અમદાવાદ: આજના ભાગદોડભર્યા યુગમાં આપણે સ્વાદ પાછળ દોડી રહ્યા છીએ, પણ એ સ્વાદ આપણા શરીરના સૌથી મહત્વના અંગ 'લીવર'ને અંદરથી ખોખલું કરી રહ્યો છે. લેન્સેટના તાજેતરના અહેવાલે દુનિયાભરમાં ફફડાટ મચાવી દીધો છે, કારણ કે વર્ષ 2050 સુધીમાં અંદાજે 2 અબજ લોકો એટલે કે વિશ્વની કુલ વસ્તીના 20% લોકો મેટાબોલિક ડિસફંક્શન-સંકળાયેલ સ્ટીટોટિક લીવર રોગ  થી પીડાતા હશે. આ આંકડા માત્ર સંખ્યા નથી, પણ એક ચેતવણી છે કે આપણી જીવનશૈલી આપણને ધીમા મૃત્યુ તરફ ધકેલી રહી છે. આશ્ચર્યની વાત એ છે કે જે રોગ પહેલા માત્ર વૃદ્ધોમાં જોવા મળતો હતો, તે હવે 35 વર્ષની આસપાસના યુવાનોમાં પણ ઝડપથી ફેલાઈ રહ્યો છે.

આ રોગના વધવા પાછળનું મુખ્ય કારણ આપણો 'વેસ્ટર્ન ડાયેટ' અને અતિશય ખાંડવાળા પીણાં છે. અલ્ટ્રા-પ્રોસેસ્ડ ફૂડ અને ફાસ્ટ ફૂડનું સેવન લીવર પર અસહ્ય દબાણ વધારે છે, જેનાથી લીવરમાં ચરબી જમા થવા લાગે છે. આ એક એવો 'સાયલન્ટ કિલર' છે જેના લક્ષણો શરૂઆતમાં બિલકુલ દેખાતા નથી. જ્યારે વ્યક્તિને થાક, પેટમાં દુખાવો કે સોજા જેવા લક્ષણો અનુભવાય છે, ત્યારે ઘણીવાર લીવરને ગંભીર નુકસાન થઈ ચૂક્યું હોય છે. અભ્યાસ મુજબ, છેલ્લા 30 વર્ષમાં આ રોગના કેસોમાં 143 ટકાનો તોતિંગ વધારો જોવા મળ્યો છે, જે સ્વાસ્થ્ય નિષ્ણાતો માટે ચિંતાનો વિષય છે.

જો આપણે આ ગંભીર સંકટથી બચવું હોય તો આહારમાં આમૂલ પરિવર્તન અનિવાર્ય છે. તેલયુક્ત ખોરાક, પેકેટ ફૂડ અને વધુ પડતી ખાંડનો ત્યાગ કરીને કુદરતી આહાર તરફ વળવું પડશે. નિયમિત કસરત, ચાલવાની આદત અને વજન પર નિયંત્રણ રાખવાથી આ જોખમને ટાળી શકાય છે. નિષ્ણાતો સૂચવે છે કે ટાઇપ-2 ડાયાબિટીસ અને હાઈ બ્લડ પ્રેશર ધરાવતા લોકોએ વધુ સાવધ રહેવું જોઈએ. જો સમયસર પગલાં લેવામાં નહીં આવે, તો ભવિષ્યમાં લીવર ફેલ્યોર અને કેન્સર જેવી જીવલેણ સ્થિતિઓ સામાન્ય બની જશે. સરકારોને પણ વિનંતી કરવામાં આવી છે કે તેઓ જંક ફૂડ પર ટેક્સ વધારે અને લોકોમાં જાગૃતિ લાવે.