નવી દિલ્હી, તા.૦૬: વિદેશમાં વસતા ઓવરસીઝ સિટિઝન્સ ઓફ ઈન્ડિયા (OCI) કાર્ડધારકો માટે ભારત સરકારે એક અત્યંત મહત્વપૂર્ણ અને રાહતજનક નિર્ણય લેતાં ઓનલાઈન પાસપોર્ટ વિગતો અપડેટ કરવામાં થયેલા વિલંબ બદલ આકારવામાં આવતી ૨૫ યુએસ ડોલર (USD) ની વિલંબ ફી (લેટ ફી) આગામી બે મહિના માટે સંપૂર્ણપણે માફ કરી દીધી છે.

બ્યુરો ઓફ ઈમિગ્રેશન (BOI) દ્વારા જાહેર કરાયેલી સૂચના મુજબ, આ એક વખતની વિશેષ રાહત ૧ નવેમ્બરથી ૩૧ ડિસેમ્બર, ૨૦૨૬ દરમિયાન 'e-OCI' પોર્ટલ મારફતે સબમિટ કરવામાં આવતી પાસપોર્ટ વિગત અપડેટની તમામ નવી અરજીઓ પર લાગુ થશે, જેથી નિર્ધારિત સમયમર્યાદા ચૂકી ગયેલા કાર્ડધારકો વધારાના દંડ વગર પોતાની વિગતો અપડેટ કરી શકશે.

સરકારે આ નિર્ણયની સાથે મુસાફરી અંગે પણ મોટું સ્પષ્ટીકરણ આપતાં જણાવ્યું છે કે, જે OCI કાર્ડધારકોની પાસપોર્ટ વિગતો અપડેટ કરવાની અરજીઓ હાલ પ્રક્રિયા હેઠળ (Under Process) હોય, તેમણે ભારત આવવા કે વિદેશ જવા માટે અરજી પૂર્ણ થવાની રાહ જોવાની જરૂર નથી અને તેમના પર મુસાફરી અંગે કોઈ કાનૂની પ્રતિબંધ રહેશે નહીં.

જોકે, ઈમિગ્રેશન તંત્ર દ્વારા સ્પષ્ટ સલાહ આપવામાં આવી છે કે પ્રક્રિયા હેઠળની અરજીઓ સાથે મુસાફરી કરતી વખતે અરજદારોએ પોતાની સાથે જૂનો પાસપોર્ટ, નવો પાસપોર્ટ અને મૂળ OCI કાર્ડ એમ ત્રણેય દસ્તાવેજો સાથે રાખવા ફરજિયાત રહેશે જેથી એરપોર્ટ પર કોઈ ટેકનિકલ કે વહીવટી મુશ્કેલી ઊભી ન થાય.

આ ઉપરાંત, સરકારે સ્પષ્ટતા કરી છે કે નામ, રાષ્ટ્રીયતા, માતા-પિતાના નામ કે જીવનસાથીના નામમાં ફેરફાર જેવી વ્યક્તિગત વિગતો (Personal Particulars) ના સુધારા માટે સામાન્ય પાસપોર્ટ અપડેટ ગણાશે નહીં, પરંતુ તેના માટે 'Updation of Personal Particulars' શ્રેણી હેઠળ અલગથી અરજી કરવી પડશે.
 

ભારતીય મૂળના વિદેશી નાગરિકોને ભારતમાં અનિશ્ચિત સમય માટે રહેવાની, કામ કરવાની અને અભ્યાસ કરવાની સુવિધા આપતા OCI દરજ્જા ધરાવતા લાખો નાગરિકો માટે આ દંડ મુક્તિ એક ઉત્તમ તક સાબિત થશે, જેથી તમામ પાત્ર કાર્ડધારકોને ૩૧ ડિસેમ્બરની અંતિમ તારીખ પહેલાં આ પ્રક્રિયા પૂર્ણ કરવા જણાવાયું છે.