોત નીપજ્યા છે, જ્યારે અન્ય કેટલાક મુસાફરો ગંભીર રીતે ઘાયલ થયા છે.
પ્રાપ્ત વિગતો અનુસાર, આ વાહન કાઠમંડુથી દક્ષિણી સરલાહી જિલ્લાના મુખ્યાલય મલંગવા તરફ જઈ રહ્યું હતું, ત્યારે ભીમફેદી ગ્રામીણ નગરપાલિકા-૬ સ્થિત ચિસાપાની ગઢી પાસે આ દુર્ઘટના સર્જાઈ હતી. વહેલી સવારે બનેલી આ ઘટનાને કારણે વાહનનો કુરચો બોલી ગયો હતો અને આસપાસના વિસ્તારમાં ભારે હાહાકાર મચી ગયો હતો.
ઘટનાની જાણ થતાં જ સશસ્ત્ર પોલીસ બળ (APF) અને રાહત તથા બચાવ ટીમો તાત્કાલિક ધોરણે ઘટનાસ્થળે પહોંચી ગઈ હતી. સુરક્ષાદળો દ્વારા ભારે જહેમત બાદ ખીણમાંથી મૃતદેહોને બહાર કાઢવામાં આવ્યા છે અને ગંભીર રીતે ઘાયલ થયેલા મુસાફરોને તાત્કાલિક સારવાર અર્થે હેટૌડા હોસ્પિટલ ખાતે ખસેડવામાં આવ્યા છે, જ્યાં કેટલાક ઘાયલોની સ્થિતિ અત્યંત નાજુક હોવાનું જણાવવામાં આવી રહ્યું છે.
નેપાળમાં અગાઉના વર્ષોમાં પણ પર્વતીય માર્ગો અને ડુંગરાળ વિસ્તારોમાં બેકાબૂ વાહન ચલાવવા તેમજ ટ્રાફિક નિયમોના ઉલ્લંઘનને કારણે ગંભીર અકસ્માતોની ઘટનાઓ બનતી રહી છે. આ વધતી દુર્ઘટનાઓને રોકવા માટે સ્થાનિક વહીવટી તંત્ર અને સરકાર દ્વારા માર્ગ સુરક્ષાના નિયમો કડક બનાવવાની સાથે વાહનચાલકો માટે વિશેષ માર્ગદર્શિકા જારી કરવાના પગલાં લેવામાં આવી રહ્યા છે.