નવી દિલ્‍હી તા.૩: ઓક્‍ટોબરની શરૂઆત સાથે જ તહેવારોની ખરીદી અને ફરવાના પ્‍લાન બનાવી રહેલા લોકોના બજેટ પર મોંઘવારીનો વધારાનો બોજ આવ્‍યો છે. ૧ ઓક્‍ટોબરથી કોમર્શિયલ LPG સિલિન્‍ડર અને એવિએશન ટર્બાઇન ફયુઅલ (ATF)ના ભાવમાં વધારો થયો છે. બીજી તરફ, AC, TV અને અન્‍ય ઘરેલુ ઇલેક્‍ટ્રોનિક સાધનોના ભાવમાં પણ વધારો થવાની તૈયારી છે. કોમર્શિયલ LPG સિલિન્‍ડર રૂા.૬૨.૫૦ સુધી મોંઘો થયો છે, જ્‍યારે ATFના ભાવમાં રૂા.૧૬ પ્રતિ લિટરનો વધારો થયો છે.

ઓઇલ માર્કેટિગ કંપનીઓએ ૧૯ કિલોગ્રામના કોમર્શિયલ LPG સિલિન્‍ડરના ભાવમાં રૂા.૬૨.૫૦નો વધારો કર્યો છે. દિલ્‍હીમાં હવે તેની કિમત રૂા.૨,૮૧૦ થઈ છે. મુંબઈમાં ભાવ રૂા.૨,૭૬૪ અને પટણામાં રૂા.૩,૧૦૦.૫૦ સુધી પહોંચી ગયો છે. અમદાવાદમાં પણ કોમર્શિયલ સિલિન્‍ડરની કિમત રૂા.૨,૮૩૧.૫૦ થઈ છે. જોકે, ઘરેલુ ઉપયોગના ૧૪.૨ કિલોગ્રામના LPG સિલિન્‍ડરના ભાવમાં હાલમાં કોઈ ફેરફાર કરવામાં આવ્‍યો નથી.

આ વધારાની સીધી અસર હોટેલ, રેસ્‍ટોરન્‍ટ, ઢાબા અને કેટરિંગ વ્‍યવસાય પર પડી શકે છે. તહેવારો દરમિયાન બહાર ખાવાનું પ્રમાણ વધતું હોવાથી વેપારીઓના વધેલા ખર્ચનો કેટલોક હિસ્‍સો ગ્રાહકો સુધી પહોંચવાની શક્‍યતા રહે છે.

એવિએશન ટર્બાઇન ફયુઅલ (ATF)ના ભાવમાં પણ રૂા.૧૬ પ્રતિ લિટરનો વધારો કરવામાં આવ્‍યો છે. દિલ્‍હીમાં સ્‍થાનિક એરલાઇન્‍સ માટ ATFનો ભાવ રૂા.૧૨૧થી વધીને રૂા.૧૩૭ પ્રતિ લિટર થયો છે. એરલાઇન્‍સના કુલ ઓપરેટિંગ ખર્ચમાં જેટ ફયુઅલનો હિસ્‍સો નોંધપાત્ર હોય છે, તેથી ઈંધણના ભાવમાં વધારો હવાઈ કંપનીઓના ખર્ચને અસર કરી શકે છે.

દશેરા, દિવાળી અને અન્‍ય તહેવારો દરમિયાન હવાઈ મુસાફરીની માંગ વધતી હોય છે. આવી સ્‍થિતિમાં એરલાઇન્‍સના ખર્ચમાં વધારો થાય તો ભાડા પર પણ તેની અસર જોવા મળી શકે છે.

તહેવારોની સીઝનમાં ટીવી, AC, ફ્રિજ અને વોશિંગ મશીન ખરીદવાનું આયોજન કરી રહેલા ગ્રાહકો માટે પણ ખર્ચ વધી શકે છે. ઉદ્યોગ અહેવાલો અનુસાર, ૧ ઓક્‍ટોબરથી કેટલાક કન્‍ઝ્‍યુમર ઇલેક્‍ટ્રોનિક્‍સ અને એપ્‍લાયન્‍સના ભાવમાં ૫થી ૮ ટકા સુધીનો વધારો થવાની તૈયારી છે. કાચા માલ, પરિવહન ખર્ચ અને ચલણમાં વધઘટને આ માટે જવાબદાર ગણાવવામાં આવી રહી છે.

કેટલાક ઉત્‍પાદકો અને બ્રાન્‍ડ્‍સે તહેવારો પહેલાં ભાવમાં વધારો કરવાની યોજના બનાવી છે. જેના કારણે દિવાળી શોપિગ દરમિયાન ગ્રાહકોને અગાઉની સરખામણીમાં વધુ રકમ ચૂકવવી પડી શકે છે. ઓક્‍ટોબરથી એકસાથે અનેક ક્ષેત્રોમાં ખર્ચ વધતા તહેવારોની ખરીદીનું બજેટ અસરગ્રસ્‍ત થઈ શકે છે.

 બહાર ખાવું, હવાઈ મુસાફરી કરવી અથવા ઘર માટે નવું AC-TV ખરીદવું હોય, અનેક મોરચે ખર્ચ વધવાની સ્‍થિતિ સર્જાઈ છે. જોકે, તમામ વસ્‍તુઓ અને સેવાઓના ભાવમાં એકસરખો વધારો થયો નથી. ખાસ કરીને ઘરેલુ LPGના ભાવ હાલમાં યથાવત છે. તેથી તહેવારોની સિઝનમાં કઈ વસ્‍તુ ખરીદવી અને કેટલો ખર્ચ કરવો તે અંગે ગ્રાહકોને બજેટનું આયોજન વધુ ધ્‍યાનથી કરવું પડશે.