વોશિંગ્ટન: અમેરિકાના રાજકારણમાં એક નવો અને મોટો વિવાદ પેદા થયો છે. યુએસ પ્રમુખ ડોનાલ્ડ ટ્રમ્પે દેશના ન્યાય વિભાગ (ડિપાર્ટમેન્ટ ઓફ જસ્ટિસ - DOJ)ને ડેમોક્રેટિક પાર્ટીના સાંસદો સામે તાત્કાલિક ધોરણે કાયદાકીય તપાસ શરૂ કરવાનો આદેશ આપ્યો છે. ટ્રમ્પના આ આદેશને કારણે અમેરિકન રાજકીય ગલીઓમાં ખળભળાટ મચી ગયો છે.

સૂત્રોના જણાવ્યા અનુસાર, રાષ્ટ્રપતિ ડોનાલ્ડ ટ્રમ્પે ડેમોક્રેટિક સાંસદો સામે આક્રમક વલણ અપનાવતા આક્ષેપ કર્યો છે કે આ નેતાઓ સત્તાનો દૂરઉપયોગ કરી રહ્યા છે. તેઓ વહીવટીતંત્રના વરિષ્ઠ અધિકારીઓ, રિપબ્લિકન પાર્ટીના આર્થિક સહયોગીઓ (ડૉનર્સ) અને રાજકીય સમર્થકોને સતત ડરાવી-ધમકાવી રહ્યા છે.

ટ્રમ્પના દાવા મુજબ, ડેમોક્રેટિક સાંસદો દ્વારા આ તમામ લોકોને ખોટા કાનૂની મુકદમાઓમાં ફસાવવાની, સંસદમાં મહાભિયોગ લાવવાની અને જેલના સળિયા પાછળ ધકેલી દેવાની ખુલ્લી ધમકીઓ આપવામાં આવી રહી છે, જે કોઈપણ ભ્લગે સાંખી શકાય તેમ નથી.

અમેરિકન પ્રમુખના આ આદેશ બાદ દેશમાં રાજકીય ગરમાવો ચરમસીમાએ પહોંચ્યો છે. આગામી સમયમાં ન્યાય વિભાગ આ મામલે શું એક્શન લે છે અને ડેમોક્રેટિક પાર્ટી આ આક્રમક વલણ સામે શું વળતો જવાબ આપે છે, તેના પર સમગ્ર વિશ્વની નજર ટકેલી છે.