નવીદિલ્હી: ઉત્તર પ્રદેશ પોલીસ સબ-ઇન્સ્પેક્ટર (SI) ની ભરતી પરીક્ષામાં સામાન્ય હિન્દીના એક પ્રશ્ને રાજ્યભરમાં મોટા વિવાદને જન્મ આપ્યો છે. 14 માર્ચ, 2026 ના રોજ લેવાયેલી આ પરીક્ષામાં એક પ્રશ્ન પૂછવામાં આવ્યો હતો કે, "પરિસ્થિતિ અનુસાર બદલાતા વ્યક્તિ માટે એક શબ્દ જણાવો." જેમાં વિકલ્પો તરીકે 'પંડિત', 'તકવાદી', 'પ્રામાણિક' અને 'સદાચારી' આપવામાં આવ્યા હતા. પરીક્ષામાં 'પંડિત' શબ્દને 'તકવાદી' (Opportunist) ની વ્યાખ્યા સાથે જોડવામાં આવતા બ્રાહ્મણ સમુદાય અને વિદ્યાર્થીઓમાં ભારે આક્રોશ ફેલાઈ ગયો છે. સોશિયલ મીડિયા પર આ પ્રશ્નને લઈને સરકાર અને પરીક્ષા બોર્ડ સામે તીખી ટીકાઓ થઈ રહી છે.
આ વિવાદ હવે રાજકીય વળાંક લઈ રહ્યો છે. ભાજપના નેતા અભિજાત મિશ્રાએ સીધા મુખ્યમંત્રી યોગી આદિત્યનાથને પત્ર લખીને આ પ્રશ્નપત્ર તૈયાર કરનાર સમિતિ સામે કડક પગલાં લેવાની માંગ કરી છે. મિશ્રાએ જણાવ્યું છે કે, 'પંડિત' શબ્દ જ્ઞાન અને વિદ્વાનનું પ્રતીક છે, તેને નકારાત્મક સંદર્ભમાં મૂકવો એ અસ્વીકાર્ય છે. આ ઉપરાંત, સુહેલદેવ ભારતીય સમાજ પાર્ટી (SBSP) ના રાષ્ટ્રીય પ્રવક્તા પિયુષ મિશ્રાએ પણ બોર્ડ પાસે જાહેર માફીની માંગ કરી છે. ઉમેદવારોનું માનવું છે કે આવી બેદરકારી પરીક્ષાની વિશ્વસનીયતા પર સવાલ ઉભા કરે છે.
ભરતી પ્રક્રિયાને લઈને સર્જાયેલા આ વિવાદ બાદ ઉત્તર પ્રદેશ પોલીસ ભરતી અને પ્રમોશન બોર્ડ (UPPRPB) ના ઉચ્ચ અધિકારીઓ હાલ આ વિવાદાસ્પદ પ્રશ્નની સમીક્ષા કરી રહ્યા હોવાનું સૂત્રો જણાવી રહ્યા છે. જો સમયસર આ પ્રશ્નને રદ કરવામાં નહીં આવે અથવા સત્તાવાર સ્પષ્ટતા આપવામાં નહીં આવે, તો આ મહત્વપૂર્ણ ભરતી પ્રક્રિયા કાનૂની ગૂંચવણમાં ફસાઈ શકે છે. હવે જોવાનું એ રહેશે કે ભરતી બોર્ડ આ મામલે દોષિતો સામે શું કાર્યવાહી કરે છે.