યુદ્ધના તણાવ વચ્ચે અબુધાબીનું BAPS હિન્દુ મંદિર ૯ માર્ચ સુધી બંધ...
રાષ્ટ્રીય સુરક્ષા અને શ્રદ્ધાળુઓની સલામતીને પ્રાથમિકતા આપીને મંદિર પ્રશાસને આ મહત્વનું પગલું ભર્યું
અબુધાબી,તા.૩: મધ્ય પૂર્વમાં વણસી રહેલી યુદ્ધની સ્થિતિને પગલે સંયુક્ત આરબ અમીરાત (UAE) માં હાઈ એલર્ટ જાહેર કરવામાં આવ્યું છે. ઈરાન અને અમેરિકા વચ્ચેના વધતા તણાવની સીધી અસર હવે ધાર્મિક અને જાહેર સ્થળો પર પણ જોવા મળી રહી છે. આ ગંભીર સુરક્ષા સ્થિતિને ધ્યાનમાં રાખીને અબુ ધાબીમાં સ્થિત ભવ્ય BAPS હિન્દુ મંદિરને મુલાકાતીઓ માટે કામચલાઉ ધોરણે બંધ કરવાનો નિર્ણય લેવામાં આવ્યો છે. રાષ્ટ્રીય સુરક્ષા અને શ્રદ્ધાળુઓની સલામતીને પ્રાથમિકતા આપીને મંદિર પ્રશાસને આ મહત્વનું પગલું ભર્યું છે.
અબુ ધાબી સ્થિત BAPS હિન્દુ મંદિર દ્વારા જારી કરવામાં આવેલા સત્તાવાર નિવેદન અનુસાર, વર્તમાન પ્રાદેશિક સ્થિતિ અને રાષ્ટ્રીય સુરક્ષાને જોતા સોમવારથી ૯ માર્ચ સુધી મંદિર મુલાકાતીઓ માટે બંધ રહેશે. જોકે, મંદિરના સ્વામીઓ અને સંતો આ મુશ્કેલ સમયમાં વિશ્વ શાંતિ, સુરક્ષા અને સૌના કલ્યાણ માટે મંદિર પરિસરમાં સતત પ્રાર્થના ચાલુ રાખશે. ગલ્ફ દેશોમાં વધી રહેલા મિસાઇલ હુમલાના જોખમને પગલે સાવચેતીના ભાગરૂપે આ નિર્ણય લેવાયો છે.
ઈરાનના સર્વોચ્ચ નેતા ખામેનેઈના મૃત્યુ બાદ ઈરાની રિવોલ્યુશનરી ગાર્ડ આક્રમક બન્યું છે અને ખાડી દેશોમાં આવેલા અમેરિકી સૈન્ય મથકોને નિશાન બનાવી રહ્યું છે. આ સંઘર્ષને કારણે અબુ ધાબી અને દુબઈના એરપોર્ટ પર પણ હુમલાના પ્રયાસો થયા છે, જેના લીધે અનેક દેશોએ પોતાનો એરસ્પેસ (હવાઈ માર્ગ) બંધ કરી દીધો છે. યુએઈ અને સાઉદી અરેબિયાએ ઈરાનના આ કૃત્ય સામે વળતો પ્રહાર કરવાની ચેતવણી આપી છે, જેનાથી યુદ્ધ વધુ ભયાનક બનવાની આશંકા છે.
યુએઈના સંરક્ષણ મંત્રાલયના જણાવ્યા અનુસાર, અત્યાર સુધીમાં ઈરાન તરફથી ૧૬૫ બેલિસ્ટિક મિસાઈલ, ૨ ક્રૂઝ મિસાઈલ અને ૫૪૧ ડ્રોન હુમલા કરવામાં આવ્યા છે. આ હુમલાઓમાં કુલ ૫૮ લોકો ઈજાગ્રસ્ત થયા છે, જેમાં એક ભારતીય નાગરિકનો પણ સમાવેશ થાય છે. અબુ ધાબીમાં ભારતીય દૂતાવાસે પુષ્ટિ કરી છે કે તેઓ હોસ્પિટલના અધિકારીઓ સાથે સંપર્કમાં છે અને ઈજાગ્રસ્ત ભારતીયને જરૂરી મદદ પૂરી પાડવામાં આવી રહી છે.
અબુ ધાબીનું આ પ્રખ્યાત BAPS હિન્દુ મંદિર ૨૭ એકર જમીન પર પથરાયેલું છે, જેની જાહેરાત ૨૦૧૮માં વડાપ્રધાન નરેન્દ્ર મોદીની યુએઈ મુલાકાત દરમિયાન કરવામાં આવી હતી. આ મંદિરના નિર્માણમાં વર્ષોની મહેનત બાદ ૧૪ ફેબ્રુઆરી, ૨૦૨૪ના રોજ પીએમ મોદીએ તેનું ભવ્ય ઉદ્ધાટન કર્યું હતું. મધ્ય પૂર્વમાં શાંતિ અને સદભાવના પ્રતીક સમાન આ મંદિર અત્યારે યુદ્ધની જ્વાળાઓને કારણે મુલાકાતીઓ માટે બંધ કરવું પડ્યું છે, જે ચિંતાનો વિષય છે
(10:15 AM IST)
છેલ્લા 8 દિવસમાં સૌથી લોકપ્રિય 
