નવી દિલ્હી, તા.28: દેશના લાખો યુવાનો અને વિદ્યાર્થીઓના ભવિષ્ય સાથે ખિલવાડ કરતા પેપર લીક અને પરીક્ષા માફિયાઓ પર લગામ કસવા માટે કેન્દ્ર સરકારે સંસદમાં એક ઐતિહાસિક અને આકરો કાયદો રજૂ કર્યો છે. કેન્દ્રીય રાજ્ય મંત્રી જિતેન્દ્ર સિંહે મંગળવારે લોકસભામાં 'જાહેર પરીક્ષાઓ (અન્યાયી માધ્યમો નિવારણ) સુધારા બિલ, ૨૦૨૬' ચર્ચા માટે રજૂ કર્યું હતું. આ બિલ રજૂ કરતાં તેમણે સ્પષ્ટ કર્યું હતું કે, રાધાકૃષ્ણન સમિતિની ૭૬% જેટલી ભલામણોનો અમલ થઈ ચૂક્યો છે અને આ કાયદો દેશની પરીક્ષા પ્રણાલીમાં પારદર્શિતા અને ન્યાયીપણું લાવવાની દિશામાં માઇલસ્ટોન સાબિત થશે.
પરીક્ષામાં ગેરરીતિ સામે 'ઝીરો ટોલરન્સ': દંડ અને સજામાં મસમોટો વધારો
મંત્રી જિતેન્દ્ર સિંહે લોકસભામાં માહિતી આપતાં જણાવ્યું હતું કે, ૨૦૨૪ ના મૂળ કાયદામાં તાજેતરના પેપર લીકના બનાવોને ધ્યાનમાં રાખીને વધુ કડક સુધારા કરવામાં આવ્યા છે:
•    સેવા પ્રદાતાઓ અને કંપનીઓ પર દંડ: પરીક્ષા એજન્સીઓ કે પ્રાઇવેટ સેવા પ્રદાતાઓ જો ગેરરીતિમાં સામેલ જણાશે, તો મહત્તમ દંડ ₹૧ કરોડથી વધારીને ₹૫ કરોડ કરવામાં આવ્યો છે. ઉપરાંત, આવી સંસ્થાઓ પર પરીક્ષા યોજવાનો પ્રતિબંધ ૪ વર્ષથી વધારીને ૮ વર્ષ કરી દેવાયો છે.
•    સંગઠિત ગુના અને માફિયાઓ સામે કાર્યવાહી: પરીક્ષા અધિકારીઓ કે માફિયાઓ સાથે મળીને કરાતા સંગઠિત ગુના માટે લઘુત્તમ જેલની સજા ૫ વર્ષથી વધારીને ૭ થી ૧૦ વર્ષ સુધીની કરવામાં આવી છે. જ્યારે મહત્તમ દંડ ₹૧ કરોડથી સીધો વધારીને ₹૧૦ કરોડ કરવાનો પ્રસ્તાવ મૂકવામાં આવ્યો છે.
૫ મહિનામાં ન્યાય: ફાસ્ટ ટ્રેક કોર્ટ અને ૩૦ દિવસમાં અપીલ
નવા બિલમાં ઉમેરવામાં આવેલી કલમ ૧૨એ (Section 12A) મુજબ, હવે પેપર લીક કે ગેરરીતિની તપાસ પોલીસ અથવા કેન્દ્રીય તપાસ એજન્સીઓએ ૨ મહિનાની અંદર પૂર્ણ કરવાની રહેશે. ત્યારબાદ નિયુક્ત ફાસ્ટ ટ્રેક કોર્ટે ૩ મહિનાની અંદર કેસનો ટ્રાયલ પૂર્ણ કરીને ચુકાદો આપવાનો રહેશે. એટલે કે ગુનો નોંધાયાના ૫ મહિનાની અંદર જ આકરો નિર્ણય લેવાશે. વધુમાં, આ ચુકાદા સામે અપીલ કરવા માટે હાઇકોર્ટની ડિવિઝન બેન્ચ સમક્ષ માત્ર ૩૦ દિવસનો જ સમય મળશે.
"આ પક્ષપાતનો નહીં, રાષ્ટ્રવ્યાપી ચિંતાનો વિષય છે"
વિપક્ષના આરોપોનો જવાબ આપતાં કેન્દ્રીય મંત્રીએ ઉમેર્યું હતું કે, "પરીક્ષામાં છેતરપિંડી એ કોઈ એક પક્ષ કે રાજ્ય પૂરતો મર્યાદિત મુદ્દો નથી, પરંતુ સમગ્ર દેશ માટે ચિંતાનો વિષય છે. પંજાબ હોય કે કર્ણાટક, દરેક જગ્યાએ આવી ઘટનાઓ સામે આવી છે. વડાપ્રધાન નરેન્દ્ર મોદીનો સ્પષ્ટ સંકલ્પ છે કે ભારત માતાના બાળકોના ભવિષ્ય સાથે રમત કરનાર કોઈ પણ દોષિતને છોડવામાં નહીં આવે."
આ સુધારા દ્વારા કેન્દ્ર સરકારનો હેતુ દેશના પ્રામાણિક અને તેજસ્વી યુવાનોને ખાતરી આપવાનો છે કે તેમની સખત મહેનત એળે નહીં જાય અને દોષિતો સામે દાખલારૂપ આકરી કાર્યવાહી કરવામાં આવશે.