ટોક્યો, તા. 8: જાપાનમાં સ્થાયી થવા અને ત્યાં કરિયર બનાવવા ઈચ્છતા એન્જિનિયરો અને માનવતા (Humanities) ક્ષેત્રના નિષ્ણાતો માટે હવે રસ્તો થોડો પડકારજનક બનવા જઈ રહ્યો છે. જાપાન સરકાર ટૂંક સમયમાં જ 'એન્જિનિયર' અને 'સ્પેશિયાલિસ્ટ ઇન હ્યુમેનિટીઝ/ઇન્ટરનેશનલ સર્વિસીસ' વિઝા માટે જાપાનીઝ ભાષાની પ્રાવીણ્ય કસોટી ફરજિયાત કરવા જઈ રહી છે. અત્યાર સુધી આ વિઝા માટે માત્ર શૈક્ષણિક લાયકાત અને અનુભવ જ પૂરતો હતો, પરંતુ હવે ભાષાનું કૌશલ્ય સાબિત કરવું અનિવાર્ય બનશે.
ભાષાનું સ્તર કેટલું હોવું જોઈએ?
નવી નીતિ મુજબ, અરજદારોએ જાપાનીઝ ભાષાની પરીક્ષા (JLPT) માં ઓછામાં ઓછું N2 સ્તર અથવા કોમન યુરોપિયન ફ્રેમવર્ક (CEFR) મુજબ B2 સ્તર હાંસલ કરેલું હોવું જોઈએ. આ સ્તરનો અર્થ એ છે કે વ્યક્તિ વ્યવસાયિક વાતાવરણમાં અને રોજિંદા જીવનમાં જાપાનીઝ ભાષાનો અસરકારક રીતે ઉપયોગ કરી શકવા સક્ષમ હોવી જોઈએ. સરકારનો હેતુ એ છે કે વિદેશી પ્રોફેશનલ્સ પોતાની કુશળતાનો ઉપયોગ કરી શકે અને ભાષાના અભાવે અકુશળ કામોમાં ન ધકેલાય.
કોને રાહત મળશે અને કોના પર ગાજ પડશે?
આ નવા નિયમમાં જાપાનમાં અભ્યાસ કરતા આંતરરાષ્ટ્રીય વિદ્યાર્થીઓને મોટી રાહત આપવામાં આવી છે. જો વિદ્યાર્થી જાપાનમાં ભણીને આ વિઝા કેટેગરીમાં ટ્રાન્સફર થશે, તો તેને ભાષાના પુરાવામાંથી મુક્તિ મળી શકે છે. બીજી તરફ, જે કંપનીઓનો ભૂતકાળ ખરાબ રહ્યો છે, જેમ કે વેતન ન ચૂકવવું અથવા કર્મચારીઓ સાથે ગેરવર્તણૂક કરવી, તેવી કંપનીઓ હવે આ વિઝા હેઠળ નવા વિદેશી કામદારોની ભરતી કરી શકશે નહીં.
શા માટે લેવાયો આ નિર્ણય?
જાપાનમાં વિદેશીઓની સંખ્યા સતત વધી રહી છે. 2025ના અંત સુધીમાં જાપાનમાં 41.3 લાખ વિદેશી રહેવાસીઓ નોંધાયા હતા, જેમાં એન્જિનિયર અને સ્પેશિયાલિસ્ટ વિઝા ધારકોની સંખ્યા આશરે 4.75 લાખ જેટલી છે. સરકારના ધ્યાને આવ્યું હતું કે ઘણા લોકો હાઈ-સ્કિલ વિઝા પર પ્રવેશે છે પરંતુ ભાષા ન આવડતી હોવાને કારણે મજૂરી કે સામાન્ય નોકરીઓ કરવા લાગે છે. આ પ્રકારના વિઝા દુરુપયોગને રોકવા અને વિદેશી વ્યાવસાયિકોનું માન જાળવવા માટે આ કડક પગલું લેવામાં આવ્યું છે.
આ ફેરફારો એપ્રિલના મધ્યથી અમલમાં આવવાની શક્યતા છે, જે જાપાનની ઇમિગ્રેશન પોલિસીમાં એક મોટો વળાંક માનવામાં આવે છે.