નવી દિલ્હી કેન્દ્રીય ગૃહ અને સહકારિતા મંત્રી અમિતભાઈ શાહે કોંગ્રેસના નેતા રાહુલ ગાંધી અને વિપક્ષી પાર્ટીઓ પર આકરા પ્રહાર કર્યા છે. ચૂંટણી આયોગ અને મુખ્ય ચૂંટણી કમિશનર (CEC) જ્ઞાનેશ કુમાર વિરુદ્ધ વિપક્ષના તાજેતરના વિરોધ પ્રદર્શન અંગે બોલતાં ગૃહ મંત્રીએ સ્પષ્ટ શબ્દોમાં જણાવ્યું હતું કે વિપક્ષની નકારાત્મક રાજનીતિના કારણે આગામી ૩૦ વર્ષ સુધી તેમની સરકાર ક્યારેય નહીં બને. પોતાના જન્મદિવસના અવસરે દિલ્હીમાં યમુના પુનરુદ્ધાર પરિયોજના સંબંધિત મહત્વપૂર્ણ પ્રોજેક્ટ્સના લોકાર્પણ અને ભૂમિપૂજન કાર્યક્રમમાં બોલતી વખતે તેમણે આ ટિપ્પણી કરી હતી.

દોગલા માપદંડ અને ચૂંટણી પ્રણાલી પર પ્રહાર:
રાહુલ ગાંધી અને કોંગ્રેસને આડેહાથ લેતા અમિત શાહે જણાવ્યું હતું કે જ્યારે કેરળ, તેલંગાણા, હિમાચલ પ્રદેશ કે તમિલનાડુ જેવા રાજ્યોમાં ચૂંટણી જીતી જવાય ત્યારે મતદાર યાદી, ઇવીએમ (EVM) અને ચૂંટણી પંચ સારા લાગે છે, પરંતુ જ્યાં હારનો સામનો કરવો પડે ત્યાં પંચ પર સવાલો ઉઠાવવામાં આવે છે. તેમણે કટાક્ષ કર્યો કે અદાલતના નિર્ણયો પણ પોતાના પક્ષમાં આવે તો ન્યાયતંત્ર સારું અને વિરુદ્ધ આવે તો ખરાબ, આવા બેવડા ધોરણો હવે દેશની જનતા સમક્ષ ઉજાગર થઈ ચૂક્યા છે. થોડા રાજ્યોમાંથી કાર્યકરોને બોલાવીને દિલ્હીમાં પ્રદર્શન કરવાથી જનતાના જનાદેશને નકારી શકાતો નથી.

ગૃહ મંત્રીએ વધુમાં ઉમેર્યું હતું કે તેઓ દેશની જનતા વચ્ચે રહે છે અને જનતા બધું જ જોઈ રહી છે. વિપક્ષી નેતાઓ વિદેશમાં બેસીને આ પ્રકારના આક્ષેપો કરે છે, પરંતુ જ્યારે તેઓ દિલ્હી પાછા ફરે ત્યારે આ હકીકત સ્વીકારવી પડશે કે આગામી ત્રણ દાયકા સુધી તેમનું શાસન આવવાનું નથી.

યમુના સફાઈ અને પુનરુદ્ધારની કામગીરી:
પોતાના જન્મદિવસના વિશેષ દિવસે દિલ્હીવાસીઓને ભેટ આપતા અમિત શાહે યમુના નદીના પુનરુદ્ધાર પ્રોજેક્ટ્સનું લોકાર્પણ અને ભૂમિપૂજન કર્યું હતું. આ પ્રસંગે તેમણે જણાવ્યું કે વડાપ્રધાન નરેન્દ્ર મોદીના માર્ગદર્શન હેઠળ દિલ્હીમાં સરકાર બન્યા બાદ માત્ર એક જ મહિનામાં ઉચ્ચ સ્તરીય બેઠક યોજીને યમુનાજીની સફાઈનો સંકલ્પ લેવાયો હતો. તેમને એ વાતનો આનંદ છે કે ટૂંકા સમયગાળામાં જ ૪૦ ટકાથી વધુ કાંપ (સિલ્ટ) કાઢવાની કામગીરી સફળતાપૂર્વક પૂર્ણ કરી દેવામાં આવી છે.