નવી દિલ્હી : વૈશ્વિક આર્થિક અસ્થિરતા અને પડકારો વચ્ચે દેશના આર્થિક મોરચે એક અત્યંત સકારાત્મક સમાચાર સામે આવ્યા છે, જેમાં રેટિંગ એજન્સી મૂડીઝ દ્વારા ચાલુ નાણાકીય વર્ષ માટે ભારતનો આર્થિક વિકાસ દર વધારીને ૭ ટકા અંદાજવામાં આવ્યો છે.

પ્રાપ્ત વિગતો અનુસાર, મૂડીઝે તેના તાજેતરના ‘ગ્લોબલ મેક્રો આઉટલુક’ અહેવાલમાં ભારતની આર્થિક ગતિ અને ઉર્જા પુરવઠાના પ્રભાવ સામેની સ્થિતિસ્થાપકતાની પ્રશંસા કરતા વર્ષ ૨૦૨૬-૨૭ માટેના વૃદ્ધિના અંદાજને અગાઉના ૬.૫ ટકાથી વધારીને સત્તાવાર રીતે ૭ ટકા કરી દીધો છે.

એજન્સીના જણાવ્યા અનુસાર, દેશમાં મજબૂત વપરાશ, રોકાણના પ્રવાહમાં સતત સુધારો અને અર્થતંત્રની મજબૂત પાયાની સ્થિતિને કારણે ભારત મધ્યમ ગાળામાં આ આકર્ષક વૃદ્ધિ દર જાળવી રાખવા માટે સંપૂર્ણપણે સક્ષમ સાબિત થઈ રહ્યું છે.

આ વિકાસની સાથેસાથે છૂટક ફુગાવાળો દર ભારતીય રિઝર્વ બેંકના નિર્ધારિત ૨ થી ૬ ટકાના લક્ષ્યની મર્યાદામાં જળવાઈ રહ્યો છે, જોકે ભવિષ્યમાં નબળા ચોમાસા કે અલ નીનો જેવી સ્થિતિને કારણે કૃષિ ઉત્પાદન અને ગ્રામીણ માંગ પર સંભવિત અસરો સામે સાવચેતી રાખવાની જરૂરિયાત પણ દર્શાવવામાં આવી છે.

નિષ્ણાતોનું માનવું છે કે ખાનગી ક્ષેત્રના સતત વધતા રોકાણથી આગામી સમયમાં ઉત્પાદન ક્ષેત્ર, રોજગારીની તકો અને એકંદર ઉત્પાદકતામાં મોટો ઉછાળો જોવા મળી શકે છે, જે આ અંદાજિત વિકાસ દરને પણ વટાવીને દેશને નવી ઊંચાઈઓ પર લઈ જઈ શકે છે.
 

આર્થિક વિકાસની આ ગતિને અકબંધ રાખવા માટે કેન્દ્રીય બેંક દ્વારા કડક નાણાકીય નીતિઓનું મોનિટરિંગ અને સાવચેતીભર્યા પગલાં લેવામાં આવી રહ્યા છે, જેથી દેશનો આર્થિક વિકાસ સ્થિર અને દીર્ધકાલીન લાભદાયી બની રહે.