ચેન્નાઈ: તા. 17 જૂન, 2026: તમિલનાડુના રાજકીય આકાશમાં એક નવા સૂર્યોદયની તૈયારીઓ થઈ રહી છે. ભારતીય જનતા પાર્ટી સાથેના વર્ષો જૂના સંબંધોને અલવિદા કહીને કે. અન્નામલાઈએ શરૂ કરેલી તેમની ચળવળ ‘વી ધ લીડર્સ’ હવે એક મજબૂત રાજકીય પક્ષનું સ્વરૂપ ધારણ કરવા જઈ રહી છે. અન્નામલાઈએ સ્પષ્ટ કર્યું છે કે આવતા મહિને એટલે કે જુલાઈ સુધીમાં આ સંગઠન સત્તાવાર રીતે એક રાજકીય પક્ષ તરીકે નોંધાશે અને તમિલનાડુના રાજકારણમાં એક નવો વિકલ્પ રજૂ કરશે.
ભાજપમાંથી રાજીનામું આપ્યા બાદ અન્નામલાઈના આ પગલાએ રાજ્યના રાજકીય ગલિયારાઓમાં ભારે ચર્ચા જગાવી છે. તેમણે દાવો કર્યો છે કે માત્ર થોડા જ સમયમાં લગભગ ૧૮ લાખ લોકો કોઈપણ પ્રકારની લાલચ કે અપેક્ષા વગર આ ચળવળ સાથે જોડાયા છે. આ આંકડો સૂચવે છે કે રાજ્યની જનતા પરિવર્તનની રાહ જોઈ રહી છે. સોશિયલ મીડિયા પર પોતાના સમર્થકો સાથે વાત કરતા અન્નામલાઈએ વિશ્વાસ વ્યક્ત કર્યો હતો કે, તેમનો આ પક્ષ કોઈને ગેરમાર્ગે દોરશે નહીં અને તમામ ધર્મોના લોકો માટે સમાનતાનો ભાવ રાખશે.
નવા પક્ષના એજન્ડા વિશે વાત કરતા તેમણે કહ્યું કે, તેઓ તમિલનાડુમાં વધતા જતા ડ્રગના દૂષણ જેવી ગંભીર સમસ્યાઓને પાયાના સ્તરે ઉકેલવા માટે એક જન આંદોલન છેડશે. એટલું જ નહીં, અન્નામલાઈનું લક્ષ્ય વિદેશમાં સ્થાયી થયેલા અને ત્યાં સફળતા મેળવનારા તમિલ ટેક્નોક્રેટ્સ તેમજ વ્યાવસાયિકોને રાજકારણમાં લાવવાનું પણ છે, જેઓ પરંપરાગત રાજકારણથી દૂર રહેવાનું પસંદ કરે છે. તેમણે સ્પષ્ટપણે કહ્યું કે, "ખૂબ જ જૂના નેતૃત્વને છોડીને નવા ચહેરાઓને લાવવા એ સમયની માંગ છે."
રાજકીય પક્ષ બન્યા બાદ અન્નામલાઈ પોતાના નેતાઓ અને પદાધિકારીઓ માટે 'સમય મર્યાદા' (Time Limit) પણ નક્કી કરશે, જેથી રાજકારણમાં પારદર્શિતા અને ગતિશીલતા જળવાઈ રહે. ભાજપમાં પદ પરથી રાજીનામું આપ્યા બાદ, અન્નામલાઈ હવે ‘વી ધ લીડર્સ’ દ્વારા તમિલનાડુના રાજકારણમાં નવા વિચારો અને નવા નેતૃત્વનો નવો યુગ શરૂ કરવાના મિશન પર છે. શું તમિલનાડુની જનતા જૂના રાજકારણને નકારીને અન્નામલાઈના આ નવા પ્રયોગને સ્વીકારશે? તે તો આવનારો સમય જ કહેશે, પરંતુ અત્યાર સુધીના તેમના આ પગલાએ રાજ્યના રાજકીય ગણિતને ચોક્કસપણે બદલી નાખ્યું છે.