મુંબઈ, તા. 12: મહારાષ્ટ્રમાં ધર્મના નામે નિર્દોષ લોકોને છેતરતા સ્વયંભૂ 'ગોડમેન' અશોક ખરાટની મુશ્કેલીઓમાં મોટો વધારો થયો છે. મુંબઈની સ્પેશિયલ PMLA (પ્રિવેન્શન ઓફ મની લોન્ડરિંગ એક્ટ) કોર્ટે એન્ફોર્સમેન્ટ ડિરેક્ટોરેટ (ED) ની અરજી ગ્રાહ્ય રાખી છે. કોર્ટે આદેશ આપ્યો છે કે જાતીય શોષણ, છેતરપિંડી અને મની લોન્ડરિંગ જેવા ગંભીર આરોપોનો સામનો કરી રહેલા ખરાટને 18 મેના રોજ ચુસ્ત પોલીસ બંદોબસ્ત સાથે કોર્ટમાં રજૂ કરવામાં આવે.
ચમત્કારના નામે છેતરપિંડીની માસ્ટર પ્લાનિંગ
તપાસમાં બહાર આવ્યું છે કે અશોક ખરાટ લોકો પર પ્રભાવ પાડવા માટે ભારે નાટકીય શૈલી અપનાવતો હતો. તે રિમોટ-કંટ્રોલથી ચાલતા નકલી સાપ અને વાઘની ચામડી જેવા સાધનોનો ઉપયોગ કરીને 'અલૌકિક' વાતાવરણ ઉભું કરતો હતો. ભક્તોને અંધશ્રદ્ધામાં નાખીને તે મામૂલી જંગલી આમલીના બીજને 'આશીર્વાદિત' ગણાવી ₹10,000 થી ₹1 લાખ સુધીની કિંમતે વેચતો હતો. આ લૂંટના પૈસાથી તેણે પોતાના અને પરિવારના નામે અનેક બેનામી મિલકતો ખરીદી હોવાની આશંકા છે.
એક જ દિવસમાં ખોલ્યા 43 બેંક ખાતા!
ED ની તપાસમાં ચોંકાવનારી વિગતો સામે આવી છે કે ખરાટે રાહાતાની એક સહકારી ક્રેડિટ સોસાયટીમાં કુલ 60 બેંક ખાતાઓનું સંચાલન કર્યું હતું. આશ્ચર્યની વાત એ છે કે, 25 મે 2021 ના રોજ તેણે એક જ દિવસમાં 43 ખાતા ખોલ્યા હતા. આ તમામ ખાતાઓમાં તેણે ભક્તોના દસ્તાવેજોનો તેમની જાણ બહાર ઉપયોગ કર્યો હતો, પરંતુ મોબાઈલ નંબર પોતાનો આપ્યો હતો અને પોતે જ નોમિની બન્યો હતો.
70 કરોડથી વધુના શંકાસ્પદ વ્યવહારો
એજન્સીના જણાવ્યા અનુસાર, આ બેંક ખાતાઓ દ્વારા ₹70 કરોડથી વધુના વ્યવહારો કરવામાં આવ્યા છે. ED હવે એ જાણવા માંગે છે કે આ ગુનાની કમાણીનો અસલી ફાયદો કોને કોને મળ્યો છે. 18 મેના રોજ થનારી રજૂઆત બાદ ખરાટની પૂછપરછમાં મહારાષ્ટ્રના રિયલ એસ્ટેટ અને અન્ય ક્ષેત્રોમાં થયેલા રોકાણોના મોટા ખુલાસા થવાની શક્યતા છે.