પ્રયાગરાજ તા.૨૯: અલ્‍હાબાદ હાઈકોર્ટે એક મહત્‍વપૂર્ણ નિર્ણયમાં જણાવ્‍યું છે કે પુખ્‍ત વયના લોકો વચ્‍ચે સંમતિથી બંધાયેલા લાંબા ગાળાના શારીરિક સંબંધોને બળાત્‍કાર ગણી શકાય નહીં. આઝમગઢના એક કેસમાં આરોપીને આગોતરા જામીન આપતા કોર્ટે નોંધ્‍યું કે પીડિતાના મેડિકલ રિપોર્ટ અને નિવેદનોમાં પરસ્‍પર સંમતિથી સંબંધ હોવાનું જણાય છે, જ્‍યારે FIR માં બંદૂકની અણીએ બળાત્‍કારનો આરોપ લગાવવામાં આવ્‍યો હતો. કોર્ટે આ વિરોધાભાસને આધારે આરોપીની ધરપકડ પર રોક લગાવી છે.

આ કેસની વિગતો મુજબ, આરોપી સામે આઝમગઢના સિધારી પોલીસ સ્‍ટેશનમાં BNS (ભારતીય ન્‍યાય સંહિતા) ની કલમ ૬૪, ૧૧૫(૨) અને ૩૫૧(૩) હેઠળ FIR નોંધવામાં આવી હતી. પીડિતા જે ૩૫ વર્ષની વિધવા છે અને તેને ૧૫ વર્ષનો પુત્ર છે, તેણે આક્ષેપ કર્યો હતો કે આરોપીએ તેની મરજી વિરુદ્ધ બંદૂકની અણીએ તેની સાથે દુષ્‍કર્મ ગુજાર્યું હતું. જોકે, આરોપીએ આ ધરપકડથી બચવા માટે હાઈકોર્ટમાં આગોતરા જામીનની માંગ કરી હતી અને દલીલ કરી હતી કે તેને ખોટી રીતે ફસાવવામાં આવ્‍યો છે.

સુનાવણી દરમિયાન આરોપીના વકીલે દલીલ કરી હતી કે પીડિતા અને આરોપી વચ્‍ચે લાંબા સમયથી પ્રેમ સંબંધ હતો. કોર્ટે નોંધ્‍યું કે BNSS ની કલમ ૧૮૩ હેઠળ નોંધાયેલા પીડિતાના નિવેદનમાં તેણે સ્‍વીકાર્યું હતું કે તે વર્ષ ૨૦૨૨ થી આરોપી સાથે ફોન પર વાત કરતી હતી અને તેમની વચ્‍ચે શારીરિક સંબંધો પણ બંધાયા હતા. આ નિવેદન પોલીસમાં નોંધાયેલી FIR કરતા તદ્દન અલગ હતું. FIR માં ક્‍યાંય પણ અગાઉના સંબંધોનો ઉલ્‍લેખ કરવામાં આવ્‍યો ન હતો, જે પ્રોસિક્‍યુશનની વાર્તા પર શંકા પેદા કરે છે.

મેડિકલ તપાસ દરમિયાન ડોક્‍ટર સમક્ષ આપેલા નિવેદનમાં પણ પીડિતાએ સ્‍વીકાર્યું હતું કે તે અને આરોપી ૨૦૨૪ થી રિલેશનશિપમાં હતા. હાઈકોર્ટે આ તમામ તથ્‍યોને ધ્‍યાનમાં રાખીને કહ્યું કે જ્‍યારે બંને પક્ષો પુખ્‍ત હોય અને લાંબા સમય સુધી સંબંધમાં રહ્યા હોય, ત્‍યારે અચાનક તેને બળાત્‍કાર તરીકે લેબલ કરી શકાય નહીં. ખાસ કરીને જ્‍યારે પીડિતાના અલગ-અલગ તબક્કે આપેલા નિવેદનોમાં એકરૂપતાનો અભાવ હોય.

સરકારી વકીલ દ્વારા આ જામીન અરજીનો વિરોધ કરવામાં આવ્‍યો હતો અને દલીલ કરવામાં આવી હતી કે આરોપીએ મહિલાની લાચારીનો ફાયદો ઉઠાવ્‍યો છે. જોકે, અદાલતે તમામ પાસાઓની ચકાસણી કર્યા બાદ ઠેરવ્‍યું કે પ્રથમ લ્લષ્ટિએ આ મામલો પરસ્‍પર સંમતિનો જણાય છે. આરોપીનો કોઈ પૂર્વ ગુનાહિત ઈતિહાસ ન હોવાને કારણે અને તપાસમાં સહકાર આપવાની શરતે કોર્ટે તેની આગોતરા જામીન અરજી મંજૂર કરી હતી. આ ચુકાદો સહમતિથી બંધાયેલા સંબંધો અને કાયદાકીય જોગવાઈઓ વચ્‍ચેના ભેદને વધુ સ્‍પષ્ટ કરે છે.