નવી દિલ્હી : રેલવેમાં સરકારી નોકરી મેળવવાનું સપનું જોતા યુવાનો માટે વર્ષ ૨૦૨૬ની સૌથી મોટી ખુશખબર આવી ગઈ છે. રેલવે ભરતી બોર્ડ (RRB) દ્વારા ગ્રુપ-D ની કુલ ૨૨,૧૯૫ જગ્યાઓ માટે ભરતીની જાહેરાત કરવામાં આવી છે. જે ઉમેદવારોએ ૧૦મું ધોરણ પાસ કર્યું છે અથવા ITI ની ડિગ્રી ધરાવે છે, તેઓ આજથી જ આ પ્રતિષ્ઠિત નોકરી માટે ઓનલાઇન અરજી કરી શકે છે.
મહત્વની તારીખો નોંધી લેજો
ભરતી પ્રક્રિયાની શરૂઆત આજે એટલે કે ૩૧ જાન્યુઆરી, ૨૦૨૬ થી થઈ ચૂકી છે. રસ ધરાવતા ઉમેદવારો ૨ માર્ચ, ૨૦૨૬ સુધી અરજી ફોર્મ ભરી શકશે. જો ફોર્મમાં કોઈ ભૂલ રહી જાય, તો ૫ થી ૧૪ માર્ચ દરમિયાન સુધારો કરવાની તક પણ આપવામાં આવશે.
કોણ કરી શકે છે અરજી? (પાત્રતા)
•    શૈક્ષણિક લાયકાત: ૧૦મું પાસ અથવા ITI અથવા NCVT દ્વારા માન્ય રાષ્ટ્રીય એપ્રેન્ટિસશીપ પ્રમાણપત્ર (NAC).
•    વય મર્યાદા: ૧ જાન્યુઆરી, ૨૦૨૬ ના રોજ ઉમેદવારની ઉંમર ૧૮ થી ૩૩ વર્ષની વચ્ચે હોવી જોઈએ. અનામત વર્ગના ઉમેદવારોને સરકારી નિયમ મુજબ ઉંમરમાં છૂટછાટ મળશે.
પસંદગી પ્રક્રિયા અને પગાર ધોરણ
આ ભરતીમાં પસંદગી મેળવવા માટે ઉમેદવારોએ બે મુખ્ય તબક્કામાંથી પસાર થવું પડશે:
૧. CBT (કોમ્પ્યુટર આધારિત ટેસ્ટ): સૌપ્રથમ ઓનલાઇન પરીક્ષા લેવામાં આવશે.
૨. PET (શારીરિક ક્ષમતા કસોટી): લેખિત પરીક્ષામાં પાસ થનારને શારીરિક કસોટી માટે બોલાવવામાં આવશે.
પસંદ થયેલા ઉમેદવારોને લેવલ-૧ મુજબ દર મહિને ₹૧૮,૦૦૦ નો પ્રારંભિક પગાર અને તે ઉપરાંત કેન્દ્ર સરકારના અન્ય ભથ્થાઓ (DA, HRA વગેરે) મળવાપાત્ર થશે.
અરજી ફીની વિગત
•    જનરલ/OBC/EWS: ₹૫૦૦ (પરીક્ષા આપ્યા બાદ ₹૪૦૦ રિફંડ મળશે).
•    SC/ST/મહિલા/દિવ્યાંગ: ₹૨૫૦ (પરીક્ષા આપ્યા બાદ સંપૂર્ણ રકમ પરત મળશે).