મુંબઈ, તા.૧૬: મુંબઈની લાઈફલાઈન ગણાતી લોકલ ટ્રેનો અને રેલવે સ્ટેશનોની સુરક્ષા સંભાળતી ગવર્મેન્ટ રેલ્વે પોલીસ (GRP) ની છબી ખરડાય તેવો ગંભીર કિસ્સો બોરીવલી રેલવે સ્ટેશન પર સામે આવ્યો છે. સામાનમાં ગેરકાયદેસર ડ્રગ્સ લઈને મુસાફરી કરી રહેલા એક પેસેન્જરને પકડીને તેની પાસેથી ₹૨.૪૦ લાખની મજબૂત લાંચ લઈને તેને જવા દેવા બદલ બોરીવલી GRP ના બે કોન્સ્ટેબલોને તાત્કાલિક અસરથી સસ્પેન્ડ કરી દેવામાં આવ્યા છે.

CCTV વગરના ખાનગી રૂમમાં ખંડણીનો ખેલ પાડ્યો

સસ્પેન્ડ કરવામાં આવેલા કોન્સ્ટેબલોની ઓળખ લોરેન્સ નવઘરે અને રાકેશ સોનાવણે તરીકે થઈ છે. ૮ સપ્ટેમ્બરની રાત્રે આ બંને કોન્સ્ટેબલોએ સ્ટેશન પર તપાસ દરમિયાન ડ્રગ્સ સાથે એક મુસાફરને ઝડપી પાડ્યો હતો. પરંતુ તેને પોલીસ સ્ટેશને લઈ જવા કે વરિષ્ઠ અધિકારીઓને જાણ કરવાના બદલે, તેઓ મુસાફરને પ્લેટફોર્મ નંબર ૩ પર આવેલી એક લાઈબ્રેરી રૂમમાં લઈ ગયા હતા. આ રૂમમાં લાગેલો CCTV કેમેરો બંધ હતો, જે પોલીસ કર્મચારીઓએ ખાનગી રીતે લગાવ્યો હતો. ત્યાં મુસાફરને ધમકાવી ₹૨.૪૦ લાખની તોડબાજી કરી તેને રવાના કરી દેવાયો હતો.

વરિષ્ઠ અધિકારીઓની તપાસમાં ઉલ્લંઘન સાબિત થયું

GRP ના વરિષ્ઠ અધિકારીઓને ગુપ્ત સૂત્રો દ્વારા આ કૌભાંડની ગંધ આવતાં જ પ્રાથમિક તપાસના આદેશ અપાયા હતા. મુંબઈ GRP કમિશનર એમ. રાકેશ કલાસાગરની માર્ગદર્શિકા મુજબ, કોઈપણ શંકાસ્પદ તપાસ કેમેરાની દેખરેખ હેઠળ અને વરિષ્ઠોની જાણમાં જ થવી જોઈએ. પરંતુ આ બંને કોન્સ્ટેબલોએ નિરીક્ષણ રજિસ્ટરમાં નોંધ કર્યા વિના, વરિષ્ઠોને અંધારામાં રાખીને નીતિ-નિયમોનું સરેઆમ ઉલ્લંઘન કર્યું હોવાનું સાબિત થતાં તેમને સસ્પેન્ડ કરાયા હતા.

ગુટખા હેરફેર કેસમાં વધુ બે કોન્સ્ટેબલ સસ્પેન્ડ

આ વિવાદ શાંત થાય તે પહેલાં જ, પ્રતિબંધિત ગુટખાના જથ્થાની ગેરકાયદે હેરફેરમાં મદદ કરવા બદલ બોરીવલી GRP ના અનિલ ગુજર અને વસઈ GRP ના તુષાર ઠાકુર નામના વધુ બે કોન્સ્ટેબલોને પણ સસ્પેન્ડ કરી દેવાતાં રેલવે પોલીસ બેડામાં ભારે ખળભળાટ મચી ગયો છે.

રેલવે મુસાફર અધિકાર કાર્યકર સમીર ઝવેરીએ આ ઘટના અંગે આક્રોશ વ્યક્ત કરતાં જણાવ્યું છે કે, પોલીસની તોડબાજી અને ભ્રષ્ટાચાર રોકવા માટે દરેક રેલવે ઓફિસમાં ફરજિયાત CCTV અને ફરજ પરના તમામ કર્મચારીઓ માટે 'બોડી કેમેરા' અનિવાર્ય બનાવવો જોઈએ.