મુંબઈ : ભારતની અર્થવ્યવસ્થાની નવી દિશા નક્કી કરનારા બજેટ ૨૦૨૬માં આ વખતે ટેક્સ ભરનારાઓ માટે એક ચોંકાવનારો પણ રાહતદાયક ફેરફાર કરવામાં આવ્યો છે. નાણામંત્રીએ જાહેરાત કરી છે કે હવેથી જો કોઈ કરદાતા પોતાની આવક છુપાવશે, તો તેને જેલની સજાના બદલે આકરો આર્થિક દંડ કરવામાં આવશે. આ પગલાથી વ્યાપારીઓ અને ઉદ્યોગ જગતને મોટી રાહત મળી છે. જોકે, બજેટમાં કોઈ મોટી 'પોપ્યુલિસ્ટ' કે સીધી આર્થિક છૂટછાટની જાહેરાત ન થતા શેરબજારમાં નિરાશા જોવા મળી હતી અને સેન્સેક્સ-નિફ્ટીમાં પ્રચંડ કડાકો નોંધાયો હતો.

ઈન્કમ ટેક્સ ક્ષેત્રે 'નવો ટેક્સ એક્ટ ૨૦૨૫' ૧ એપ્રિલથી લાગુ થઈ જશે, જેના માટે રિટર્ન ફાઈલ કરવાની તારીખોમાં પણ ફેરફાર કરાયો છે. સામાન્ય કરદાતા ૩૧ જુલાઈ સુધી રિટર્ન ભરી શકશે, જ્યારે નોન-ઓડિટ બિઝનેસ માટે ૩૧ ઓગસ્ટની મુદત નક્કી કરવામાં આવી છે. શિક્ષણ ક્ષેત્રે ક્રાંતિ લાવવા માટે દેશના દરેક જિલ્લામાં 'ગર્લ્સ હોસ્ટેલ' બનાવવાની જાહેરાત દીકરીઓ માટે સંજીવની સમાન સાબિત થશે. આ સાથે જ ૫ નવી યુનિવર્સિટી ટાઉનશિપ અને અંતરિક્ષ સંશોધન માટે ૪ નવી ટેલિસ્કોપ સુવિધાઓ સ્થાપવાની જાહેરાતથી ભારત વિશ્વમાં જ્ઞાનના કેન્દ્ર તરીકે ઉભરી આવશે.

ખેતી અને ગ્રામીણ અર્થતંત્રને વેગ આપવા સરકારે 'નારિયેળ સંવર્ધન યોજના' અને કાજુ-કોકો માટે વિશેષ કાર્યક્રમ જાહેર કર્યો છે. વર્ષ ૨૦૩૦ સુધીમાં ભારતીય કાજુને વૈશ્વિક 'પ્રીમિયમ બ્રાન્ડ' બનાવવાનો લક્ષ્યાંક છે. તે જ રીતે, નવી પેઢી માટે એનિમેશન અને ગેમિંગ (AVGC) ક્ષેત્રમાં ૨૦ લાખ નોકરીઓનું સર્જન કરવા ૧૫,૦૦૦ શાળાઓમાં 'કન્ટેન્ટ ક્રિએટર લેબ્સ' બનાવવામાં આવશે. રમતગમત ક્ષેત્રે 'ખેલો ઈન્ડિયા મિશન' ના નવા અવતારથી યુવાનોને પ્રોફેશનલ સ્પોર્ટ્સમાં રોજગારીની તકો મળશે, જે ઓલિમ્પિક જેવા વૈશ્વિક મંચો પર ભારતની સ્થિતિ મજબૂત કરશે.

સ્વાસ્થ્ય ક્ષેત્રે જામનગર ફરી એકવાર કેન્દ્રસ્થાને રહ્યું છે. જામનગરના WHO ગ્લોબલ ટ્રેડિશનલ મેડિસિન સેન્ટરને વધુ હાઈ-ટેક બનાવવાની સાથે દેશમાં ૩ નવી 'આયુર્વેદ AIIMS' સ્થાપવાની જાહેરાત કરાઈ છે. આયુષ ફાર્મસીઓને અપગ્રેડ કરવાથી દેશમાં પરંપરાગત સારવાર વધુ સસ્તી અને સુલભ બનશે. ભલે શેરબજારે આ બજેટને ઠંડુ પ્રતિસાદ આપ્યો હોય, પરંતુ લાંબા ગાળે ઈન્ફ્રાસ્ટ્રક્ચર, શિક્ષણ અને ડિજિટલ સ્કીલ્સ પાછળ કરાયેલું આ રોકાણ ભારતને 'વિકસિત ભારત' બનાવવાની દિશામાં મજબૂત પાયો નાખશે.