​નવી દિલ્હી: ભારત સામેની વન-ડે મેચમાં વેસ્ટ ઈન્ડિઝે ૩૫૨ રનનો રકોર્ડબ્રેક ટાર્ગેટ ચેઝ કરીને ક્રિકેટ જગતને ચોંકાવી દીધું છે. કપ્તાન શાઈ હોપે અણનમ ૧૬૨ રનની વિસ્ફોટક ઈનિંગ રમીને પોતાની ટીમને સનસનાટીભરી જીત અપાવી હતી. પરંતુ આ અશક્ય લાગતા લક્ષ્યાંકને પ્રાપ્ત કર્યા બાદ શાઈ હોપે જે સિક્રેટ શેર કર્યું છે તેણે ભારતીય ફેન્સના દિલ જીતી લીધા છે. મેચ પૂરી થયા બાદ હોપે ખુલાસો કર્યો હતો કે આ ઐતિહાસિક જીત પાછળ ભારતીય ક્રિકેટના મહાન પૂર્વ કપ્તાન મહેન્દ્ર સિંહ ધોની (MS Dhoni)ની એક ખાસ સલાહનો મોટો હાથ રહ્યો હતો.  

​મળતી માહિતી મુજબ, ૩૫૩ રનનો પહાડ જેવા લક્ષ્યાંકનો પીછો કરતી વખતે વેસ્ટ ઈન્ડિઝની ટીમ દબાણમાં હતી. આ પરિસ્થિતિમાં કેપ્ટન શાઈ હોપે અત્યંત સંયમ અને ચતુરતાપૂર્વક બેટિંગ કરી હતી. મેચ પૂરી થયા પછી વાતચીત દરમિયાન હોપે જણાવ્યું હતું કે, "મહાન ખેલાડી એમ.એસ. ધોની સાથે મારી એક વખત ખાસ મુલાકાત અને વાતચીત થઈ હતી. તેમણે મને કહ્યું હતું કે 'મેદાન પર રમતી વખતે અથવા લક્ષ્યાંકનો પીછો કરતી વખતે તમારી પાસે તમે વિચારતા હો તેના કરતાં હંમેશા વધુ સમય હોય છે'. માહીની આ એક વાત મેં મનમાં બંધાઈ લીધી હતી."  

​હોપે ઉમેર્યું કે ભારત સામેના આ મોટા રન ચેઝ દરમિયાન તેણે ક્યારેય ઉતાવળ કરી નહોતી અને લક્ષ્યાંકને નાના-નાના ભાગોમાં વહેંચીને રણનીતિ બનાવી હતી. જ્યારે ટીમ પર રનરેટનું દબાણ વધી રહ્યું હતું ત્યારે ધોનીનો આ જ 'કૂલ મંત્ર' કામ આવ્યો અને તેણે છેલ્લી ઓવરો સુધી શાંત રહીને ભારત પાસેથી જીત છીનવી લીધી હતી.
​ભારતીય ટીમ સામે કેરેબિયન કપ્તાને ફટકારેલી આ યાદગાર સદી અને રેકોર્ડ રન ચેઝે ક્રિકેટ ચાહકોને ધોનીના ફિનિશિંગ ટચની યાદ અપાવી દીધી છે. ખુદ શાઈ હોપે પણ પોતાની કારકિર્દીના આ શ્રેષ્ઠ પ્રદર્શન માટે 'કેપ્ટન કૂલ' ધોનીના માર્ગદર્શનનો જાહેરમાં આભાર માન્યો હતો.