પુણે : મહારાષ્ટ્રના પૂર્વ નાયબ મુખ્યમંત્રી દિવંગત અજિત પવારના પુત્ર જય પવારે સોશિયલ મીડિયા પર એક સનસનાટીભર્યો વીડિયો શેર કરીને ખાનગી એવિએશન કંપની VSR વેન્ચર્સ સામે મોરચો માંડ્યો છે. ૨૮ જાન્યુઆરીએ બારામતીમાં થયેલા વિમાન દુર્ઘટનામાં પિતાને ગુમાવનાર જય પવારે આક્ષેપ કર્યો છે કે VSR ના માલિક રોહિત સિંહ મુસાફરોની સુરક્ષા સાથે ગંભીર ચેડા કરી રહ્યા છે. વાયરલ વીડિયોમાં રોહિત સિંહ ચાલુ ફ્લાઇટ દરમિયાન પાયલટની સીટ પર નિરાંતે સૂતા જોવા મળે છે.
એક પુત્રની હૃદયદ્રાવક અપીલ
જય પવારે ભાવુક પોસ્ટમાં લખ્યું છે કે, "અમે અમારા પિતા ગુમાવ્યા છે, આ દુઃખ આખી જિંદગી અમારી સાથે રહેશે. પરંતુ બીજા કોઈનો પરિવાર આવો અન્યાય ન ભોગવે તે માટે હું લડીશ." વીડિયોમાં પ્લેન હવામાં હોવા છતાં જવાબદાર વ્યક્તિનું આ રીતે ઉંઘવું એ સુરક્ષાના નિયમોના લીરેલીરા ઉડાવવા સમાન છે. જય પવારે માંગ કરી છે કે DGCA એ તાત્કાલિક અસરથી રોહિત સિંહની ધરપકડ કરવી જોઈએ અને કંપનીના તમામ વિમાનોને ઉડાન ભરતા રોકવા જોઈએ.
AAIB રિપોર્ટથી અસંતોષ: તપાસ પર સવાલ
બારામતી દુર્ઘટના અંગે એરક્રાફ્ટ એક્સિડેન્ટ ઇન્વેસ્ટિગેશન બ્યુરો (AAIB) એ શનિવારે પોતાનો પ્રારંભિક અહેવાલ રજૂ કર્યો હતો. રિપોર્ટમાં અકસ્માત માટે ઓછી વિઝિબિલિટી (દ્રશ્યતા) અને રનવે પરની કાંકરીને જવાબદાર ગણાવી છે. જોકે, જય પવારે આ રિપોર્ટને 'અધૂરો અને નિરાશાજનક' ગણાવ્યો છે. તેમણે કહ્યું કે મહારાષ્ટ્રની જનતા અને પીડિત પરિવારો પારદર્શક તપાસ ઈચ્છે છે, ન કે ટેકનિકલ બહાના.
રાજકીય ગરમાવો અને છગન ભુજબળની સ્પષ્ટતા
આ મામલે વરિષ્ઠ NCP નેતા છગન ભુજબળે દરમિયાનગીરી કરતા જણાવ્યું હતું કે, જે વીડિયો વાયરલ થઈ રહ્યો છે તે એ જ વિમાનનો નથી જેમાં અજિત પવાર મુસાફરી કરી રહ્યા હતા. જોકે, જય પવારનું કહેવું છે કે વીડિયો ગમે તે પ્લેનનો હોય, પણ કંપનીના માલિકની આવી બેદરકારી સમગ્ર કાફલાની કાર્યપદ્ધતિ પર સવાલ ઉભા કરે છે. મુસાફરોની સલામતીને ટોચની પ્રાથમિકતા આપી VSR વેન્ચર્સના સમગ્ર ઓપરેશનને ગ્રાઉન્ડેડ કરવું જોઈએ.
જય પવારના આ આક્રમક વલણ બાદ હવે કેન્દ્રીય નાગરિક ઉડ્ડયન મંત્રાલય અને DGCA પર કડક કાર્યવાહી કરવાનું દબાણ વધી રહ્યું છે.