લખનૌ: પશ્ચિમ એશિયામાં ચાલી રહેલા યુદ્ધના પગલે સમગ્ર વિશ્વમાં ગેસ પુરવઠાને લઈને અરાજકતા સર્જાઈ છે, ત્યારે ઉત્તર પ્રદેશના મુખ્યમંત્રી યોગી આદિત્યનાથે કાળાબજાર કરનારાઓ સામે જંગ છેડ્યો છે. છેલ્લા 48 કલાકમાં રાજ્યભરના 2,554 સ્થળોએ ખાદ્ય અને લોજિસ્ટિક્સ વિભાગ દ્વારા વીજળીક દરોડા પાડવામાં આવતા માફિયાઓમાં ફફડાટ વ્યાપી ગયો છે. આ ઓપરેશનમાં અત્યાર સુધીમાં 40 કેસ નોંધી 8 લોકોની સીધી ધરપકડ કરવામાં આવી છે, જ્યારે 37 અન્ય વ્યક્તિઓ સામે કાયદાકીય પ્રક્રિયા શરૂ કરવામાં આવી છે. રાજ્યના 4,108 વિતરકો પાસે પૂરતો સ્ટોક હોવા છતાં કૃત્રિમ અછત ઊભી કરનારા તત્વોને હવે સરકાર જરા પણ છોડવાના મૂડમાં નથી.

રાજ્યમાં ગેસ સિલિન્ડર મેળવવા માટે લાંબી લાઇનો અને ગ્રાહકોની હાલાકીને ધ્યાનમાં રાખીને સરકારે ફૂડ કમિશનરની ઓફિસમાં 24 કલાક કાર્યરત સ્પેશિયલ કંટ્રોલ રૂમ સ્થાપ્યો છે. મુખ્યમંત્રીની સ્પષ્ટ સૂચના છે કે ગ્રાહકોને તેમની જરૂરિયાત મુજબ સરળતાથી રિફિલ મળી રહેવી જોઈએ. સરકાર દ્વારા વાણિજ્યિક સંસ્થાઓ અને હોટલો માટે કુલ વપરાશના 20 ટકા જેટલી ગેસ ફાળવણીને મંજૂરી આપવામાં આવી છે, જેથી હોટલ ઉદ્યોગને પણ અસર ન થાય અને બ્લેક માર્કેટિંગ પર લગામ લાગે. પ્રત્યેક જિલ્લામાં દેખરેખ રાખવા માટે ખાસ અમલીકરણ ટીમો તૈનાત કરવામાં આવી છે જે સતત પેટ્રોલિંગ કરી રહી છે.

વહીવટીતંત્રે સ્પષ્ટ કર્યું છે કે પેટ્રોલ અને ડીઝલની સાથે રાંધણ ગેસનો પૂરતો જથ્થો ઉપલબ્ધ છે, તેથી નાગરિકોએ ગભરાવાની જરૂર નથી. જે વિતરકો અછતના બહાને ગેરરીતિ આચરે છે, તેમના લાયસન્સ રદ કરવાની ચેતવણી પણ આપવામાં આવી છે. કાળાબજારમાં સામેલ પાંચ જેટલા મોટા વિતરકો સામે પણ FIR દાખલ કરવામાં આવી છે, જે દર્શાવે છે કે સરકાર હવે ઝીરો ટોલરન્સની નીતિ અપનાવી રહી છે. આવનારા દિવસોમાં રાજ્યની આસપાસના તમામ વિસ્તારોમાં સપ્લાય ચેઈનને સામાન્ય બનાવવા માટે પોલીસ અને લોજિસ્ટિક્સ વિભાગ સંયુક્ત રીતે કામ કરી રહ્યું છે, જેથી કાળાબજારના આ દૂષણને સંપૂર્ણપણે નાબૂદ કરી શકાય.