હરદોઈ : ઉત્તર પ્રદેશના હરદોઈ જિલ્લામાંથી એક અત્યંત હૃદયદ્રાવક અને ગમખ્વાર માર્ગ અકસ્માતના સમાચાર સામે આવ્યા છે, જ્યાં ગંગા એક્સપ્રેસવે પર પૂરઝડપે દોડી રહેલી એક XUV કાર અચાનક બેકાબૂ બનીને ડિવાઈડર સાથે ભયાનક રીતે અથડાઈ હતી. આ ગોઝારી દુર્ઘટનામાં નોઈડાની એક અગ્રણી IT કંપનીમાં વાઇસ ચેરમેન તરીકે ફરજ બજાવતા સૌરભ ઉપાધ્યાય, તેમના પત્ની અને બે માસૂમ બાળકો સહિત એક જ પરિવારના ચારેય સભ્યોનાં કમકમાટીભર્યાં મોત નીપજ્યાં છે.

પ્રાપ્ત વિગતો અનુસાર, મૂળ પ્રયાગરાજના નીમ સરાય મુંડેરાના રહેવાસી સૌરભ ઉપાધ્યાય પોતાની પત્ની મેનકા ઉપાધ્યાય (૩૫), સાત વર્ષના મોટા પુત્ર વ્યોમ અને દોઢ વર્ષના નાના પુત્ર શિવોમ સાથે ભાઈબીજ તથા છઠ પૂજાના પવિત્ર તહેવારની ઉજવણી કરવા માટે નોઈડાથી પોતાની કાર દ્વારા વતન જવા નીકળ્યા હતા. હરદોઈના ગંગા એક્સપ્રેસવે પર પહોંચતા જ તેમની કાર પૂરઝડપના કારણે અચાનક કાબૂ બહાર ગઈ હતી અને રોડ પરના ડિવાઈડર સાથે જોરદાર ધડાકાભેર અથડાઈ હતી, જેના કારણે કારનો સંપૂર્ણ કચ્ચરઘાણ નીકળી ગયો હતો.

પ્રત્યક્ષદર્શીઓના જણાવ્યા મુજબ ટક્કર એટલી ભયાનક હતી કે કાર ડિવાઈડર પર આશરે ૩૦ મીટર સુધી ઘસડાઈ હતી, જેમાં સૌરભ ઉપાધ્યાય, તેમના પત્ની મેનકા અને મોટા પુત્ર વ્યોમનું ઘટનાસ્થળે જ કમકમાટીભર્યું મોત થયું હતું. જ્યારે નાનો પુત્ર શિવોમ કારનો કાચ તૂટવાથી ફંગોળાઈને અંદાજે ૨૦ ફૂટ નીચે પટકાયો હતો, જેને ગંભીર ઈજાઓ સાથે તાત્કાલિક હોસ્પિટલ ખસેડવામાં આવ્યો હતો પરંતુ સારવાર દરમિયાન તબીબોએ તેને પણ મૃત જાહેર કરતા સમગ્ર પરિવારમાં આક્રંદ છવાઈ ગયો હતો.

ઘટનાની જાણ થતાં જ સાંડી, બિલગ્રામ અને હરપાલપુર પોલીસ સ્ટેશનની ટીમો તાત્કાલિક કાફલા સાથે ઘટનાસ્થળે દોડી આવી હતી અને બચાવ કામગીરી હાથ ધરી હતી. CO રામ સુરત સોનકરના જણાવ્યા મુજબ અકસ્માતના વાસ્તવિક કારણોની ઊંડાણપૂર્વક તપાસ શરૂ કરવામાં આવી છે અને મૃતદેહોને પોસ્ટમોર્ટમ અર્થે મોકલીને કાયદેસરની આગળની કાર્યવાહી હાથ ધરવામાં આવી રહી છે. વધતી જતી ઝડપ અને એક્સપ્રેસવે પર સુરક્ષાના ધોરણોને લઈને હવે તંત્ર દ્વારા વાહનચાલકો માટે વધુ કડક માર્ગદર્શિકાઓ જારી કરવામાં આવે તેવી સંભાવના છે.