લંડન : બ્રિટનની રાજધાની લંડનમાંથી ડિજિટલ દુનિયાને હચમચાવી નાખે તેવા મોટા સમાચાર સામે આવ્યા છે. લંડન સ્થિત ગૂગલ ક્લાઉડ (Google Cloud) ની સેવાઓમાં અચાનક મોટો વિક્ષેપ સર્જાવાને કારણે પ્રખ્યાત ડિજિટલ બેંક 'રેવોલ્યુટ' (Revolut) સહિત અનેક નાણાકીય સંસ્થાઓની ઓનલાઈન સેવાઓ ઠપ થઈ ગઈ છે. ગૂગલના સર્વિસ સ્ટેટસ પેજ પર આપવામાં આવેલી માહિતી મુજબ, સ્થાનિક સમય અનુસાર સવારે ૭ વાગ્યાની આસપાસ આ સમસ્યા શરૂ થઈ હતી, જેના કારણે યુરોપ-વેસ્ટ૨ ક્ષેત્રમાં ગૂગલ ક્લાઉડની સેવાઓમાં ભારે ભૂલો અને નેટવર્ક ખોરવાવાની ફરિયાદો ઉઠી હતી.

કંપની દ્વારા આપવામાં આવેલા સ્પષ્ટતા અનુસાર, લંડન વિસ્તારના ડેટા સેન્ટરમાં કોઈ પાવર સંબંધિત ઘટના (power event) બનવાને કારણે આ વિક્ષેપ સર્જાયો હતો. ગૂગલની એન્જિનિયરિંગ ટીમે તાત્કાલિક ધોરણે કામગીરી શરૂ કરીને બપોર પછી મોટાભાગના ક્ષેત્રોમાં સેવાઓ પુનઃસ્થાપિત કરી દીધી હતી, તેમ છતાં આ અચાનક થયેલા ડાઉનટાઇમને કારણે યુઝર્સને ભારે મુશ્કેલીઓનો સામનો કરવો પડ્યો હતો. ગૂગલે આ અસુવિધા માટે સત્તાવાર રીતે માફી પણ માંગી છે.

આ ટેક્નિકલ ખામીની સૌથી માઠી અસર બ્રિટિશ ડિજિટલ બેંક રેવોલ્યુટ પર જોવા મળી હતી. બેંકના ગ્રાહકોને કાર્ડ પેમેન્ટ્સ કરવામાં, બેંક કાર્ડ દ્વારા બેલેન્સ ટોપ-અપ કરવામાં, એટીએમમાંથી રોકડ ઉપાડવામાં તેમજ કરન્સી એક્સચેન્જ જેવી મહત્વપૂર્ણ સેવાઓમાં ભારે મુશ્કેલીઓ નડી હતી. જો કે, રેવોલ્યુટે સોશિયલ મીડિયા પ્લેટફોર્મ 'એક્સ' પર સ્પષ્ટતા કરતા જણાવ્યું હતું કે તેમના તમામ ગ્રાહકોના નાણાં અને ડેટા સંપૂર્ણપણે સુરક્ષિત છે અને સેવાઓ પૂર્વવત કરવાના પ્રયાસો ચાલુ છે.

વપરાશકર્તાઓની ઓનલાઈન ગતિવિધિઓ પર નજર રાખતી વેબસાઇટ 'ડાઉનડિટેક્ટર' અનુસાર, આ સમયગાળા દરમિયાન એચએસબીસી, બાર્કલેઝ અને લોયડ્સ બેંક જેવી અગ્રણી બેંકોની વેબસાઇટ્સ અને એપ્લિકેશન્સમાં પણ અવરોધો ઊભા થયા હતા, જ્યારે આઇએનજી જર્મનીએ પણ લોગ-ઇન કરવામાં મુશ્કેલીઓ આવ્યાની પુષ્ટિ કરી હતી. બેયસ બિઝનેસ સ્કૂલના પ્રોફેસર ફેંગ લીએ આ ઘટના અંગે પ્રતિક્રિયા આપતા જણાવ્યું હતું કે આ કટોકટી એ વાતની ગંભીર યાદ અપાવે છે કે આપણી આખી વૈશ્વિક અર્થવ્યવસ્થા ગણ્યા-ગાંઠ્યા ક્લાઉડ પ્રોવાઇડર્સ પર કેટલી હદે નિર્ભર બની ચૂકી છે, જ્યાં એક નાની ટેક્નિકલ ખામી પણ આખી સિસ્ટમને અસ્થિર કરી શકે છે.