નવી દિલ્હી : વડાપ્રધાન નરેન્દ્ર મોદીના જાહેર જીવન અને જનસેવાના ૨૫ વર્ષ પૂર્ણ થવાના અવસરે ભારતીય જનતા પાર્ટી (BJP) દ્વારા આવનારી ૧૭ સપ્ટેમ્બરથી સમગ્ર દેશમાં વ્યાપક સ્તરે 'સેવા સંકલ્પ અભિયાન' હાથ ધરવામાં આવી રહ્યું છે. "જાહેર સેવા એ જ પ્રભુ સેવા" ના મંત્ર સાથે યોજાનારા આ અભિયાન હેઠળ ૧૨ મુખ્ય રાષ્ટ્રીય કાર્યક્રમોનું આયોજન કરવામાં આવ્યું છે. આ તમામ કાર્યક્રમોને સફળ બનાવવા અને સમગ્ર દેશમાં જનભાગીદારી સુનિશ્ચિત કરવા માટે ભાજપ હાઈકમાન્ડે ૧૨ વરિષ્ઠ નેતાઓ અને પદાધિકારીઓને પ્રભારી તરીકેની વિશેષ જવાબદારીઓ સોંપી દીધી છે.

 

આ અભિયાન અંતર્ગત દેશભરમાં સુશાસન, વિકસિત ભારત, સામાજિક સેવા અને નવીનતા (ઈનોવેશન) ને લગતી વિવિધ પ્રવૃત્તિઓનું આયોજન કરવામાં આવશે. કેન્દ્રીય મંત્રીઓ, રાષ્ટ્રીય મહાસચિવો, સાંસદો અને રાજ્યોના વરિષ્ઠ નેતાઓને અલગ-અલગ કાર્યક્રમોનું સુકાન સોંપવામાં આવ્યું છે જેથી કરીને પીએમ મોદીના ૨૫ વર્ષના સેવાકાર્યનો સંદેશાત્મક પ્રભાવ છેવાડાના માનવી સુધી પહોંચાડી શકાય.

 

કોને કયા મહત્વના કાર્યક્રમની સોંપાઈ જવાબદારી?

 

• સેવા જ્યોતિ કળશ યાત્રા: કેન્દ્રીય મંત્રી મનસુખ માંડવિયા અને ગુજરાતના નાયબ મુખ્યમંત્રી હર્ષ સંઘવી આ સંકલ્પ યાત્રાનું નેતૃત્વ કરશે.

 

• વડનગરથી વારાણસી સેવા યાત્રા: વી.ડી. શર્મા અને બીજેવાયએમના રાષ્ટ્રીય પ્રમુખ હેમાંગ જોશી વડાપ્રધાનના જન્મસ્થળથી સંસદીય ક્ષેત્ર સુધીની આ ખાસ યાત્રા સંભાળશે.

 

• આંગન મિલન સેવા: રાષ્ટ્રીય મહાસચિવ સ્મૃતિ ઈરાની આ જનસંપર્ક કાર્યક્રમના પ્રભારી રહેશે.

 

• આશીર્વાદ કા દિયા: કેન્દ્રીય મંત્રી મનસુખ માંડવિયા આ કાર્યક્રમની દેખરેખ રાખશે.

 

• સુશાસન સેવા સંવાદ: ભાજપના રાષ્ટ્રીય મહાસચિવ સુનિલ બંસલ આ સંવાદ કાર્યક્રમનું સંચાલન કરશે.

 

• મેરે સપના કા ભારત (ચિત્ર સેવા): યુવા સાંસદ તેજસ્વી સૂર્યા અને મૃગાંક દેવ બર્મન આ સ્પર્ધાત્મક કાર્યક્રમનું નેતૃત્વ કરશે.

 

• સેવા ફર્સ્ટ ઇનોવેશન ચેલેન્જ: કેરળ ભાજપ પ્રમુખ રાજીવ ચંદ્રશેખરને આ ટેકનોલોજી અને ઈનોવેશન આધારિત કાર્યક્રમ સોંપવામાં આવ્યો છે.

 

આ ઉપરાંત, 'સેવા સેતુ અભિયાન' બેજયંત પાંડા અને અસીમ ગોયલને, જ્યારે 'સેવા કી કહાની' અને 'સેવા મેરા યોગદાન' ની જવાબદારી છત્તીસગઢના નાણામંત્રી ઓ.પી. ચૌધરીને સોંપવામાં આવી છે. પાર્ટીના તમામ મોરચાઓ અને કાર્યકરો આ અભિયાનને સફળ બનાવવા માટે અત્યારથી જ તૈયારીઓમાં જૂટી ગયા છે.