મુંબઈ, તા.૧૯: મુંબઈના પ્રથમ નાગરિક એટલે કે મેયર રીતુ તાવડે માટે મંગળવારની સવાર આશા અને ક્ષોભ બંનેની મિશ્ર સાબિત થઈ હતી. મુંબઈમાં આગામી ચોમાસાની તૈયારીઓની સમીક્ષા કરવા અને સરકારી પરિવહનનો ઉપયોગ પ્રોત્સાહિત કરવા નીકળેલા મેયરને ભારે શરમજનક પરિસ્થિતિનો સામનો કરવો પડ્યો હતો. તેમને અને અન્ય ઉચ્ચ અધિકારીઓને લઈને જઈ રહેલી બૃહન્મુંબઈ ઇલેક્ટ્રિક સપ્લાય એન્ડ ટ્રાન્સપોર્ટ (BEST) ની સરકારી બસ સત્તાવાર નિરીક્ષણ પ્રવાસ દરમિયાન જ રસ્તાની વચ્ચે અચાનક બંધ પડી ગઈ હતી. આ ઘટનાને કારણે મેયરના સુનિશ્ચિત કાર્યક્રમોમાં મોડું થયું હતું અને મુંબઈના જાહેર પરિવહનની કથળતી જતી સ્થિતિ ફરી એકવાર ચર્ચાના ચગડોળે ચડી છે.

બૃહન્મુંબઈ મ્યુનિસિપલ કોર્પોરેશન (BMC) દ્વારા ચોમાસા પહેલાના પૂર નિયંત્રણ કાર્યોની સમીક્ષા માટે આ પ્રવાસનું આયોજન કરવામાં આવ્યું હતું. પ્રવાસ દરમિયાન બસમાં અચાનક ગંભીર ટેકનિકલ ખામી સર્જાઈ હતી. આ અણધાર્યા ભંગાણને કારણે પાલિકાના ઉચ્ચ અધિકારીઓ, ઇજનેરો અને સુરક્ષા સ્ટાફને અધવચ્ચે જ અટકી જવાની ફરજ પડી હતી. સ્થાનિક મધ્યમ ચેનલ દ્વારા શેર કરાયેલા એક વીડિયોમાં 'બેસ્ટ' અને પાલિકાના જવાબદાર અધિકારીઓ વીઆઈપી બસને રસ્તાની વચ્ચે ધક્કો મારતા કેમેરામાં કેદ થયા હતા, જે સોશિયલ મીડિયા પર ભારે રમૂજ અને ટીકાનું કારણ બન્યું છે.

૨૦ મિનિટની ભારે જહેમત બાદ એન્જિન ધબક્યું

બસ બંધ પડતાં જ પરિવહન વિભાગના ઉચ્ચ અધિકારીઓ અને મિકેનિકલ ટીમો તાત્કાલિક ઘટનાસ્થળે દોડી ગઈ હતી. ટેકનિકલ સ્ટાફે આશરે ૨૦ મિનિટની ભારે મશક્કત બાદ વાહનની ખામી સુધારી હતી, જે પછી પ્રવાસ પુનઃ શરૂ કરી શકાયો હતો. સદનસીબે આ ઘટનામાં કોઈ સુરક્ષા ક્ષતિ કે ઈજા નોંધાઈ નથી, પરંતુ આ હાઈ-પ્રોફાઇલ નાગરિક મુલાકાતમાં મોટો વિક્ષેપ જરૂર પડ્યો હતો. મુંબઈકરોની જીવાદોરી ગણાતી 'બેસ્ટ' બસોના જૂના થઈ ગયેલા કાફલા, કથળેલા જાળવણી ધોરણો અને વારંવાર રસ્તા વચ્ચે બસો બંધ પડવાની મુસાફરોની ફરિયાદો પર આ ઘટનાએ મહોર લગાવી દીધી છે.

મેયરે સામાન્ય નાગરિક બની લોકલ ટ્રેનમાં કરી સફર

આ આખી ઘટના ત્યારે વધુ રસપ્રદ બની જ્યારે આ જ દિવસે વહેલી સવારે મેયરે ઇંધણ બચાવવા અને જાહેર પરિવહનને પ્રોત્સાહન આપવા માટે મુંબઈની પ્રખ્યાત લોકલ ટ્રેનમાં મુસાફરી પસંદ કરી હતી. મેયર રીતુ તાવડે કોઈપણ વીઆઈપી પ્રોટોકોલ કે મોટી સુરક્ષા વિના ઘાતકોપર સ્ટેશન પર સામાન્ય મુસાફરોની જેમ કતારમાં ઉભા રહ્યા હતા અને ત્યાંથી દાદર જવા માટે એસી લોકલ ટ્રેનમાં ચડ્યા હતા. ભીડના કારણે શરૂઆતમાં તેમણે ઉભા રહીને જ મુસાફરી કરી હતી, ત્યારબાદ એક સાથી મુસાફરે ઓળખી જતાં તેમને સીટ ઓફર કરી હતી. ટ્રેનમાં મુસાફરો સાથે વાતચીત કરતા મેયરના આ વીડિયો સોશિયલ મીડિયા પર ખૂબ જ વાયરલ થયા હતા અને લોકોએ તેમની સાદગીના વખાણ કર્યા હતા, પરંતુ તે જ બપોરે બેસ્ટ બસે તેમની આ સફરનો સ્વાદ બગાડી નાખ્યો હતો.

મેયર રીતુ તાવડે ચોમાસા દરમિયાન મુંબઈને પાણીમાં ડૂબતું બચાવવા માટે અત્યંત મહત્વપૂર્ણ ગણાતા બ્રિટાનિયા, લવગ્રોવ અને ક્લેવલેન્ડ પમ્પિંગ સ્ટેશનોના નિરીક્ષણ માટે નીકળ્યા હતા, પરંતુ પાલિકાના પોતાના જ તંત્રની ખામીના કારણે આ મહત્વપૂર્ણ રાઉન્ડમાં વિલંબ થયો હતો.