વોશિંગ્ટન:અમેરિકી રાષ્ટ્રપતિ ડોનાલ્ડ ટ્રમ્પે ઈરાન સાથેના તણાવ વચ્ચે અત્યંત કડક વલણ અપનાવતા રવિવારે મોટી જાહેરાત કરી છે. ટ્રમ્પે જણાવ્યું છે કે તેમના પ્રતિનિધિઓ સ્ટીવ વિટકોફ અને જેરેડ કુશનર સોમવારે રાત્રે પાકિસ્તાનના ઈસ્લામાબાદ પહોંચશે, જ્યાં તેઓ ઈરાન સાથે સીઝફાયર (યુદ્ધવિરામ) અંગે મંત્રણા કરશે. ટ્રમ્પે સ્પષ્ટ શબ્દોમાં ઈરાનને ચેતવણી આપી છે કે જો તેઓ આ 'વ્યાજબી ડીલ' સ્વીકારશે નહીં, તો ઈરાનના પાવર પ્લાન્ટ્સ, પુલો અને ઉર્જા મથકોને નેસ્તનાબૂદ કરી દેવામાં આવશે.

ડિપ્લોમસીની આ છેલ્લી તક:

ફોક્સ ન્યૂઝ સાથેની વાતચીતમાં ટ્રમ્પે જણાવ્યું કે ઈરાન પાસે સમજૂતી કરવા માટે આ છેલ્લી તક છે. તેમણે ભૂતપૂર્વ રાષ્ટ્રપતિ ઓબામા જેવી ભૂલ ન કરવાની પ્રતિજ્ઞા લેતા કહ્યું કે જો ઈરાન હસ્તાક્ષર નહીં કરે તો આખા દેશને ઉડાવી દેવામાં આવશે. ટ્રમ્પના જણાવ્યા અનુસાર, પરમાણુ હથિયારો ન રાખવા જેવા મોટાભાગના મુદ્દાઓ પર પહેલેથી જ સહમતી સધાઈ ગઈ છે, હવે માત્ર કાગળ પર સહી કરીને 'સ્ટ્રેટ ઓફ હોર્મુઝ' ખોલવાની જરૂર છે.

સીઝફાયરના ભંગ બદલ આકરા પ્રહાર:

ટ્રમ્પે ટ્રુથ સોશિયલ પર પોસ્ટ કરીને ઈરાન પર સીઝફાયર કરારના ઉલ્લંઘનનો આરોપ લગાવ્યો છે. તેમણે કહ્યું કે ઈરાને સ્ટ્રેટ ઓફ હોર્મુઝમાં ગોળીબાર કર્યો હતો, જેમાં ફ્રાન્સ અને યુનાઇટેડ કિંગડમના જહાજોને નિશાન બનાવવામાં આવ્યા હતા. ટ્રમ્પે દાવો કર્યો હતો કે સ્ટ્રેટ બંધ હોવાને કારણે ઈરાનને દરરોજ ૫૦૦ મિલિયન ડોલરનું નુકસાન થઈ રહ્યું છે, જ્યારે અમેરિકાને તેનાથી કોઈ ફરક પડતો નથી.

ઈસ્લામાબાદમાં મંત્રણાનો બીજો દોર:

ગયા અઠવાડિયે અમેરિકી ઉપરાષ્ટ્રપતિ જે ડી વેન્સે ઈસ્લામાબાદમાં ઈરાની મધ્યસ્થીઓ સાથે વાતચીત કરી હતી, પરંતુ તેમાં કોઈ સફળતા મળી ન હતી. હવે ટ્રમ્પે તેમના મધ્ય પૂર્વના ખાસ દૂત સ્ટીવ વિટકોફ અને જમાઈ જેરેડ કુશનરને મોકલ્યા છે, કારણ કે તેઓ તમામ પક્ષોને સારી રીતે જાણે છે. મંત્રણાનો આ નવો રાઉન્ડ એવા સમયે થઈ રહ્યો છે જ્યારે બે અઠવાડિયાના સીઝફાયરની સમયમર્યાદા ૨૨ એપ્રિલે પૂર્ણ થઈ રહી છે.

નક્કર કાર્યવાહીની ધમકી:

ટ્રમ્પે કહ્યું કે છેલ્લા ૪૭ વર્ષમાં જે કામ અન્ય રાષ્ટ્રપતિઓએ નથી કર્યું તે કરવાની તેમની તૈયારી છે. તેમણે ઉમેર્યું કે હવે 'મિસ્ટર નાઈસ ગાય' બની રહેવાનો સમય પૂરો થયો છે અને ઈરાનની 'કિલિંગ મશીન'નો અંત લાવવાનો સમય આવી ગયો છે. બીજી તરફ, ઈરાને હજુ સુધી આ મંત્રણાના પ્લાન અંગે કોઈ સત્તાવાર પુષ્ટિ કરી નથી. બંને દેશો વચ્ચે સ્ટ્રેટ ઓફ હોર્મુઝ અને ઈરાનની પરમાણુ ક્ષમતાઓને લઈને મડાગાંઠ યથાવત છે.