ઢાકા:  દક્ષિણ એશિયાના રાજકારણમાં એક નવો અધ્યાય શરૂ થવા જઈ રહ્યો છે. બાંગ્લાદેશમાં લાંબા સમયથી ચાલી રહેલી રાજકીય અસ્થિરતા અને ભારત સાથેના તણાવપૂર્ણ સંબંધો પર હવે પૂર્ણવિરામ મુકાઈ રહ્યું હોય તેવું લાગે છે. બાંગ્લાદેશમાં ભારતના વરિષ્ઠ કોન્સ્યુલર અધિકારી અનિરુદ્ધ દાસે જાહેરાત કરી છે કે ભારત ટૂંક સમયમાં બાંગ્લાદેશમાં તેની તમામ વિઝા સેવાઓ પુનઃસ્થાપિત કરશે. ફેબ્રુઆરી ૨૦૨૬માં બીએનપી નેતા તારિક રહેમાનના વડાપ્રધાન તરીકે શપથ લીધા બાદ, નવી દિલ્હી અને ઢાકા વચ્ચેના વહેવારમાં ગરમાવો આવ્યો છે, જે બંને દેશોના અર્થતંત્ર અને સામાન્ય નાગરિકો માટે ખૂબ જ રાહતના સમાચાર છે.

નોંધનીય છે કે ઓગસ્ટ ૨૦૨૪માં શેખ હસીના સરકારના પતન પછી ભારત-બાંગ્લાદેશ સંબંધો ઇતિહાસના સૌથી ખરાબ તબક્કામાંથી પસાર થયા હતા. સુરક્ષાના કારણોસર ભારતે ડિસેમ્બર ૨૦૨૫ સુધીમાં વિઝા સેવાઓ લગભગ ઠપ્પ કરી દીધી હતી, જેના કારણે દરરોજના ૮,૦૦૦ વિઝાનો આંકડો ઘટીને માત્ર ૧,૫૦૦ થઈ ગયો હતો. પરંતુ હવે, અનિરુદ્ધ દાસના જણાવ્યા અનુસાર, પરસ્પર આદર અને ગૌરવના પાયા પર નવા સંબંધો બાંધવામાં આવી રહ્યા છે. હાલમાં માત્ર મેડિકલ અને ડબલ-એન્ટ્રી વિઝા અપાઈ રહ્યા છે, પરંતુ ટૂંક સમયમાં જ પ્રવાસન  વિઝા શ્રેણી પણ સંપૂર્ણપણે કાર્યરત કરી દેવામાં આવશે.

આ નિર્ણય પાછળનું સૌથી મોટું કારણ બાંગ્લાદેશમાં આવેલી નવી લોકતાંત્રિક સ્થિરતા છે. તારિક રહેમાનના શાસનમાં ભારત તેના રાજદ્વારી મિશન અને નાગરિકોની સુરક્ષા પ્રત્યે વધુ આશ્વસ્ત જણાય છે. વિઝા સેવાઓ પુનઃ શરૂ થવાથી માત્ર દર્દીઓ કે પ્રવાસીઓને જ ફાયદો નહીં થાય, પરંતુ સરહદ પારના વેપારને પણ મોટું પ્રોત્સાહન મળશે. સિલહટમાં પ્રેસ ક્લબ ખાતેની વાતચીતમાં દાસે સ્પષ્ટ કર્યું કે ભારત અને બાંગ્લાદેશના સામાન્ય લોકો જ આ મજબૂત સંબંધોના અસલી હિસ્સેદાર છે. આગામી દિવસોમાં બંને દેશો વચ્ચે ઉચ્ચ સ્તરીય દ્વિપક્ષીય બેઠકોનો દોર પણ શરૂ થવાની પૂરેપૂરી શક્યતા છે.