મુંબઈ: માયાનગરી મુંબઈમાં ચોમાસું એટલે માત્ર વરસાદ નહીં, પણ આખા શહેર માટે એક આકરી કસોટીનો સમયગાળો હોય છે. આ વર્ષે દક્ષિણ-પશ્ચિમ ચોમાસાના આગમન પહેલાં જ મુંબઈ મેટ્રોપોલિટન રીજન ડેવલપમેન્ટ ઓથોરિટી (MMRDA) એ કોઈ પણ પ્રકારની કટોકટીને પહોંચી વળવા માટે એક અત્યંત વ્યાપક અને બહુ-સ્તરીય ચોમાસા એક્શન પ્લાન સક્રિય કરી દીધો છે. મુંબઈ અને તેની આસપાસ ચાલી રહેલા તમામ મેટ્રો લાઇન અને ઇન્ફ્રાસ્ટ્રક્ચર પ્રોજેક્ટ્સના સ્થળો પર અકસ્માતો રોકવા અને પાણી ભરાવાની સમસ્યામાંથી મુક્તિ મેળવવા માટે કડક સ્ટાન્ડર્ડ ઓપરેટિંગ પ્રોસિજર (SOP) લાગુ કરવામાં આવી છે.

MMRDA એ તમામ કોન્ટ્રાક્ટરો અને એજન્સીઓને સ્પષ્ટ ચેતવણી આપી છે કે જો ચોમાસા પૂર્વેની તૈયારીઓમાં સહેજ પણ બેદરકારી દાખવવામાં આવશે, તો તેને કરારનો ભંગ ગણીને સીધા કાયદાકીય પગલાં લેવામાં આવશે.

ગ્રાઉન્ડ લેવલ પર સેનાની જેમ તૈનાત રહેશે ઇમરજન્સી ટીમો

ચોમાસા દરમિયાન મુંબઈગરાઓની ગતિશીલતા અટકે નહીં તે માટે જમીની સ્તર પર મોટું નેટવર્ક ગોઠવવામાં આવ્યું છે. આ આખા પ્લાન હેઠળ તમામ પ્રોજેક્ટ સાઇટ્સ પર કુલ ૪૩૧ હાઇ-કેપેસિટી ડીવોટરિંગ પંપ, કટોકટીની સ્થિતિ માટે ૪૯ એમ્બ્યુલન્સ, સાઇટ પર નજર રાખવા માટે ૫૪૪ સીસીટીવી કેમેરા અને ૫૫ સ્પેશિયલ ઇમરજન્સી કંટ્રોલ રૂમ તૈયાર કરવામાં આવ્યા છે.

તમામ કોન્ટ્રાક્ટરોને આદેશ અપાયો છે કે ભારે વરસાદ કે વાવાઝોડા દરમિયાન રસ્તાઓ પર પડેલા ખાડાઓ તાત્કાલિક પૂરવા માટે ખાસ વાહનો દોડાવવામાં આવે, ગટર અને રોડ ડિવાઇડરનું સમારકામ થાય અને મચ્છરોનો ઉપદ્રવ રોકવા માટે કાસ્ટિંગ યાર્ડમાં નિયમિત ફોગિંગ કરવામાં આવે.

રેડ એલર્ટ દરમિયાન કામગીરી બંધ, મજૂર શિબિરો શિફ્ટ કરાશે

હવામાન વિભાગ (IMD) કે મ્યુનિસિપલ કોર્પોરેશન દ્વારા જ્યારે પણ શહેરમાં 'રેડ એલર્ટ' જાહેર કરવામાં આવશે, ત્યારે મેટ્રોના પિલર પર ગર્ડર લોન્ચિંગ જેવી તમામ ઉચ્ચ જોખમ ધરાવતી બાંધકામ પ્રવૃત્તિઓ તાત્કાલિક અટકાવી દેવાની રહેશે. આ ઉપરાંત, નીચાણવાળા અને પૂરગ્રસ્ત વિસ્તારોમાં બનાવેલી મજૂરોની વસાહતોને ચોમાસું બેસે તે પહેલાં જ કોઈ સલામત સ્થળે સ્થાનાંતરિત કરવાના આદેશ અપાયા છે. ભારે પવનના કારણે મેટ્રોના લોખંડના સળિયા કે પિલર તૂટી ન પડે તે માટે વધારાના માળખાકીય સપોર્ટ આપવાનું પણ ફરજિયાત કરાયું છે.

