કોલકાતા, તા.29: પશ્ચિમ બંગાળની હાઇ-પ્રોફાઇલ નંદીગ્રામ વિધાનસભા પેટાચૂંટણી પહેલાં કોંગ્રેસ પક્ષ માટે ખૂબ જ રાહતજનક સમાચાર સામે આવ્યા છે. કલકત્તા હાઈકોર્ટે મંગળવારે નંદીગ્રામ અને ખેજુરી પોલીસ સ્ટેશનમાં નોંધાયેલા તમામ ૬ ગુનાઓમાં કોંગ્રેસના ઉમેદવાર મિલન પ્રધાનને ૨૮ ઓક્ટોબર સુધીના વચગાળાના જામીન મંજૂર કર્યા છે. મિલન પ્રધાનની ધરપકડ બાદ નંદીગ્રામના રાજકારણમાં ભારે ગરમાવો આવી ગયો હતો, પરંતુ હાઈકોર્ટના આ આદેશ બાદ તેઓ જેલમાંથી બહાર આવીને ચૂંટણી પ્રચારમાં ઝંપલાવી શકશે.

૧૯ વર્ષ જૂના આંદોલનના કેસમાં કાર્યવાહી સામે ઉઠ્યા સવાલો

મિલન પ્રધાનના વકીલ અશફાક અહમદે માધ્યમોને માહિતી આપતાં જણાવ્યું હતું કે, રાજ્ય સરકારે જામીન અરજીનો આકરો વિરોધ કર્યો હતો. જોકે, બચાવ પક્ષે અદાલત સમક્ષ સબળ દલીલ કરી હતી કે જે કેસમાં મિલન પ્રધાનની ધરપકડ કરવામાં આવી છે, તેમાંથી એક કેસ ૧૯ વર્ષ જૂનો છે અને તે ઐતિહાસિક નંદીગ્રામ જમીન અધિગ્રહણ વિરોધી આંદોલન સાથે જોડાયેલો છે. વકીલે આરોપ લગાવ્યો હતો કે તે જ આંદોલનમાં તત્કાલીન સમયના અન્ય નેતાઓ પણ સામેલ હતા જેઓ આજે સત્તામાં છે કે ભાજપમાં છે, છતાં માત્ર કોંગ્રેસના ઉમેદવારને પ્રચાર કરતા રોકવા માટે જ રાજકીય બદલાની ભાવનાથી આ જૂના કેસોમાં કાર્યવાહી કરવામાં આવી હતી.

"સત્ય અને પ્રમાણિકતાની જીત થઈ": શુભંકર સરકાર

કલકત્તા હાઈકોર્ટ તરફથી વચગાળાના જામીન મળ્યા બાદ પશ્ચિમ બંગાળ પ્રદેશ કોંગ્રેસ સમિતિના પ્રમુખ શુભંકર સરકારે તીખી પ્રતિક્રિયા આપતાં કહ્યું કે, "આ ન્યાયતંત્ર અને દેશના કાયદામાં પ્રમાણિકતાની જીત છે. સત્તાધારી પક્ષ કોંગ્રેસના વધતા પ્રભાવથી ડરી ગયો છે. નંદીગ્રામ આંદોલન કરનારા ઘણા લોકો આજે મુખ્યમંત્રી કે મોટા નેતાઓ બનીને ખુલ્લેઆમ ફરી રહ્યા છે, જ્યારે અમારા ઉમેદવારને જેલમાં પૂરવામાં આવ્યા હતા." તેમણે દાવો કર્યો હતો કે નંદીગ્રામની જનતા આ અન્યાયનો જવાબ વોટથી આપશે.

પતિ જેલમાં હોવાથી પત્ની અર્પિતાએ પ્રચારનો મોરચો સંભાળ્યો હતો

ઉલ્લેખનીય છે કે, મિલન પ્રધાન જેલમાં હોવાના કારણે તેમની પત્ની અર્પિતા પ્રધાને કોંગ્રેસના વરિષ્ઠ નેતાઓ સાથે મળીને નંદીગ્રામની ગલીઓમાં ઘરે-ઘરે જઈને પ્રચાર આદર્યો હતો. અર્પિતાએ ભાવુક બનીને આક્ષેપ કર્યો હતો કે, તેમના પતિ કોલેજના સમયથી જ કોંગ્રેસ સાથે જોડાયેલા રહ્યા છે અને તેમણે ક્યારેય પક્ષ બદલ્યો નથી. તેમને ચૂંટણી લડતા અટકાવવા માટે જ ખોટા કેસો ઊભા કરીને જેલમાં ધકેલવામાં આવ્યા હતા. હવે કલકત્તા હાઈકોર્ટના જામીનના આદેશ બાદ નંદીગ્રામ પેટાચૂંટણીનો જંગ વધુ રોમાંચક બનવાની પૂરી શક્યતા છે.