નવી દિલ્હી : બહાર ઢાબા, હોટેલ કે રેસ્ટોરન્ટમાં ખાતી વખતે જો તમને ખોરાકમાંથી દુર્ગંધ આવે, અસ્વચ્છ પરિસ્થિતિમાં રસોઈ બનાવતી દેખાય કે પેક્ડ ફૂડ પર ખોટી માહિતી અથવા લેબલિંગ માલૂમ પડે, તો હવે સહન કરવાની કે ચુપ રહેવાની જરૂર નથી. ભારતીય ખાદ્ય સુરક્ષા અને ધોરણો પ્રાધિકરણ (FSSAI) એ ગ્રાહકોની સુરક્ષા અને ખાદ્ય પદાર્થોની ગુણવત્તા સુનિશ્ચિત કરવા માટે 'ફૂડ સેફ્ટી કનેક્ટ' (Food Safety Connect) નામની વિશેષ મોબાઈલ એપ્લિકેશન શરૂ કરી છે, જેના મારફતે કોઈપણ નાગરિક સીધી ફરિયાદ નોંધાવી શકે છે.

ગ્રાહકો એપ દ્વારા સરળતાથી કરી શકશે ફરિયાદ

ઘણીવાર હોટેલ કે રેસ્ટોરન્ટના અસ્વચ્છ રસોડા અને વાસી ખોરાકની ફરિયાદો સામે આવતી હોય છે. હવે આ એપના માધ્યમથી ગ્રાહકો માત્ર થોડી જ મિનિટોમાં અસુરક્ષિત કે ભેળસેળયુક્ત અનાજ અને વાનગીઓની જાણકારી સીધી અધિકારીઓ સુધી પહોંચાડી શકશે. ફરિયાદ કરવા માટે ગ્રાહકે ખાદ્ય પદાર્થ અથવા અસ્વચ્છ જગ્યાનો ફોટો પાડવાનો રહેશે. આ ઉપરાંત બ્રાન્ડનું નામ, ઉત્પાદક કંપનીનું સરનામું અને શક્ય હોય તો તેનો લાઇસન્સ નંબર જેવી વિગતો એપ પર અપલોડ કરવાની રહેશે.

FSSAI દ્વારા તાત્કાલિક કડક કાર્યવાહીની ખાતરી

FSSAI ના જણાવ્યા અનુસાર, એપ પર મળતી ફરિયાદો પર વિભાગ દ્વારા ગંભીરતાથી નોંધ લઈને ત્વરિત તપાસ હાથ ધરવામાં આવે છે. જો તપાસમાં ખોરાકના નમૂના નાપાસ થાય અથવા આરોગ્ય માટે હાનિકારક સાબિત થાય, તો સંબંધિત હોટેલ, ઢાબા કે ઉત્પાદક કંપની સામે કાયદેસરની દંડાત્મક કાર્યવાહી કરવામાં આવે છે. આ ડિજિટલ સુવિધાથી દેશમાં ખાદ્ય સુરક્ષાના ધોરણો વધુ મજબૂત બનશે અને ગ્રાહકોના સ્વાસ્થ્ય સાથે થતાં ચેડાં અટકાવી શકાશે.