નવી મેટ્રો લાઇન ૨B અને ૯ ની આકરી કસોટી

મુંબઈમાં કાર્યરત મેટ્રો લાઇન 2A, 7, તેમજ નવી બની રહેલી લાઇન 2B અને 9 પર ખાસ ફોકસ રાખવામાં આવ્યું છે. આ વર્ષે મેટ્રો લાઇન 2B અને 9 તેમના પ્રથમ ચોમાસાનો સામનો કરવા જઈ રહી હોવાથી, MMRDA કમિશનર ડૉ. સંજય મુખર્જીએ બંને કોરિડોર માટે સ્પેશિયલ 'મોન્સૂન ઓડિટ' ના આદેશ આપ્યા છે. સ્ટેશનોનું વોટરપ્રૂફિંગ, પ્લેટફોર્મની ડ્રેનેજ સિસ્ટમ અને ઓવરહેડ વાયરોનું અત્યારથી જ ઝીણવટભર્યું નિરીક્ષણ શરૂ કરી દેવાયું છે.

૨૫ મેથી એક્ટિવ થશે ૨૪x૭ ડિઝાસ્ટર કંટ્રોલ રૂમ

નાગરિકોની સુવિધા અને ફરિયાદોના ઝડપી નિકાલ માટે આગામી ૨૫ મે, ૨૦૨૬ થી ૧૫ ઓક્ટોબર, ૨૦૨૬ સુધી મુંબઈમાં ૨૪ કલાક કાર્યરત આપત્તિ નિયંત્રણ ખંડ (Disaster Control Room) શરૂ કરવામાં આવશે. આ કંટ્રોલ રૂમ મુંબઈ મહાનગરપાલિકા (BMC), પોલીસ અને રાજ્ય સરકારના અન્ય વિભાગો સાથે સીધા સંકલનમાં રહેશે. નાગરિકો કોઈપણ કટોકટીના સમયે નીચેના નંબરો પર સંપર્ક કરી શકશે:

• ટોલ ફ્રી નંબર: ૧૮૦૦૨૨૮૮૦૯
• મોબાઇલ નંબર: ૮૫૫ boyhood ૪૦૨૦૯૦
• ટેલિફોન લાઇન્સ: ૦૨૨-૨૬સ૯ ૧૨૪૯ / ૦૨૨-૬૫૯૬ ૪૮૭૬

સરકાર કટોકટીને પહોંચી વળવા કટિબદ્ધ: મુખ્યમંત્રી

મહારાષ્ટ્રના મુખ્યમંત્રી દેવેન્દ્ર ફડણવીસે તંત્રની સજ્જતા અંગે જણાવ્યું હતું કે, "મુંબઈનું ચોમાસું દેશમાં સૌથી પડકારજનક હોય છે. મેં તમામ નાગરિક એજન્સીઓને ચોમાસાની શરૂઆત પહેલાં ૧૦૦% પૂર્વ-આયોજન અને ઝડપી પ્રતિભાવ સુનિશ્ચિત કરવા નિર્દેશ આપ્યો છે. જનતાની સલામતી જ અમારી સર્વોચ્ચ પ્રાથમિકતા છે."

સાથે જ નાયબ મુખ્યમંત્રી અને MMRDA ના અધ્યક્ષ એકનાથ શિંદેએ ઉમેર્યું કે, "મુંબઈમાં હાલ દેશના સૌથી મોટા પ્રોજેક્ટ્સ ચાલી રહ્યા છે, તેથી ટ્રાફિક વ્યવસ્થા જાળવવી અને ડ્રેનેજ ક્લિયર રાખવું એ કોન્ટ્રાક્ટરોની જવાબદારી છે. કોઈપણ પ્રકારની શિસ્તહીનતા ચલાવી લેવામાં આવશે નહીં."