લખનૌ : બાગડોગરાથી દિલ્હી જઈ રહેલા એર ઇન્ડિયા એક્સપ્રેસના એક વિમાનમાં અધવચ્ચે આકાશમાં અચાનક 'સ્મોક એલાર્મ' વાગતા અફરાતફરી મચી ગઈ હતી. પાયલોટે તાત્કાલિક સ્થિતિની ગંભીરતા સમજીને લખનૌ એરપોર્ટ પર 'મેડે' (Mayday) કોલ જારી કર્યો હતો અને વિમાનનું સુરક્ષિત ઇમરજન્સી લેન્ડિંગ કરાવ્યું હતું. આ ઘટના સમયે વિમાનમાં 148 મુસાફરો સવાર હતા, જેમના જીવ અધ્ધર થઈ ગયા હતા.

એવીઓનિક્સ બેમાં ટેકનિકલ ખામી

એર ઇન્ડિયા એક્સપ્રેસની ફ્લાઇટ નંબર IX1523 (એરબસ A320) જ્યારે આકાશમાં હતી, ત્યારે તેના 'એવીઓનિક્સ બે' (Avionics Bay) માં ધુમાડો દેખાયો હતો. એવીઓનિક્સ બે એ વિમાનનો એવો ભાગ છે જ્યાં મહત્વના ઇલેક્ટ્રોનિક ઉપકરણો અને નેવિગેશન સિસ્ટમ આવેલી હોય છે. આ અત્યંત સંવેદનશીલ વિસ્તારમાં ધુમાડાની જાણ થતા જ સ્મોક ડિટેક્ટરે એલાર્મ વગાડ્યું હતું, જેના કારણે પાયલોટે જોખમ ન લેતા નજીકના લખનૌ એરપોર્ટ પર ઉતરાણ કરવાનો નિર્ણય લીધો હતો.

લખનૌ એરપોર્ટ પર હાઈ એલર્ટ

પાયલોટ દ્વારા કટોકટીની જાણ કરવામાં આવતા જ લખનૌના ચૌધરી ચરણ સિંહ આંતરરાષ્ટ્રીય એરપોર્ટ પર તાત્કાલિક ફાયર બ્રિગેડ અને એમ્બ્યુલન્સ તૈનાત કરી દેવામાં આવી હતી. વિમાન સોમવારે સાંજે સુરક્ષિત રીતે રનવે પર ઉતરી ગયું હતું અને તમામ 148 મુસાફરોને હેમખેમ બહાર કાઢવામાં આવ્યા હતા. મુસાફરોએ લેન્ડિંગ બાદ હાશકારો અનુભવ્યો હતો.

એરલાઇન્સ દ્વારા તપાસના આદેશ

એર ઇન્ડિયા એક્સપ્રેસના પ્રવક્તાએ જણાવ્યું હતું કે, મુસાફરોની સુરક્ષા અમારી સર્વોચ્ચ પ્રાથમિકતા છે. ટેકનિકલ ખામીના કારણો જાણવા માટે વિમાનની ઊંડાણપૂર્વક તપાસ કરવામાં આવી રહી છે. મુસાફરોને તેમના ગંતવ્ય સ્થાન દિલ્હી મોકલવા માટે વૈકલ્પિક વ્યવસ્થા કરવામાં આવી હતી.

ઉલ્લેખનીય છે કે, હાલમાં પશ્ચિમ એશિયામાં ચાલી રહેલા યુદ્ધ અને એરસ્પેસના પ્રશ્નો વચ્ચે ભારતીય ઉડ્ડયન ક્ષેત્રમાં ટેકનિકલ ખામીની આવી ઘટનાઓએ એરલાઇન્સની જાળવણી (Maintenance) સામે ફરી સવાલો ઉભા કર્યા છે. જોકે, પાયલોટની સતર્કતાને કારણે મોટી દુર્ઘટના ટળી હતી.