મુંબઈ: તા.૦૮ સપ્તાહના છેલ્લા ટ્રેડિંગ દિવસે ભારતીય શેરબજારમાં ભારે ઉતાર-ચઢાવ વચ્ચે મંદીનો માહોલ જોવા મળ્યો હતો. નબળા વૈશ્વિક સંકેતો અને પ્રોફિટ બુકિંગને કારણે બેન્ચમાર્ક સૂચકાંકો ઘટાડા સાથે બંધ થયા હતા. BSE સેન્સેક્સ 516.33 પોઈન્ટ્સ અથવા 0.66 ટકા ઘટીને 77,328.19 પર સ્થિર થયો હતો, જ્યારે નિફ્ટી 50 ઇન્ડેક્સ 150.50 પોઈન્ટ્સ અથવા 0.62 ટકાના ઘટાડા સાથે 24,176.15 ના સ્તરે બંધ રહ્યો હતો.
બજારના જાણીતા નિષ્ણાત અનિલ સિંઘવીના જણાવ્યા અનુસાર, બજારમાં આ ઘટાડા પાછળ અનેક પરિબળો જવાબદાર છે. અમેરિકા અને ઈરાન વચ્ચે વધતા તણાવને કારણે ક્રૂડ ઓઈલના ભાવ પ્રતિ બેરલ 100 ડોલરની નજીક પહોંચી ગયા છે, જે ભારત જેવા આયાત નિર્ભર દેશ માટે ચિંતાનો વિષય છે. આ ઉપરાંત, ડોલર સામે રૂપિયાની સતત નબળાઈએ પણ રોકાણકારોનો ઉત્સાહ ઠંડો પાડ્યો છે. સપ્તાહના અંતે ટ્રેડર્સ સાવચેતીના ભાગરૂપે નવી ખરીદી કરવાને બદલે નફો વસૂલવાનું વધુ પસંદ કરી રહ્યા છે.
બેન્કિંગ ક્ષેત્રમાં સ્ટેટ બેંક ઓફ ઈન્ડિયા (SBI) ના નબળા ત્રિમાસિક પરિણામોએ પણ બજાર પર દબાણ વધાર્યું હતું, જેના કારણે નિફ્ટી બેંક ઇન્ડેક્સમાં ગાબડું પડ્યું હતું. સિંઘવીએ રોકાણકારોને સલાહ આપી છે કે જ્યાં સુધી નિફ્ટી 24,000 ની નીચે બંધ ન થાય ત્યાં સુધી ગભરાવાની જરૂર નથી. અત્યારે બજારમાં 'બાય ઓન ડિપ્સ' એટલે કે ઘટાડે ખરીદી કરવાની વ્યૂહરચના અપનાવી શકાય છે, પરંતુ મિડ-કેપ અને સ્મોલ-કેપ શેરોમાં અત્યારે આક્રમક ખરીદી ટાળીને સોમવાર સુધી રાહ જોવી હિતાવહ છે.
નિષ્ણાતોના મતે, હવે બજારની નજર સોમવારે ખુલતા વૈશ્વિક સંકેતો પર રહેશે. જો નિફ્ટી 24,350 ની સપાટી પાર કરે તો જ બજારમાં ફરી તેજીની નવી લહેર જોવા મળી શકે છે. ત્યાં સુધી રોકાણકારોએ સાવધ રહીને ગુણવત્તાયુક્ત શેરોમાં જ રોકાણ જાળવી રાખવું જોઈએ.