દુબઈ :  સંયુક્ત આરબ અમીરાત (UAE) માં વસવાટ કરતા લાખો ભારતીય નાગરિકો માટે એક અત્યંત રાહતજનક અને મહત્વપૂર્ણ સમાચાર સામે આવ્યા છે. સુપ્રીમ કોર્ટના વચગાળાના આદેશ બાદ પાસપોર્ટ રિન્યુઅલ, નવા પાસપોર્ટ અરજીઓ, વિઝા પ્રોસેસિંગ અને પાવર ઓફ એટોર્ની સહિતની દસ્તાવેજ ચકાસણી સેવાઓ પુનઃ પૂર્ણ ક્ષમતા સાથે શરૂ થઈ ગઈ છે. કાનૂની વિવાદોના કારણે સેવાઓ ખોરવાઈ જવાની ભીતિ વચ્ચે હવે સમગ્ર યુએઈમાં ૧૬ નવા ભારતીય કોન્સ્યુલર એપ્લિકેશન સેન્ટર્સ કાર્યરત કરી દેવામાં આવ્યા છે, જેનાથી ભારતીય સમુદાયે મોટો રાહતનો શ્વાસ લીધો છે.

આ નવી વ્યવસ્થા હેઠળ, તમામ કોન્સ્યુલર સેવાઓની જવાબદારી હવે નવા સેવા પ્રદાતા 'અલ હિંદ ટુર્સ એન્ડ ટ્રાવેલ્સ' ને સોંપવામાં આવી છે, જે ૨૨ જુલાઈથી અમલમાં આવી ચૂકી છે. દુબઈ સ્થિત ભારતીય કોન્સ્યુલેટ જનરલના જણાવ્યા અનુસાર, સેવાઓનો લાભ લેવા માટે અરજદારોએ હવે કોઈપણ કેન્દ્રની મુલાકાત લેતા પહેલાં 'Consular Services in UAE' ના અધિકૃત પોર્ટલ પર જઈને ઓનલાઈન એપોઈન્ટમેન્ટ લેવી ફરજિયાત રહેશે. અગાઉના આઉટસોર્સિંગ એજન્સીઓ (BLS ઈન્ટરનેશનલ અને SGIVS ગ્લોબલ) સાથેના કરાર ૩૦ જૂન, ૨૦૨૬ના રોજ પૂર્ણ થતાં આ નવો નિર્ણય લેવામાં આવ્યો છે.

ઉલ્લેખનીય છે કે, વિદેશ મંત્રાલય દ્વારા હાથ ધરવામાં આવેલી ટેન્ડર પ્રક્રિયામાં પારદર્શિતાનો અભાવ દર્શાવીને દિલ્હી હાઈકોર્ટે ૧૫ જુલાઈના રોજ ટેકનિકલ મૂલ્યાંકન રદ કર્યું હતું અને નવી ટેન્ડર પ્રક્રિયા હાથ ધરવા નિર્દેશ આપ્યો હતો. આ નિર્ણય બાદ યુએઈમાં રહેતા ભારતીયોમાં પાસપોર્ટ અને વિઝા સેવાઓ અટકી પડવાની ગંભીર ચિંતા ઊભી થઈ હતી. પરંતુ, સુપ્રીમ કોર્ટના સમયસૂચક વચગાળાના આદેશ અને વિદેશ મંત્રાલયની ઝડપી કામગીરીને કારણે ૧૬ કેન્દ્રો પરથી સીમલેસ સેવાઓ શરૂ કરી દેવામાં આવી છે, જેથી દર મહિને આ સેવાઓ પર નિર્ભર હજારો ભારતીયોને મુશ્કેલીનો સામનો કરવો નહીં પડે.