નવી દિલ્હી, તા.૧૦: પોતાની અદભુત કોમેડીથી કરોડો દર્શકોને હસાવનારા બોલિવૂડના જાણીતા અભિનેતા રાજપાલ યાદવ માટે કાયદાકીય મુશ્કેલીઓ ખૂબ જ વધી ગઈ છે. એક જૂના નાણાકીય વિવાદ અને છેતરપિંડીના કેસની સુનાવણી દરમિયાન દિલ્હી હાઈકોર્ટના ન્યાયાધીશ (જસ્ટિસ) સ્વરણ કાંતા શર્માએ કડક વલણ અપનાવતા રાજપાલ યાદવને જેલ ભેગા કરવાનો આદેશ આપ્યો છે. કોર્ટે સ્પષ્ટ શબ્દોમાં જણાવ્યું કે આ મામલે અભિનેતાને પોતાની ભૂલ સુધારવા અને કાનૂની જવાબદારીઓ પૂરી કરવા માટે પૂરતો સમય અને અનેક તકો આપવામાં આવી હતી, પરંતુ તેમણે તેનો યોગ્ય ઉપયોગ કર્યો નહીં.
શું છે સમગ્ર મામલો?
આ વિવાદ વર્ષ ૨૦૧૦નો છે, જ્યારે રાજપાલ યાદવે દિગ્દર્શક તરીકે પોતાની ફિલ્મ 'અતા પતા લાપતા' બનાવવા માટે દિલ્હીના એક ઉદ્યોગપતિ પાસેથી આશરે ₹૫ કરોડની લોન લીધી હતી. આ લોનની ચૂકવણી માટે રાજપાલ યાદવ દ્વારા આપવામાં આવેલા ચેક બેંકમાં બાઉન્સ થયા હતા. ત્યારથી આ કેસ કોર્ટમાં ચાલી રહ્યો હતો. અગાઉ પણ આ મામલે સમજૂતી કરવા અને લેણાં નાણાં ચૂકવવા માટે કોર્ટે તેમને રાહત આપી હતી, પરંતુ વારંવાર વાયદા કરવા છતાં રકમની ચૂકવણી કરવામાં ન આવતા મામલો ગંભીર બન્યો હતો.
જજ સ્વરણ કાંતા શર્માની કડક ટિપ્પણી
સુનાવણી દરમિયાન જસ્ટિસ સ્વરણ કાંતા શર્માએ કાનૂની પ્રક્રિયાની મજાક ઉડાવવા બદલ અભિનેતા સામે નારાજગી વ્યક્ત કરી હતી. કોર્ટે નોંધ્યું કે:
"કોઈપણ વ્યક્તિ કાયદાથી ઉપર નથી. રાજપાલ યાદવને કોર્ટ દ્વારા વારંવાર લાંબો સમય અને ઘણી તકો આપવામાં આવી હતી જેથી તેઓ આ નાણાકીય વિવાદનો ઉકેલ લાવી શકે. પરંતુ તેમની તરફથી સતત બેદરકારી જોવા મળી છે. હવે કોર્ટ આ મામલે વધુ ઢીલ આપી શકે નહીં."
કાનૂની ગાળિયો મજબૂત થતાં બોલિવૂડમાં ખળભળાટ
રાજપાલ યાદવ જેવા લોકપ્રિય કલાકારને જેલની સજા થવાના સમાચાર વાયુવેગે ફેલાઈ જતાં બોલિવૂડ ઇન્ડસ્ટ્રી સહિત તેમના ચાહકોમાં મોટો આંચકો લાગ્યો છે. અગાઉ પણ આ કેસમાં કસ્ટડીની નોબત આવી હતી, પરંતુ દર વખતે તેઓ કાનૂની રાહત મેળવવામાં સફળ રહ્યા હતા. જોકે, આ વખતે દિલ્હી હાઈકોર્ટે કડક વલણ અપનાવીને સ્પષ્ટ સંકેત આપ્યો છે કે આર્થિક ગુનાઓ અને કોર્ટના આદેશોની અવમાનનાને હળવાશથી લેવામાં નહીં આવે. ફિલ્મી પડદે લોકોને હસાવનારા રાજપાલ યાદવ માટે અત્યારે રિયલ લાઈફમાં રડવાનો વારો આવ્યો છે.